Elşad Həsənov: “Venediktov müsahibəsində rus şovinizminə söykənərək mövqe sərgiləyib”
“Exo Moskvı” radiosunun keçmiş baş redaktoru Aleksey Venediktov İrəvanda “CivilNet” kanalına müsahibəsində Ermənistanla Azərbaycan arasında müharibənin bitmədiyini, Kremlin hazırda Azərbaycan “əsirliyində” olan Ruben Vardanyanı unutmadığını, sadəcə Ukraynadakı müharibədə resursların itirilməsinə görə Moskvanın indi müdaxilə edə bilmədiyini bildirib.
O, erməni jurnalistə deyib ki, “Əgər Qarabağ müharibəsinin bitdiyini hesab edirsinizsə, səhv edirsiniz. Rusiya üçün Qarabağ məsələsi bitməyib. Moskva hər zaman erməniləri (azərbaycanlılara nisbətən) daha yaxın hesab edib”.
Rusiyanın “demokratik” jurnalist hesab ediləni belə deyirsə, gör indi digərləri nə düşünür. Sanki Rusiya Venediktov vasitəsilə mesaj verir ki, onlar üçün Qarabağ məsələsi bitməyib.
“Rusiyadakı bəzi dairələr Qarabağla bağlı yeni reallıqları həzm etməsələr də, bu nəyisə dəyişməyəcək”
Sözügedən məsələni “Bakı-Xəbər”ə şərh edən siyasi ekspert Elşad Həsənovun fikrincə, Venediktov müsahibəsində rus şovinizminə söykənərək mövqe sərgiləyib: “Baxmayaraq ki, Venediktov milliyətcə yəhudidir, amma o, Moskvada yaşayıb böyüyüb və orada çalışıb. Bütövlükdə, o, rus təfəkkürü ilə məsələlərə yanaşır. Məgər təkcə Venediktov belə düşünür, Qarabağ məsələsinə yanaşır? Xeyr. Rusiyada çox adamlar, siyasi liderlər belə bənzər mövqedən çıxış edirlər. Yəni Venediktov kimi düşünürlər. Onlar da həm Azərbaycana, həm Ermənistana təsir rıçaqını itirdiklərinə görə təəssüflənirlər. Ona görə də hesab edirəm ki, Azərbaycan çox önəmli bir zamanda bu məsələni əl etdi. Ərazi bütövlüyünü və suverenliyini tam bərqərar etdi. Bu da Prezident İlham Əliyevin yüksək siyasi və diplomatik qabiliyyətindən irəli gəldi. Lazım olan anda lazımı yerdə lazımı işləri gördü və məsələni həll etdi. Çünki Rusiyanın başı Ukrayna müharibəsinə qarışmışdı. Düzdür, 44 günlük Vətən müharibəsi başlayanda Rusiya-Ukrayna müharibəsi başlamamışdı. 44 günlük müharibədən 1 il 3 ay sonra Rusiya-Ukrayna müharibəsi başladı. Ancaq məsələ ondadır ki, Rusiyanın öz diqqətini, bütün resurslarını Ukraynaya yönəltməsi bizim işimizə yaradı. Qarabağda rus sülhməramlıları olsa da, 2022-ci il ərzində Azərbaycan ordusu Qarabağda vacib strateji əhəmiyyətli yüksəklikləri nəzarətə götürdü. Bütün bunlar 2023-cü ilin aprelində Laçında sərhəd keçidi qurmağımıza, sentyabrda Qarabağda antiterror əməliyyatı keçirməyimizə şərait yaratdı. Nəticədə suverenliyimiz tam bərqərar edildi. Venediktov iddia edir ki, guya Ukraynada müharibə bitəndən sonra Rusiya Qarabağ ermənilərinin qayıdış məsələsini qaldıracaq, Azərbaycanda təsir dairəsini bərpa edəcək və s. Bunların hamısı boş və əsassız gözləntilərdir. Ən azından ona görə ki, Azərbaycan 30 il əvvəlki zəif dövlət deyil. Azərbaycanın güclü ordusu olmaqla yanaşı, Türkiyə kimi strateji müttəfiqi var. Ona görə də Qarabağla bağlı xülyaların həyata keçəcəyi real deyil. Rusiya istəsə belə, Qarabağı tərk edən ermənilərin böyük hissəsi geri qayıtmayacaq. Bir sözlə, Rusiyadakı bəzi dairələr Qarabağla bağlı yeni reallıqları həzm etməsələr də, bu, nəyisə dəyişməyəcək. Vardanyana gəldikdə isə, o, törətdiklərinə görə cəzasını alacaq. Venediktovun məlum açıqlaması həm də təbliğat xarakterlidir. Onlar bununla istəyirlər ki, gələn il ölkədə keçiriləcək parlament seçkilərində Rusiyaya bağlı revanşist qüvvələr hakimiyyətə gəlsin. Məqsəd budur, amma bunu real hesab etmirəm. Ona görə ki, erməni cəmiyyətinin gözləntisi Avropa İttifaqıdır, bu qurumla əlaqələri genişləndirməkdir”.
Vidadi ORDAHALLI
