"Beynəlxalq təşkilat bu addımı ilə nəinki Azərbaycana qarşı qərəzli olduğunu, həmçinin, bizimlə düşmənçilik apardığını etiraf etmiş oldu"
Ermənistan mətbuatında beynəlxalq qurumların yol verdikləri növbəti kobud səhvlə bağlı məlumat yayılıb. Maraqlıdır ki, Ermənistan mətbuatı həmin xəbəri çox böyük sevinclə tirajlayır. Söhbət "Freedom House" təşkilatının 2016-cı il üzrə dünya ölkələri arasında azadlıq indeksinin necə müəyyənləşməsilə bağlı keçirdiyi rəy sorğusundan gedir.
Həmin məlumatda bildirilir ki, təşkilatın apardığı sorğuda qondarma "Dağlıq Qarabağ Respublikası"na ayrıca ölkə kimi qiymət verilir. Təşkilat qondarma qurumun indeksini 33 balla qiymətləndirib.
Ermənistan mətbuatının tirajladığı həmin hesabatda sözügedən ölkənin azad ölkələr kateqoriyasına aid edildiyi bildirilir.
"Freedom House"un Azərbaycanla bağlı yol verdiyi bu kobud səhvi təsadüf saymaq olar, yoxsa bilərkədən edilən təxribatdır?
Qeyri-hökumət təşkilatı rəhbəri Vüqar Qədirov qəzetimizə açıqlamasında bildirdi ki, bunu təsadüf saymaq olmaz: "Kifayət qədər tanınmış bir təşkilatın yol verdiyi bu yanlışlıq bağışlanılmazdır. Mən buna yanlışlıq da deməzdim. Çünki dünyaya demokratiya dərsi keçən bir qurum bələ kobud səhvə necə yol verə bilər? Onlar ölkələrin azadlıq dərəcəsi və insan haqlarının vəziyyətini təqdir edirsə, elə bununla milyonlarla insanın hüququnu pozmuş olur. Hesabatda Ermənistan kimi hərbi kriminallaşmış bir rejimin idarə etdiyi ərazini azad kimi qələmə verirlərsə, buradan sorğunun nə dərəcədə "obyektiv" olduğu aydın görünür. Onsuz da "Freedom House"un Azərbaycana qarşı daim qərəzli münasibət sərgilədiyi bəllidir. Biz bunu bütün mühüm tədbirlər öncəsi və digər həssas məqamlarda görmüşük. Ancaq işğal altında olan qondara qurumu müstəqil ölkə kimi qiymətləndirmək əndazəni aşmaq anlamına gəlir. Bu, qanun pozuntusu və beynəlxalq miqyaslı cinayətdir. Hesab edirəm ki, Azərbaycanın rəsmi qurumları mütləq buna reaksiya verməlidir. Beynəlxalq təşkilat bu addımı ilə nəinki Azərbaycana qarşı qərəzli olduğunu, həmçinin, bizimlə düşmənçilik apardığını etiraf etmiş oldu".
Məhəmmədəli QƏRİBLİ