Mübariz Göyüşlü: “Azərbaycan Prezidenti növbəti dəfə qlobal bir problemlə bağlı bəşəriyyət üçün faydalı nəticə doğura biləcək təklif irəli sürüb”
Prezident İlham Əliyev “İtkin düşmüş şəxslər probleminin həlli üçün səylərin birləşdirilməsi və əməkdaşlığın genişləndirilməsi” mövzusunda beynəlxalq konfransın iştirakçılarına müraciətində bildirib ki, Azərbaycan dövləti itkin düşmüş şəxslər probleminə beynəlxalq birliyin diqqətinin artırılması üçün böyük səy göstərir.
Prezident Əliyev deyib: “Azərbaycan itkin düşmüş şəxslərlə bağlı BMT Baş Assambleyasında qətnamələrin qəbul edilməsi üzrə 2002-ci ildən təşəbbüslərlə çıxış etməklə, dövlətləri və beynəlxalq təşkilatları bu istiqamətdə lazımi tədbirlər görməyə təşviq edir. Zənnimcə, BMT bu sahədə səylərini daha da artırmalıdır”.
Əvvəllər də Prezident İlham Əliyev BMT-də itkin düşmüş şəxslər üzrə məruzəçi statusunun təsis edilməsi ilə bağlı təklif irəli sürüb. BMT-nin itkin düşmüş şəxslərin işi üzrə məruzəçi statusu təsis etməsi zərurətə çevrilib. Əlbəttə, belə bir status müəyyən edilərsə, bu, dünya üzrə itkin düşən insanların qaranlıq taleyi ilə bağlı geniş və ciddi araşdırma aparılmasına, xüsusi hesabat hazırlanmasına səbəb ola bilər.
Prezident Əliyevin müraciətində də əks olunduğu kimi, Birləşmiş Millətlər Təşkilatının məlumatlarında son iyirmi il ərzində itkin düşənlərin sayında 2024-cü ildə ən yüksək artım qeydə alınıb, həmin il münaqişə bölgələrində 57 minə yaxın insan itkin düşüb. Prezident bildirib ki, bu, silahlı münaqişələr dövründə beynəlxalq hüquq normalarına məhəl qoyulmamasının acı nəticəsidir. “Ermənistanın Azərbaycana qarşı təcavüzü ilə başlamış və 30 ildən artıq davam etmiş müharibənin doğurduğu humanitar faciələrdən biri də içərisində uşaqlar, qadınlar və ahılların olduğu 4000-dək azərbaycanlının itkin düşməsidir...” Bu fikirlər də ölkə başçısının müraciətində yer alıb.
Həm əvvəlki dövrdə Azərbaycan Prezidentinin irəli sürdüyü təklif, həm də BMT-ni bu istiqamətdə səylərini artırmağa çağırması BMT-nin itkin düşmüş şəxslər üzrə məruzəçi statusu təsis etməsini qaçılmaz edir, bunu zərurətə, tələbə çevirir.
“BMT də itkinlərin məsələsi üzrə məruzəçi statusunun təsis edilməsi təklifini gerçəkləşdirmək istiqamətində addımlar atmalıdır”
Cross Media Təhlil Mərkəzinin analitiki, siyasi şərhçi Mübariz Göyüşlü “Bakı-Xəbər”ə bildirdi ki, itkin düşmüş şəxslərlə bağlı beynəlxalq əməkdaşlıq məsələsi bu problemin həllinə çox böyük bir dəstək olardı. “Bu çox önəmli təklifdir və BMT-də bu mütləq şəkildə nəzərə alınmalı, müvafiq addımlar atılmalıdır”-deyən M.Göyüşlü bildirdi ki, Azərbaycanda həm dövlət, həm də ictimai səviyyədə Ermənistana çağırışlar edilir, iradlar bildirilir, itkinlərin taleyi ilə bağlı problem beynəlxalq gündəliyə gətirilir, amma arzuolunan nəticəni əldə etmək mümkün olmur. M.Göyüşlü sülh sazişinin paraflanması məsələsinə toxunaraq qeyd etdi ki, Ermənistan tərəfi itkinlər məsələsinin arxa plana keçdiyini, aradan qalxdığını, onlara heç kimin bu məsələdə hər hansı bir irad tutmayacağını düşünə bilər, amma bu belə deyil. “Ermənistan itkin düşən şəxslərlə bağlı Azərbaycan tərəfinə dolğun məlumat verməlidir, onların taleyinə aydınlıq gətirməli, bir dövlət olaraq bütün bunlara görə cavab verməlidir. Hesab edirəm ki, BMT də Azərbaycan Prezidentinin itkinlərin məsələsi üzrə məruzəçi statusunun təsis edilməsi təklifini gerçəkləşdirmək istiqamətində addımlar atmalıdır. Bu çox həssas məsələdir və bunun üçün BMT səviyyəsində əsaslı işlər görülməlidir. Bu tək Azərbaycanın problemi deyil, bütövlükdə qlobal problemdir. Buna yalnız Ermənistanın Azərbaycana qarşı etdiyi məsələ kimi baxmaq olmaz, buna insanlığa qarşı bir akt, bir hərəkət kimi yanaşmaq lazımdır. Bunu törədən - Ermənistan cavab verməlidir.
Azərbaycan Prezidenti növbəti dəfə qlobal bir problemlə bağlı bəşəriyyət üçün faydalı nəticə doğura biləcək təklif irəli sürüb”.
M.Göyüşlü vurğuladı ki, BMT-nin də, digər beynəlxalq təsisatların da, dövlətlərin də bu məsələyə diqqətlə, həssaslıqla yanaşması lazımdır. O hesab edir ki, bu məsələyə vahid qlobal yanaşma olarsa bəşəriyyət irəliləyiş və nəticə əldə etmiş olar.
İradə SARIYEVA
