Tural İsmayılov: “İslamabaddakı görüş bir “parlament toplantısı” deyil, üç qardaş dövlətin strateji həmrəyliyinin manifestidir”
Məlum olduğu kimi, oktyabrın 13-də Pakistanın paytaxtı İslamabad şəhərində Azərbaycan-Pakistan-Türkiyə Parlament Sədrlərinin Üçüncü Üçtərəfli Görüşü keçirilib. Tədbirdə Milli Məclisin sədri Sahibə Qafarova, Pakistan İslam Respublikası Milli Assambleyasının sədri Sərdar Ayaz Sadiq və Türkiyə Böyük Millət Məclisinin sədri Numan Kurtulmuş iştirak edib.
Parlament sədrləri ölkələrimiz və parlamentlərimiz arasında yüksək səviyyəli qardaşlıq münasibətlərinin əhəmiyyətini vurğulayaraq, bu görüşün də üçtərəfli parlament əməkdaşlığı üzrə qarşıya qoyulan məqsəd və hədəflərə çatmağımıza güclü təkan verəcəyinə inam ifadə ediblər.
Maraqlıdır, Azərbaycan-Pakistan-Türkiyə parlament sədrlərinin görüşünün nə kimi əhəmiyyəti var? Ümumiyyətlə, bu görüş beynəlxalq ictimaiyyətə nə kimi mesajlar verir?
“Azərbaycan–Pakistan–Türkiyə üçlüyünün vahid siyasi mesaj verməsi regional balans üçün önəmli siqnaldır”
Siyasi şərhçi Tural İsmayılov “Bakı-Xəbər”ə açıqlamasında qeyd etdi ki, Azərbaycan, Pakistan və Türkiyə parlament sədrlərinin İslamabadda keçirilən üçtərəfli görüşü sıradan bir diplomatik təmas deyil, bu, geosiyasi məntiqi olan, dərin strateji mesaj daşıyan bir hadisədir: “Əvvəla bu format, yəni parlament sədrləri səviyyəsində üçtərəfli mexanizm - dövlətlərarası münasibətlərin yalnız hökumətlər səviyyəsində deyil, həm də qanunverici institutlar vasitəsilə möhkəmləndirildiyini göstərir. Bu, münasibətlərin “emosional qardaşlıqdan” çıxaraq institusional həmrəyliyə çevrildiyini sübut edir. İkincisi, görüş müxtəlif qlobal bloklaşmaların və təzyiqlərin artdığı bir dövrdə baş tutur. Belə şəraitdə Azərbaycan–Pakistan–Türkiyə üçlüyünün vahid siyasi mesaj verməsi regional balans üçün önəmli siqnaldır. Bu, xüsusilə də İslam həmrəyliyi, regional təhlükəsizlik və müdafiə əməkdaşlığı baxımından ön plana çıxır. Üçüncüsü, bu görüş beynəlxalq ictimaiyyətə açıq mesaj verir. Azərbaycan, Türkiyə və Pakistan artıq yalnız dost və qardaş ölkələr deyil, həm də birgə qərarvermə mədəniyyəti formalaşdıran güc mərkəzidirlər. Bu format həm Qafqazda, həm Mərkəzi Asiyada, həm də Cənubi Asiyada yeni strateji xəritənin yaranmasına işarədir”.
Həmsöhbətimiz hesab edir ki, bu görüş Bakı üçün həm diplomatik, həm də siyasi baxımdan ciddi dividend daşıyır. Azərbaycan bu platforma vasitəsilə regional sabitliyin mərkəzində olduğunu, həm İslam dünyasında, həm də türk coğrafiyasında lider mövqeyə sahib olduğunu bir daha nümayiş etdirdi: “Qısası, İslamabaddakı görüş bir “parlament toplantısı” deyil, üç qardaş dövlətin strateji həmrəyliyinin manifestidir”.
Günel CƏLİLOVA
