Elşən Manafov: “Konqresmenlərlə erməni lobbisi arasında maliyyə bağlılığı mövcuddur”
Senatorlar Ed Marki və Şeldon Uaythausun rəhbərlik etdiyi və Senatın Demokratlar Partiyasının lideri Çak Şumerin dəstəklədiyi iyirmi yeddi ABŞ senatoru ABŞ Dövlət katibi Marko Rubioya məktub göndərərək, onu Azərbaycan tərəfindən saxlanılan bütün erməni hərbi əsirlərinin və siyasi liderlərinin dərhal və qeyd-şərtsiz azad edilməsini tələb etməyə çağırıb.
Məktubda Tramp administrasiyası beynəlxalq müşahidəçilərin Bakıdakı məhkəmə proseslərinin buraxılmasını tələb etməyə və “insan haqlarının pozulmasında məsul olan” Azərbaycan rəsmilərinə qarşı "Qlobal Maqnitski sanksiyaları" tətbiq etməyə çağırılır.
Senatorlar Rubionu Azərbaycan hakimiyyəti ilə əlaqələrində üç konkret addım atmağa çağırırlar:
bütün erməni siyasi və hərbi əsirlərinin dərhal və qeyd-şərtsiz azad edilməsini tələb etmək;
Azərbaycandan beynəlxalq müşahidəçilərə və müstəqil mediaya erməni siyasi xadimlərinin məhkəmələrini izləməyə icazə verməsini tələb etmək;
Və ermənilərə qarşı insan haqlarının pozulmasında məsul olan Azərbaycan rəsmilərinə Qlobal Maqnitski Aktı çərçivəsində sanksiyalar tətbiq etmək.
Göründüyü kimi, erməni lobbisi, hər zaman olduğu kimi, bu dəfə də bir sıra senatorları satın alıb. Bunun nəticəsidir ki, Senatın az qala yarısından çoxu belə sərsəm tələblə çıxış edir.
“Senatorların bu müraciəti Tramp iqtidarının Azərbaycanla münasibətlərinə ciddi təsir göstərməyəcək”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafov hesab edir ki, ABŞ konqresində Ed Marki başda olmaqla, əsasən demokrat konqresmenlərdən ibarət 27 senatorun Tramp administrasiyasına Azərbaycana qarşı Maqnitski sanksiyalarının tətbiqi ilə bağlı müraciətinin arxasında ABŞ-dakı erməni lobbi təşkilatlarının sifarişi durur: “Heç kəsə sirr deyil ki, konqresmenlərlə erməni lobbisi arasında maliyyə bağlılığı mövcuddur. ABŞ-da uzun illərdir ki, Konqreslə iş birliyində olan erməni lobbi təşkilatları fəaliyyət göstərir. Onlardan biri də Ay Data (Erməni məsələsi) adı altında məşhur olan və əsasən ABŞ-ın iri ranqlı məmurlarını satın almaqla məşğul olan məlum təşkilatdır. 2013-cü ildən bəri onun sədri olan Nora Ovsesyan bu müddət ərzində ABŞ Konqresində və Senatında Türkiyə, Azərbaycana qarşı dinləmələrin keçirilməsinə nail olub. Bu zaman Ermənistan Konqresindən maliyyə dəstəyinin alınmasına nail olub. Senator Ed Marki Konqresdə uzun müddət fəaliyyət göstərən nüfuzlu senatorlardan biridir. Hətta zamanında ABŞ-ın Vyetnamda apardığı müharibəyə qarşı çıxış edib. Onun dayandırılmasını tələb edən senatorlardan biri olub. Demokrat Con Kerri (o ABŞ-da prezident seçkilərində Demokratları təmsil edib) ABŞ dövlət katibi təyin olunduqdan sonra Ed Marki Konqresdə məhz onun yerini tutub. Ay Datanın onunla iş birlinin qurulmasında da ermənipərəst mövqeyi ilə tanınan Kerrinin rolu olub. Məlum təşkilat hələ prezident Obamanın vaxtında da Konresdə lobbiçilik münasibətlərində olan senatorların dəstəyi ilə Azərbaycana qarşı sanksiyaların tətbiq olunması cəhdlərində iştirak edib. Fikrimizcə, senatorların bu müraciəti Tramp iqtidarının Azərbaycanla münasibətlərinə ciddi təsir göstərməyəcək. Əvvəla, senatorların Konqres və prezidentə ünvanlanmış müraciətindəki faktlar gerçəkliklərdən uzaqdır və rəsmi Bakının Qarabağdakı erməni separatçılığının rəhbərlərinə qarşı məhkəmədə qaldırdığı iddialar ölkə və beynəlxalq qanunvericiliyə söykənir. Bu şəxslər Azərbaycan dövləti, onun ərazi bütövlüyünə qarşı, azərbaycanlılara qarşı etnik təmizləmə siyasətində, insan hüquq və azadlıqlarının pozulmasında, terror və separatizm kimi cinayətlərdə və s ittiham olunurlar. Digər tərəfdən, məhz Tramp komandasının vasitəçiliyi və səyləri nəticəsində Cənubi Qafqazda sabitlik və təhlükəsizliyin bərqərar olmasına, nəqliyyat və kommunikasiya xətlərinin perspektivdə açılmasına töhfə verə biləcək Vaşinqton razılaşmaları əldə edilib. Bütün bunların kontekstində rəsmi Vaşinqtonun bölgədə öz maraqlarının ziddinə olacaq addımlar atmayacağı şəksizdir”.
Vidadi ORDAHALLI
