Ilyas Hüseynov: “Mütəffiq ruhlu münasibətləri bərpa etmək üçün hələ çox tezdir”
Məlum olduğu kimi, Düşənbədə Azərbaycan Prezidenti İlham Əliyevlə rusiyalı həmkarı Vladimir Putin arasında görüş keçirilib. Görüş zamanı fikir mübadiləsi aparılıb.
Rusiya Prezidenti Vladimir Putin Prezident İlham Əliyevlə görüşündə Moskva ilə Bakı arasında münasibətlərin müttəfiqlik ruhunda davam edəcəyinə ümidvar olduğunu bildirib: “Ümid edirəm ki, bu əməkdaşlıq, sadəcə olaraq bərpa edilməyəcək, münasibətlərimizin ruhunda, müttəfiqliyimiz ruhunda davam edəcək. Biz bunu heç vaxt unutmuruq, bu yaxınlarda imzalanmış müqaviləni xatırlayırıq və onun bütün əsas müddəalarının həyata keçirilməsi üçün əlimizdən gələni edəcəyik".
Maraqlıdır, Rusiya başçısı Moskva ilə Bakı arasında münasibətlərin müttəfiqlik ruhunda davam edəcəyinə ümid ifadə etməklə nə demək istəyib?
“Rusiya prezidentinin Bakı ilə münasibətlərin müttəfiqlik ruhunda davam etdirilməsinə dair eyhamında 22 fevral 2022-ci il tarixində Azərbaycan və Rusiya arasında imzalanan mütəffiqlik, qarşılıqlı fəaliyyət haqqında bəyannamə nəzərdə tutulur”
Siyasi şərhçi İlyas Hüseynov “Bakı-Xəbər”ə şərhində bildirdi ki, Düşənbədə MDB dövlət başçılarının Zirvə toplantısı çərçivəsində ölkə başçısı İlham Əliyev və Rusiya prezidenti Vladimir Putin arasında görüşün baş tutması münasibətlərdə yaranan gərginliyi, soyuqluğu aradan qaldırmağa hesablanıb: “Hər iki liderin kameralar önündə dilə gətirdiyi fikirlər diqqət çəkir. Rusiya prezidentinin Bakı ilə münasibətlərin müttəfiqlik ruhunda davam etdirilməsinə dair eyhamında 22 fevral 2022-ci il tarixində Azərbaycan və Rusiya arasında imzalanan mütəffiqlik, qarşılıqlı fəaliyyət haqqında bəyannamə nəzərdə tutulur. Lakin son baş verən proseslərdə mütəffiqlik ruhuna uyğun davranışları görmürük. Ancaq hesab edirəm ki, məlum görüş müəyyən məsələlərim həllinə dəstək olacaq, Azərbaycanın tələblərinin yerinə yetirilməsinin şahidi olacağıq. Etiraf edək ki, məlum təyyarə qəzası ilə bağlı ümumi hadisələr konteksində istintaqın yekun rəyi üçün bir il zaman lazımdır. Bu görüş Azərbaycanın beynəlxalq məhkəmə və qurumlara müraciət etməklə bağlı düşüncələrini, fikirlərini aradan götürə bilər. Bunun üçün ölkəmizdən üzr istənilməli, kompensasiya ödənilməlidir. Eyni zamanda, bu hadisədə günahkar olan şəxslərin cəzalandırılması da önəmlidir. Rusiya dövlət başçısı, demək olar ki, Azərbaycanın tələblərini təsdiq etdiyini bəyan edib. İndi onların bu təsdiqi icra etməsini gözləmək lazımdır. Bu tələblərin yerinə yetirilməsi vacibdir. Hesab edirəm ki, hadisələr qeyd edilən formada davam edərsə müəyyən mənada münasibətləri bərpa etmək mümkündür. Ancaq mütəffiq ruhlu münasibətləri bərpa etmək üçün hələ çox tezdir”.
Günel CƏLİLOVA
