Azərbaycanda söz və mətbuat azadlığının inkişafı istiqamətində həyata keçirilən siyasət nəticəsində o informasiya təhlükəsizliyinin vacib bir qolu kimi özünü təsdiqləyir.
Bu gün bütün dünyada olduğu kimi, Azərbaycanda da informasiya təhlükəsizliyinin təmin edilməsi əsas vəzifələrdən biri olaraq meydana çıxır.
Saxta informasiya ixracının dövriyyədə olduğu bir dövrdə onunla mübarizədə, bu sahədə maarifçilik işinin aparılmasında, müxtəlif tədbirlərin keçirilməsində Azərbaycan Respublikasının Medianın İnkişafı Agentliyi kifayət qədər iradə ortaya qoyur. MEDİA müxtəlif vaxtlarda beynəlxalq təsisatlarla birgə bu istiqamətdə zəriri layihələr həyata keçirir. Birgə əməkdaşlıq nəticəsində ərsəyə gələn bu tədbirlər media maarifçiliyinə böyük töhfələr verir.
Məsələn, bir neçə gün əvvəl Medianın İnkişafı Agentliyi və Avropanın aparıcı xəbər şəbəkələrindən biri olan “Euronews” telekanalının birgə əməkdaşlığı çərçivəsində beynəlxalq tədris platforması olan “Euronews Academy”nin “TV və canlı jurnalistika” mövzusunda təlim proqramı həyata keçirildi. Noyabr ayının ikinci həftəsini əhatə edən layihə çərçivəsində “Televiziya xəbərlərinin hazırlanması”, “Televiziya reportajları və canlı yayım”, “Xəbər istehsalı (yayıma hazırlıq)”, “Kamera qarşısında danışmaq” və “Müsahibə” modulları istiqamətində tədris prosesi təşkil olundu. Bu kimi proqramlar media sahəsində çalışanlar üçün çox əlamətdardır.
Azərbaycan indiyə qədər bir sıra media forumlarına ev sahibliyi edib. Noyabrın 21-də Bakıda "Dialoqun, əməkdaşlığın və regional həmrəyliyin təşviq edilməsi" mövzusunda D-8 Media Forumunun keçirilməsi də bu qəbildəndir. D-8-ə üzv dövlətlərin iştirakı ilə keçirilən forumun gedişində Medianın İnkişafı Agentliyinin İcraçı direktoru Əhməd İsmayılov deyib ki, Media Mükəmməllik Mərkəzi Azərbaycan Prezidentinin təşəbbüsü ilə yaradılıb: “Mərkəzin yaradılmasında məqsəd D-8 ölkələrindəki media subyektləri əməkdaşlarının arasındakı əlaqələrin genişləndirilməsi, həmin media subyektləri tərəfindən dezinformasiya və saxta xəbərlərlə mübarizə aparılması, eyni zamanda, media sahəsində ixtisasartırma, xəbərlərin hazırlanması prosesinin təşkili və layihələrin həyata keçirilməsidir”.
“Dialoqun, əməkdaşlığın və regional həmrəyliyin təşviq edilməsi" mövzusunda D-8 Media Forumuna üzv dövlətlər arasında media sahəsində birgə inkişaf və əməkdaşlıq ilə bağlı Bakı Bəyannaməsi imzalanıb.
Bəyannamənin mətnində yer alan bəzi məsələlərə diqqət yetirək:
“Biz - İnkişaf etməkdə olan səkkiz ölkənin İqtisadi Əməkdaşlıq Təşkilatının (D-8) üzvlərinin - Azərbaycan Respublikasının, Banqladeş Xalq Respublikasının, Misir Ərəb Respublikasının, İndoneziya Respublikasının, İran İslam Respublikasının, Malayziyanın, Nigeriya Federativ Respublikasının, Pakistan İslam Respublikasının və Türkiyə Respublikasının hökumətləri və media nümayəndələri 2025-ci il noyabrın 21-də "Dialoqun, əməkdaşlığın və regional həmrəyliyin təşviq edilməsi" mövzusunda keçirilən birinci D-8 Media Forumu üçün Azərbaycanın Bakı şəhərində görüşdük.
