İrəvanda həbsə atılmış oliqarx Samvel Karapetyanın rəhbərlik etdiyi “Bizim yol” hərəkatının qurultayı keçirilib. Təşkilatın koordinatoru və onun liderinin qardaşı oğlu Narek Karapetyanın bildirdiyinə görə, son altı həftə ərzində onlara 5000 könüllü qoşulub. Onlar bu həftə liderlərinə dəstək aksiyası keçirməyi planlaşdırırlar.
Tərəfdarları qarşısında çıxış edən “Bizim yol” hərəkatının koordinatoru Narek Karapetyan əminliklə bəyan edib: “Əgər tərəfdarlarımız bu sürətlə böyüməyə davam etsələr, yaxın aylarda biz on minlərlə olacağıq və bu, geri dönməz dəyişikliklərə doğru böyük addımdır. Komandamız gəncdir və insanlar niyə bizə qoşulduqlarını bilirlər.Biz namusumuzu qoruyacağıq, xalqımızın ideyaları və proqramları ilə Ermənistanı nümunəvi ölkəyə çevirəcəyik”. Xatırladaq ki, Samvel Karapetyan 110 gündən artıqdır ki, həbsdədir. Onu dövlət çevrilişinə təhrik ittihamı ilə barmaqlıqlar arxasında 5 ilə qədər həbs gözləyir. İttihamlar oliqarxın Ermənistanın baş naziri Nikol Paşinyanın hücumlarından istənilən vasitə ilə Erməni Apostol Kilsəsini müdafiə edəcəyinə dair açıqlamasından irəli gəlir. Bu, son vaxtlar ilk belə hal deyil. Məsələn, oktyabrın 3-də arxiyepiskop Mikael Ajapaxyan dövlət çevrilişinə təhrik ittihamı ilə iki il müddətinə azadlıqdan məhrum edilib. Prokuror ona iki il yarım cəza istəsə də, məhkəmə yumşaqlıq nümayiş etdirib. Keşiş indi faktiki olaraq unudulub, lakin bir il əvvəl o, başqa bir arxiyepiskop, “Müqəddəs mübarizə” hərəkatının banisi Baqrat Qalstanyanın ən yaxın adamlarından biri idi. Onlar birlikdə bir neçə ay ərzində İrəvanda minlərlə insandan ibarət etiraz yürüşlərinə rəhbərlik edərək, Paşinyanı Dəccal və türk agenti adlandırıblar. Qalstanyanın məhkəməsi davam edir; onu 15 ilə qədər həbs gözləyir. Samvel Karapetyan həbsxanadan öz hərəkatının üzvlərinə müraciət edib: “Bizim yol” hərəkatı ictimaiyyətin diqqət mərkəzində yer alıb və ölkənin siyasi həyatında mühüm dəyişikliklərə səbəb olub. Bu, sizin və bizim hamımızın nailiyyətinizdir və bu, bütün erməni xalqının nailiyyəti olmalıdır. Mən minlərlə ləyaqətli insanın bizim hərəkatımıza qoşulmasını şərəf hesab edirəm və bilirəm ki, onun həqiqi milli hərəkata çevrilmək potensialı var, biz bundan sonra da Ermənistanın bu hərəkatını dayandırmayacağıq. Firavan və xoşbəxt ölkə üçün biz öz yolumuzla edavam dəcəyik”. Bu arada onun qardaşı oğlu elan edib ki, “Bizim yol” baş nazirliyə öz namizədinin adını çəkməyə hazırlaşır və o, bütün ermənilərin ümidlərini doğruldacaq. Lakin hərəkat ilk növbədə özünü siyasi partiyaya çevirməlidir. Bunun yanvar ayında baş verəcəyi gözlənilir. Üstəlik, “Bizim yol”un liderləri keçmiş prezidentlər Robert Köçəryan və Serj Sarkisyanın “Hayastan” və “Şərəfim var” blokları ilə müttəfiqlik etməyəcəklərinə söz verirlər, çünki Ermənistanın hakim elitasında nəsil dəyişikliyinə ehtiyac var. Bununla belə, bir xəbərdarlıq var. Narek Karapetyan bildirib: “Biz Köçəryan və Sarkisyanla seçkiqabağı heç bir ittifaqa girməyəcəyimizi bəyan etdik, lakin bu qüvvələrin nümayəndələri ilə əməkdaşlıq etməyəcəyimizi deməmişik”.
Bu arada, Nobel mükafatlı iqtisadçı Daron Açemoğlu da hərəkata məsləhətçi kimi qoşulub. Türkiyədə anadan olan, lakin hazırda ABŞ-da yaşayan o, Ermənistanın çiçəklənməsini təmin etmək üçün süni intellektin inkişafına diqqət yetirməyi təklif edir: “Ermənistanın çətinlikləri onun coğrafi mövqeyindən qaynaqlanır. Bu halda rəqəmsal texnologiyalara əsaslanan xidmət iqtisadiyyatı Ermənistana üstünlük verir... Süni intellekt Ermənistanın iqtisadi tərəqqisinin hərəkətverici qüvvəsinə çevrilə bilər”. Eyni zamanda, onun sözlərinə görə, Ermənistanı xarici investisiyalar üçün daha cəlbedici etmək baxımından mülkiyyət hüquqlarına hörmət etmək vacibdir. Bu baxımdan o, Paşinyan hökumətinin Karapetyanın “Ermənistanın Elektrik Şəbəkələri”ni milliləşdirməsindən narazı qalıb. Qeyd edək ki, “məxməri inqilab”dan dərhal sonra Paşinyanın komandası Acemoğlunu əməkdaşlığa dəvət edib. Şayiələrə görə, iqtisadçı razılaşıb, lakin göstərdiyi xidmətlərə görə 300 min dollar istəyib, İrəvan bunu ağlabatan qiymət hesab etməyib. Digər versiyaya görə, Paşinyan Acemoğlunun təkliflərinin respublikaya aidiyyatı olmadığını bildirib. Ekspertlər qeyd edir ki, hazırda “Bizim yol” hərəkatı ilk növbədə “Hayastan” və “Şərəfim var” seçicilərinə müraciət edir, onların tərəfdarlarını şirnikləndirir. Karapetyanın təşkilatı başqa fikirli insanlarla praktiki olaraq heç bir iş görməyib, o cümlədən heç bir reklam kampaniyası aparmayıb. İrəvanlılar hətta zarafat edirlər ki, elan olunan 5 min könüllü Karapetyanın biznes imperiyasının işçiləridir. Köçəryan və Sarkisyan komandalarını bəyənməyənlər respublika daxilindəki yarımkriminal dairələrə və Moskvanın qeyri-rəsmi dəstəyinə arxalanaraq “Bizim yol”u Paşinyana qeyri-adekvat alternativ hesab edirlər. Bununla belə, hətta belə bir strategiya oliqarxa 2026-cı il iyunun əvvəlinə təyin edilmiş növbəti parlament seçkilərində səslərin 20%-ə qədərini qazandıra bilər. Və bu, indiki hakim “Vətəndaş müqaviləsi” partiyasının seçkilərə qədər öz populyarlığını qoruyub saxlaması halında olacaq. Digər məsələ ondan ibarətdir ki, növbəti qanunvericilik məclisində başqa müxalifət partiyası ümumiyyətlə olmaya bilər.
Nahid SALAYEV
