"Münaqişənin həllinə birbaşa təsiri olmasa da, Azərbaycanın mövqelərini hüquqi baxımdan möhkəmləndirmək cəhətdən bunun müsbət təsiri var"
Qoşulmama Hərəkatına üzv ölkələrin dövlət və hökumət başçılarının "İnkişaf naminə sülh, suverenlik və həmrəylik" devizi altında sentyabrın 13-18-də Venesuela Bolivar Respublikasının Marqarita adasında keçirilmiş XVII Sammitinin yekun sənədi qəbul olunub. Qoşulmama Hərəkatının Venesuelada keçirilmiş sammitində Ermənistan-Azərbaycan, Dağlıq Qarabağ münaqişəsinin həlli üzrə Azərbaycanın ərazi bütövlüyü növbəti dəfə tanınıb.
Sammitin qəbul edilmiş yekum bəyanatına ölkələrin ərazi bütövlüyü, terrorizmə qarşı mübarizə, ölkələrdə sabitliyin pozulmasına qarşı addımların atılması bəndləri daxildir. Azərbaycanı sammitdə xarici işlər naziri Elmar Məmmədyarov təmsil edib. Yekun sənədə, həmçinin, dövlət və hökumət başçılarının 18-ci Sammitinin 2019-cu ildə Azərbaycanda keçirilməsi və BMT-nin Sivilizasiyalar Alyansının 26-27 aprel 2016-cı ildə Bakıda keçirilmiş 7-ci Qlobal Forumu ilə əlaqədar bəndlər də daxildir.
Məlumat üçün qeyd edək ki, Qoşulmama Hərəkatı hərbi bloklarda iştirak etməmək prinsipi üzrə 120 dövləti birləşdirir. Hərəkat 1961-ci ilin sentyabrında Belqrad konfransında yaradılıb.
Bütövlükdə qəbul olunan sözügedən qərarlar Azərbaycan üçün nə deməkdir? Məsələyə münasibət bildirən AMİP-in baş katibi Arzuxan Əlizadənin fikrincə, prinsipcə, bu səpkili qərarların qəbul olunması Azərbaycanın xeyrinədir: "Düzdür, Bloklara Qoşulmama Hərəkatının qərarları imperativ xarakterli deyil. Yəni bu o demək deyil ki, bu cür qərardan sonra ölkənin ərazi bütövlüyü təmin olunacaq. Orada qəbul olunan qərarlar tövsiyə xarakterlidir. Ancaq, istənilən halda, beynəlxalq müstəvidə tanınan bir təşkilatın Azərbaycanın lehinə qərar çıxarması müsbət haldır. Qarabağ məsələsinin beynəlxalq müstəviyə çıxarılmasında bu kimi qərarların xeyri var, ziyanı yoxdur. Münaqişənin həllinə birbaşa təsiri olmasa da, Azərbaycanın mövqelərini hüquqi baxımdan möhkəmləndirmək cəhətdən bunun müsbət təsiri var. Yəni Sammitin yekun sənədində ərazi bütövlüyü ilə bağlı prinsipin olması müsbət haldır. Necə ki, bir sıra Avropa qurumlarının bənzər qərarları var. Baxmayaraq ki, Ermənistan nəinki bunlara, BMT-nin qəbul etdiyi 4 qətnaməyə belə əməl etmir. Ona görə də biz bütün imkanlarımızı səfərbər edib bu istiqamətdə səylərimizi artırmalıyıq". Vidadi ORDAHALLI