Biz D-8-in gücləndirilməsinə, onun daha dinamik, nüfuzlu iqtisadi blok kimi inkişaf etdirməyə yönəlmiş liderliyinə və dəyərli töhfələrinə görə Azərbaycan Respublikasının Prezidenti İlham Əliyevə dərin minnətdarlığımızı bildiririk.
Biz, həmçinin D-8-in bütün üzv dövlətlərinin, xüsusilə informasiya nazirliklərinin, milli media orqanlarının və media agentliklərinin Forumun işinə verdikləri fəal və dəyərli töhfələri yüksək qiymətləndiririk.
D-8-in prinsiplərini bir daha təsdiqləyərək və inkişaf edən qlobal media mühitində daha fəal əməkdaşlığın getdikcə artan əhəmiyyətini anlayaraq, aşağıdakıları bəyan edirik:
Qarşılıqlı anlaşmanı, regional həmrəyliyi və ortaq inkişaf məqsədlərini təşviq etmək üçün D-8-in üzv dövlətləri arasında media sahəsində əməkdaşlığı gücləndirməyə sadiqliyimizi bir daha vurğulayırıq.
D-8 Media Forumunun inklüzivliyi və ortaq məsuliyyəti təmin etmək üçün D-8 üzv dövlətləri tərəfindən təşkil olunan bir platforma kimi institutlaşdırılması təklifini qəbul edirik.
Bütün üzv dövlətlərin fəal iştirakı ilə təlim, tədqiqat, innovasiya, rəqəmsal bacarıqların inkişafı və əlaqələndirilmiş kommunikasiya təşəbbüsləri üçün Azərbaycan tərəfindən təşkil olunacaq D-8 Media Mükəmməlliyi Mərkəzinin ən tez zamanda fəaliyyətə başlamasına çağırış edirik.
D-8-in üzv dövlətlərdə institusional və insan resursları imkanlarını gücləndirmək üçün D-8 Media Mükəmməlliyi Mərkəzi vasitəsilə strukturlaşdırılmış potensialın artırılması proqramları, seminarlar və peşəkar mübadilələrin inkişaf etdirilməsi.
İnformasiya mübadiləsini möhkəmləndirmək, strategiyaları uyğunlaşdırmaq və birgə məzmunla bağlı təşəbbüsləri dəstəkləmək üçün milli media orqanları, xəbər agentlikləri və ictimai yayımçılar arasında əməkdaşlığın gücləndirilməsi...”- kimi və başqa məsələlər bəyanatda qeyd olunur.
Belə bir mötəbər tədbirin Azərbaycanın evsahibliyi ilə keçirilməsi dövlətimizin, aidiyyəti dövlət qurumlarının bu sahəyə verdiyi əhəmiyyətli töhfələrin nəticəsidir.
Onu da bildirək ki, Azərbaycan Prezidenti İlham Əliyev noyabrın 21-dəkeçirilən “Dialoqun, əməkdaşlığın və regional həmrəyliyin təşviq edilməsi” mövzusunda D-8 Media Forumunun iştirakçılarına ünvanladığı müraciətində bu Forumun Azərbaycanın təşəbbüsü ilə birinci dəfə Bakı şəhərində keçirilməsi mühüm hadisə kimi qiymətləndirib. Prezident İlham Əliyevin müraciətində bildirilib: “...Müasir dünyada informasiya adi xəbər olmaqla məhdudlaşmır, beynəlxalq münasibətlərin, ictimai rəyin və iqtisadi inkişafın əsas hərəkətverici qüvvəsinə çevrilərək xalqlar arasında etimadın və anlayışın formalaşmasında mühüm rol oynayır.
