23 noyabrda Cenevrədə keçirilən ABŞ-Ukrayna danışıqları zamanı sülh planındakı maddələrin sayı 28-dən 19-a endirilib. Bu barədə məlumat yayan “Financial Times” qəzeti hansı maddələrin çıxarıldığı barədə heç bir məlumat paylaşmayıb, lakin hər iki tərəfin planın əhatə dairəsini "daha işlək hala gətirmək" üçün daraltdığını bildirib.
Qəzetin mənbələrinə görə, danışıqlar gərgin keçib və qapalı qapılar arxasında aparılıb, ona görə də layihənin hansı elementlərinin çıxarıldığı hələ məlum deyil. “Bloomberg” isə yazır ki, , Rusiyanın dondurulmuş aktivlərinin istifadəsi ilə bağlı məddə ABŞ prezidenti Trampın sülh planının son versiyasından tamamilə çıxarılıb.
İlkin layihədə təxminən 100 milyard dollar dondurulmuş Rusiya aktivlərinin ABŞ-ın rəhbərliyində Ukraynadakı yenidənqurma proqramlarına yönəldilməsi və əldə ediləcək mənfəətin 50%-nin Vaşinqtona verilməsi nəzərdə tutulurdu.
Avropalıların etirazlarından sonra bu maddə layihədən çıxarılıb və Avropa liderləri dəyişikliyi "irəliləyiş" kimi qəbul ediblər. Mənbələr bildirib ki, Avropa milli təhlükəsizlik müşavirləri planı atəşkəs üçün lazım olan "əsas maddələr"lə məhdudlaşdırmaqda əhəmiyyətli irəliləyiş əldə ediblər, bəzi mübahisəli məsələlər isə sonrakı danışıqlarda müzakirə ediləcək.
Ukrayna mediası isə yazır ki, Ukrayna Silahlı Qüvvələrinin maksimum şəxsi heyətinin sayı və əsir mübadiləsi formatı kimi məsələlərdə də razılaşmalar əldə edilib. Lakin ərazi məsələləri və Ukrayna konstitusiyasına NATO-ya qoşulmamaq öhdəliyinin daxil edilməsi kimi ən vacib məsələlərin prezidentlər Zelenski və Tramp arasında planlaşdırılan zirvə görüşündə birbaşa müzakirə ediləcəyi gözlənilir.
Kiyev də Cenevrədə keçirilən danışıqlardan sonra əvvəlki 28 bəndlik sülh planının artıq mövcud olmadığını açıqlayıb. Ukrayna Prezident Aparatının müşaviri Aleksandr Bevz bəzi maddələrin tamamilə çıxarıldığını, bəzilərinin isə dəyişdirildiyini bildirib və əlavə edib ki, "Ukrayna tərəfinin heç bir xəbərdarlığı cavabsız qalmayıb". Bevz həmçinin son günlərdə planla bağlı yayılan şayiələrin "reallıqdan daha çox" olduğunu vurğulayıb.
Onun sözlərinə görə, ən mübahisəli məsələlərlə bağlı son qərarlar dövlət başçıları tərəfindən veriləcək.
Bir daha xatırladaq ki, ABŞ tərəfindən hazırlanan 28 bəndlik plan 23 noyabrda Cenevrədə ABŞ və Ukrayna nümayəndələri tərəfindən müzakirə edilib. Eyni zamanda Avropa Birliyi nümayəndə heyəti də öz alternativ təklifini təqdim etmək üçün İsveçrəyə səfər edib. Ukrayna mediası və Qərb mənbələrinə görə, plan artıq 19 bəndə endirilib.
TAHİR
