Azər Həsrət: “Paşinyanın təbriki nəzakət xarakterli idi, amma əlbəttə ki, orada həqiqət payı da az deyil”
Ermənistan Azərbaycanla qarşılıqlı ticarəti qurmağa, həmçinin humanitar məsələlərin həlli də daxil olmaqla, iqtisadi, siyasi və mədəni əlaqələri inkişaf etdirməyə ümid edir. Bunu Ermənistan baş naziri Nikol Paşinyan Düşənbədə MDB Dövlət Başçıları Şurasının məhdud tərkibdə iclasında çıxış edərkən bildirib.
Onun sözlərinə görə, hazırda bu, çoxillik düşmənçilik tarixini nəzərə alsaq, asan bir vəzifə deyil: “Sülh prosesi (Bakı və İrəvan arasında) bizə inam verir ki, bu məsələlər tədricən həll olunacaq. Sülhün qurulması münasibətilə təkcə Ermənistanı və Azərbaycanı deyil, həm də MDB-nin bütün iştirakçı dövlətlərini təbrik etmək istəyirəm, çünki bilirəm ki, siz hamınız bunun baş verməsini çox istəyirdiniz və bu baş verdi. Sülh indi reallıqdır və mən bu hadisə ilə bağlı hamımızı təbrik edirəm və bütün bu müddət ərzində göstərilən dəstəyə görə MDB-dən olan həmkarlarıma minnətdarlığımı bildirirəm”.
Sözügedən məsələni baki-xeber.com-a şərh edən siyasi ekspert Azər Həsrət Paşinyanın yanaşmasını ümumən müsbət dəyərləndirir: “Əlbəttə, Ermənistan Azərbaycanla münasibətlərin normallaşmasında, o cümlədən, ticarətin bərpasında maraqlıdır. Yəni biz sülh müqaviləsi imzaladıqdan, hər iki dövlət sərhədləri açdıqdan sonra, iki tərəf arasında ünsiyyət olacaq. Təbii ki, Azərbaycan biznesi Ermənistanla maraqlanacaq, arzu edənlər gedib ora sərmayə yatıracaq, tikinti-quruculuq işləri ilə məşğul olacaq. Əlbəttə ki, Ermənistan da öz mallarını Azərbaycanda sata biləcək. Bir sözlə, biz də belə münasibətlərin tərəfdarıyıq. Ancaq sülhün əldə edilməsi ilə bağlı MDB üzvü olan dövlətlərə ünvanlanan ümumi təbrik sadəcə bir nəzakət təbrikidir. Çünki Paşinyan da yaxşı bilir ki, bu sülhün əngəllənməsində MDB-nin önünü çəkən Rusiya bir nömrəli problem olub həmişə. Rusiya faktiki olaraq sülhün əldə edilməsinə töhfə verməyib. Əksinə, sülhün gecikdirilməsinə, ümumiyyətlə, baş tutmamasına çalışıb. Bunu Ermənistan da yaxşı bilir, Azərbaycan da. Biz bunu nahaqdan misal çəkmirik ki, Rusiya sülhməramlıları Qarabağdan çıxdıqdan sonra Ermənistanla Azərbaycan arasında bir dəfədə olsun güllə səsi eşidilməyib. Bir əsgərin, bir şəxsin belə burnu qanamayıb. Tərəflər bir-birinə qarşı düşmən ritorikasından istifadə etməyib. Yəni Rusiya aradan çəkilib, biz faktiki olaraq sülhə yaxınlaşmışıq. Təbiidir ki, mövcud sülh sazişinin şərtləri artıq razılaşdırılıb. Ermənistan Konstitusiyasında Azərbaycana qarşı ərazi iddiası çıxarılandan sonra iki ölkə arasında sülh sazişi imzalanacaq. Bu baxımdan Paşinyanın MDB dövlətlərini təbrik etməsi nəzakət xarakterli idi. Ancaq əlbəttə ki, orada həqiqət payı da az deyil. Qardaş ölkələr olan Qazaxıstan, Qırğızıstan, Özbəkistan, Türkmənistan əlbəttə ki, Azərbaycanın haqlı davasının bu cür nəticələnməsini arzulayırdılar. Sülhə töhfə verməyə çalışırdılar. Daim də bunun üçün öz cəhdlərini əsirgəməyiblər. Eyni zamanda Belarus da bizim türk dövlətləri ilə birlikdə Azərbaycanın haqlı davasına töhfə verməyə çalışıb. Tacikistan da Azərbaycanla çox yaxın dost ölkədir. Bu baxımdan Paşinyanın təbriki Rusiya xaric digər MDB dövlətlərinə ünvanlanıb”.
Vidadi ORDAHALLI
