Ramil Məmmədli: “Zelenskinin müraciət tonunda xalqı güzəştlərə hazırlamaq elementləri var”
İndi tariximizin ən çətin anlarından biridir. Bu barədə Ukrayna Prezidenti Volodimir Zelenski xalqa müraciətində bildirib.
Onun sözlərinə görə, Ukrayna çox çətin bir seçimlə – ya ləyaqətini, ya da əsas tərəfdaşını itirmək risqi ilə üzləşə bilər: “Ya çətin 28 bənd, ya da son dərəcə çətin qış, ən çətin və daha çox risq. Onlar bizdən cavab gözləyirlər, amma mən bu cavabı 2019-cu il mayın 20-də Ukraynanın suverenliyini və müstəqilliyini müdafiə etməyə sadiq olduğumu deyəndə verdim”.
O, bu həftənin çətin və hadisəli olacağını bəyan edib: “Siz yetkin və məlumatlı bir xalqsınız. Bu müddət ərzində çox təzyiq olacaq. Düşmən yatmır”.
Zelenski Ukraynanın maraqlarının nəzərə alınmalı olduğunu da vurğulayıb: “Biz Amerika və bütün tərəfdaşlarla rahat şəkildə işləyəcəyik. İnandıracağam, alternativlər təklif edəcəyəm, amma şübhəsiz ki, düşmənə Ukraynanın sülh istəmədiyini söyləmək üçün heç bir səbəb verməyəcəyik”.
Maraqlıdır, Zelenskinin müraciətində “Ukrayna ya ləyaqətini, ya da əsas tərəfdaşını itirmək risqi ilə üzləşə bilər” nə deməkdir? Bəlkə xalqı hazırlayır nəyəsə? Ola bilərmi xalqa desin ki , ABŞ- ı itirməkdənsə, gəlin güzəştə gedək?
“Əhali müharibədən yorulub və cəmiyyət güzəştə razılıq verə bilər”
Sözügedən məsələni “Bakı-Xəbər”ə şərh edən hərbi ekspert Ramil Məmmədlinin fikrincə, Zelenskinin müraciət tonunda xalqı güzəştlərə hazırlamaq elementləri var: “Çünki Ukraynada vəziyyət həqiqətən də çox mürəkkəbdir. O üzdən, Zelenski belə bir müraciət etmək məcburiyyətində qalıb. Sanki bununla Zelenski demək istəyir ki, son qərar xalqındır. Xalqa ünvanlanan bu müraciətlə göstərmək istəyir ki, Ukrayna iki yolun ayrıcındadır. Bu tərəfdən də Tramp qəti şəkildə Zelenskiyə ayın 27-nə qədər vaxt verib və həmin tarixə qədər ondan qərar tələb edir. Zelenski fərqindədir ki, ABŞ-la əməkdaşlıqdan imtina etsə, bunun nəticələri çox ağır ola bilər. Problem ondadır ki, Avropa İttifaqının böyük maliyyə resursları olsa da, hərbi baxımdan ABŞ-ı əvəz etmək gücündə deyil. Söhbət bir sıra silah növlərindən və peyk vasitəsilə verilən kəşfiyyat məlumatlarından gedir. Onlar da Aİ ölkələrində yoxdur. Məsələnin digər mürəkkəb tərəfi odur ki, 28 maddəlik sülh planında Ukrayna üçün ağır şərtlər öz əksini tapıb. Plana görə, Ukrayna Rusiyaya ərazi güzəştləri etməlidir. Belə ki, təklif olunan sülh planında Krım, Donetsk və Luqansk de-fakto Rusiyanın tərkibində tanınır. Xerson və Zaporojye vilayətlərində cəbhə xətti “dondurulmuş” vəziyyətdə qalır. Rusiya beş bölgədən kənarda işğal etdiyi ərazilərdən imtina edir. Donetskin bir hissəsi neytral, demilitarizasiya olunmuş zona kimi tanınır. Bütün bu ağır şərtlərin fərqində olan Zelenski xalqa müraciət edərək məsuliyyəti təkbaşına daşımadığını göstərmək istəyir. Daha dəqiq desək, məsuliyyəti bölüşməyə çalışır. Bütün bunlarla yanaşı, Tramp müharibəni dayandırmaqla bağlı Kiyevə təzyiqləri artırır. Digər bir tərəfdən, Ukraynanın enerji infrastrukturuna vurulan zərbələr onsuz da ağır olan vəziyyəti daha da mürəkkəbləşdirir. Müharibə davam edəcəyi halda bu qışdan necə çıxacaqları naməlumdur. O da faktdır ki, əhali müharibədən yorulub. Hər halda, Zelenski də bunun fərqindədir və deyərdim ki, daha çox informasiyaya malikdir. O baxımdan cəmiyyət güzəştə razılıq verə bilər”.
Vidadi ORDAHALLI