Hazırda media mühiti sürətli transformasiyaya məruz qalır. Təəssüflər olsun ki, qlobal informasiya məkanında dezinformasiya, saxta xəbərlər, hibrid təhdidlər, “deepfake”lər, süni intellektin imkanlarından sui-istifadə və digər manipulyasiya halları dayanmadan artmaqdadır. Bu amillər ölkələrin imicinə, daxili həyatına ciddi təsir göstərməklə yanaşı, bütövlükdə beynəlxalq sabitliyə zərbə vurur və ölkələr arasında etimadı sarsıdır. Bu səbəbdən D-8 Media Forumunun əsas vəzifələrindən biri – doğru, qərəzsiz, obyektiv və məsuliyyətli informasiya mühitinin qurulması üçün üzv ölkələrin media qurumları arasında etibarlı əməkdaşlığın formalaşdırılmasıdır.
Azərbaycan media sahəsində bir sıra mötəbər beynəlxalq tədbirlərə ev sahibliyi edir, bu istiqamətdə daim mühüm təşəbbüslərlə çıxış edir. Biz milli media strategiyamızı beynəlxalq təcrübə ilə uzlaşdıraraq, jurnalistlərin peşəkarlığının artırılmasına, faktlara əsaslanan xəbərlərin yayılmasına və media savadlılığının inkişafına xüsusi diqqət yetiririk. Eyni zamanda, biz regional əməkdaşlıq vasitəsilə ortaq informasiya platformalarının yaradılmasını dəstəkləyirik”.
Prezident Əliyev bəyan edib ki, bugünkü Forum dost ölkələrin media qurumları arasında qarşılıqlı təcrübə mübadiləsi üçün əlverişli imkanlar yaradan yeni əməkdaşlıq müstəvisidir: “İnanıram ki, burada səslənəcək ideyalar, təkliflər və irəli sürüləcək birgə layihə təşəbbüsləri gələcəkdə D-8 ölkələrinin informasiya siyasətində mühüm rol oynayacaqdır.
D-8 Media Forumunun xalqlarımız arasında əməkdaşlıq, qarşılıqlı etimad və həmrəyliyin möhkəmlənməsinə, informasiya təhlükəsizliyinin təmin olunmasına mühüm töhfə verəcəyinə ümidvar olduğumu bildirir, forumun işinə uğurlar diləyirəm”.
Prezident İlham Əliyev açıq şəkildə bəyan edib ki, D-8 Media Forumunun əsas vəzifələrindən biri – doğru, qərəzsiz, obyektiv və məsuliyyətli informasiya mühitinin qurulması üçün üzv ölkələrin media qurumları arasında etibarlı əməkdaşlığın formalaşdırılmasıdır. Azərbaycan bu istiqamətdə fasiləsiz olaraq çalışır və bu vacib sahəyə gərəkli töhfələrini verir.
İnformasiya sahəsində dezinformasiya, zərərli, saxta məlumatların yayılması kimi ciddi problemlərin geniş miqyas alması dünyanı narahat edir. Azərbaycan da dünyanın bir parçası olaraq bu zərərli tendensiyalarla mübarizə istiqamətində ciddi işlər həyata keçirir. Əlbəttə, bu kimi halların qarşısınıbir ölkə təkbaşına ala bilməz, bunun üçün birgə mübarizə platforması ortaya qoyulmalıdır. Azərbaycan və onun dostları informasiya təhlükəsizliyini təhdid edən hallara qarşı səylərini birləşdirir və onunla mübarizə yollarını Prezident İlham Əliyev açıq şəkildə göstərir-doğru, qərəzsiz, obyektiv informasiya mühitinin qurulması...Buna bütün ölkələrin media subyektləri riyaət edərsə saxta informasiyalara qarşı mübarizə yüksək nəticələr verər.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
Media azadlığı informasiya təhlükəsizliyindən ayrılmazdır - Prezident yeni istiqamət göstərdi...
