Bəhruz Quliyev: “Əliyevin şəxsən dəvət olunması onun sülhyaratma təcrübəsinə olan ehtiyacın göstəricisidir”
Qəzza planını masaya qoyan ABŞ Prezidenti Donald Tramp tərəfindən Prezident İlham Əliyevin Sammitə şəxsən dəvət olunması Azərbaycanın qlobal siyasətdə özünəməxsus yer tutduğunu bir daha təsdiqləməklə yanaşı, həm də İlham Əliyevin sülhyaratma təcrübəsindən istifadə olunmaq istəyinin göstəricisi sayıla bilər.
Məsələ ondadır ki, təkcə oktyabr ayının statistikasına baxsaq görərik ki, Prezident Əliyev 4 fərqli coğrafiyada 4 sammitdə iştirak edib, ortaya mövqe qoyub, diqqət mərkəzində olub: 1-2 oktyabrda Kopenhagendə Avropa Siyasi Birliyinin Sammiti; 6-7 oktyabrda Qəbələdə Türk Dövlətləri Təşkilatının Sammiti; 9-10 oktyabrda Düşənbədə MDB Sammiti; nəhayət, 13 oktyabrda Şərm əş-Şeyx Zirvəsi.
Bütün bunlar Azərbaycan kimi ərazisi elə də böyük olmayan ölkə üçün nə deməkdir?
“Bütün bunlar Azərbaycanın son illər ərzində qlobal siyasətin etibarlı tərəfdaşına çevrildiyinin rəsmi etirafıdır”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyevin fikrincə, Prezident Əliyevin Sammitə dəvət olunması bir çox məqamlarda Azərbaycanın beynəlxalq müstəvidə qazandığı nüfuzun, etimadın və liderlik keyfiyyətlərinin bariz göstəricisidir: “Bu, təkcə diplomatik jest deyil, eyni zamanda, İlham Əliyevin şəxsi liderlik keyfiyyətlərinin də göstəricisi, həm də sözsüz ki, Azərbaycanın son illər ərzində qlobal siyasətin etibarlı tərəfdaşına çevrildiyinin rəsmi etirafıdır. Əvvəla, Qəzza planı kimi mürəkkəb və ziddiyyətli bir məsələnin müzakirə edildiyi beynəlxalq platformaya Prezident İlham Əliyevin şəxsən dəvət olunması onun sülhyaratma təcrübəsinə olan ehtiyacın göstəricisidir. Çünki Azərbaycan bu gün təkcə regional deyil, həm də qlobal miqyasda sülh, sabitlik və əməkdaşlıq modelini praktik şəkildə sübut etmiş bir dövlətdir. Xatırladaq ki, Prezident İlham Əliyev son bir ayda dörd fərqli coğrafiyada, yəni Kopenhagendə Avropa Siyasi Birliyinin Sammitində, Qəbələdə Türk Dövlətləri Təşkilatının Zirvəsində, Düşənbədə MDB Sammitində və nəhayət, Şərm əş-Şeyxdə Yaxın Şərq Sülh Toplantısında iştirak etməklə, faktiki olaraq, Azərbaycanın diplomatik fəallığının miqyasını göstərir. Belə ki, son günlərdə Prezident İlham Əliyev genişmiqyaslı əməkdaşlıq formatının ən gözəl nümunəsini praktik olaraq ABŞ, Avropa Birliyi, Asiya, MDB zirvələrində keçirdiyi görüşlərlə ortaya qoymuş oldu. Bu, həm də sözün əsl mənasında İlham Əliyevin formalaşdırdığı çoxşaxəli, balanslı, milli maraqlara xidmət edən və prinsipial xarici siyasətin nəticəsidir. Azərbaycanın Yaxın Şərq problemində oynaya biləcəyi rol konkret və realdır. İlk növbədə, Azərbaycan müharibədən qalib çıxmış, ərazi bütövlüyünü bərpa etmiş bir dövlət kimi sülhün bərqərar olmasının mümkünlüyünü praktik nümunə ilə sübut edib. Eyni zamanda, Bakı bu gün həm İslam dünyasının, həm də Qərb institutlarının etimad göstərdiyi nadir paytaxtlardan biridir. Bu isə onu vasitəçi, dialoq təşəbbüskarı və etimad körpüsü roluna daha da yaxınlaşdırır. Sammit çərçivəsində Prezident İlham Əliyevin həm Yaxın Şərq liderləri, həm də Qərb nümayəndələri ilə keçirəcəyi görüşlərdə əsas mesaj Azərbaycanın prinsipial, milli marağa söykənən mövqeyidir. Azərbaycan daima sülhün tərəfdarı kimi, regionda və dünyada gərginliyin azaldılması, humanitar fəlakətlərin qarşısının alınması istiqamətində konkret təşəbbüslər irəli sürür. Hesab edirəm ki, Prezident İlham Əliyevin Yaxın Şərq Sammitində iştirakı həm Azərbaycanın beynəlxalq nüfuzunun təzahürüdür, həm də yeni geosiyasi mərhələdə ölkəmizin “sülh ixrac edən dövlət” statusunu daha da möhkəmləndirir. Azərbaycan artıq qlobal proseslərin kənarında deyil, tam onun mərkəzindədir”.
Vidadi ORDAHALLI
