Arzuxan Əlizadə: “Bu, müstəqil və rasional siyasət yeritməsindən irəli gəlir”
Məlum olduğu kimi, 27 yanvar 2023-cü ildə Azərbaycanın İranda yerləşən səfirliyinə edilən terror hücumundan sonra iki ölkə münasibətləri çox kəskinləşdi. Sözügedən məsələdə Azərbaycanın mövqeyi, tutduğu yol aydın idi.
Bu ondan ibarət idi ki, törədilən terror aktı obyektiv araşdırılsın, əsl motivi ortaya qoyulsun. Yəni cinayətkar kimlə əlbir olub, terror tapşırığını kimdən alıb, bütün bunlar aydınlaşsın, ondan sonra iki ölkə arasında münasibətləri bərpa edək. Uzun müddət, yəni 1 ilə yaxın proses belə getdi. Ondan sonra İran tərəfi münasibətlərin nizamlanması ilə bağlı müəyyən addımlar atdı. Ən nəhayət, səfirliyimizə basqın edən, oranın əməkdaşını qətlə yetirən terrorçunun edamına qərar verildi. Bir sözlə, bu məsələdə Azərbaycanın əvvəldən axıra qədər prinsipləri aydın idi və sona qədər dəyişmədi. Məsələ ondadır ki, iki ölkə arasında münasibətlər düzəlsə də, yenə Azərbaycan öz mövqeyinə sadiq və prinsiplərini ardıcıl olaraq həyata keçirən tərəf kimi tanındı.
İkincisi, ötən il dekabrın 25-də mülki təyyarəmizin vurulmasından sonra Azərbaycan-Rusiya münasibətləri pisləşdi. Bu məsələdə də Azərbaycanın mövqeyi prinsipial idi. Ardıcıl şəkildə mövqeyini əsaslandıraraq Düşənbə görüşünə qədər yol qət etdi. Nəhayət Düşənbə görüşündə Rusiya prezidenti Vladimir Putin araşdırma nəticəsində üzr istədi. Beləcə, iki ölkə arasında münasibətlər düzəldi. Burada yenə də Azərbaycan öz prinsipləri çərçivəsində sona qədər inamla və düzxətli hərəkət edən tərəf oldu. Hər iki situasiyada Azərbaycanın üstünlüyünü təmin edən onun dövlətlərarası münasibətlərdə sabit prinsiplərdən çıxış etməsidir. Yəni prinsiplər sabit və dəyişməz olduğu üçün Azərbaycan pis vəziyyətdə qalmır.
“İran və Rusiya ilə yaşanan gərginliyin yoluna qoyulmasında prinsipial siyasət həlledici rol oynadı”
Sözügedən məsələni “Bakı-Xəbər”ə şərh edən AMİP sədri, millət vəkili Arzuxan Əlizadə hesab edir ki, bütün bunlar Azərbaycanın müstəqil və rasional siyasət yeritməsindən irəli gəlir: “Əvvəla, Azərbaycan bütün qonşu dövlətlərlə mehriban münasibətlərin qurulmasında maraqlı olub. Ölkəmiz 1991-ci ildə müstəqilliyini bərpa edəndən sonra bu prinsiplərə üstünlük verib. Azərbaycanda hansısa dövlətin hərbi bazası mövcud deyil. Dəfələrlə müxtəlif böyük dövlətlər Azərbaycandan qonşu dövlətlərə qarşı plasdarm kimi istifadə etməyə cəhd ediblər, amma birmənalı olaraq yox cavabı alıblar. Bu elə dövr idi ki, biz hələ indiki kimi güclü dövlət deyildik, ərazilərimizin 20 faizi işğal altında idi, ölkədə bir sıra sosial problemlər var idi və s. Ancaq bütün bunlara baxmayaraq, Azərbaycan öz yolu ilə getdi, hansısa siyasi oyunlara alət olmadı. Bütün bunların nəticəsi idi ki, ərazi bütövlüyümüzü və suverenliyimizi tam təmin etdik. Avropanın enerji təminatına töhfə verdik. İran və Rusiya ilə yaşanan gərginliyin yoluna qoyulmasında prinsipial siyasət həlledici rol oynadı. Ona görə ki, hər şey ortada idi. Hər iki dövlət Azərbaycandan dəfələrlə böyük olsa da, uzun sərhədlərə malik olsa da, bu nəyisə dəyişmirdi. Hər iki halda haqlı olan tərəf Azərbaycan idi. Ona görə də gec də olsa ədalət zəfər çaldı. Heç şübhəsiz, burada təmkinli və incə siyasətin rolu böyükdür. Azərbaycanın prinsipial və rasional siyasət yeritməsinin digər regional ölkələr üçün də bir nümunə olduğunu düşünürəm. Çünki özünə hörmət edən ölkə bu prinsiplərdən çıxış etməlidir”.
Vidadi ORDAHALLI
