Ermənistanda “Qarabağ klanı”nın əsas təmsilçiləri kimi tanınan sabiq prezidentlər Robert Köçəryan və Serj Sarkisyan arasında yenidən kəskin qarşıdurma yaranıb. Buna səbəb Köçəryanın son mətbuat konfransında verdiyi açıqlamalardır. Qeyd edək ki, Köçəryan siyasi komandası ilə 2026-cı ildə keçiriləcək parlament seçkilərində iştirak etmək niyyətindədir.
Bu xüsusda Köçəryan deyib ki, təkcə özünün seçki kampaniyasında iştirakı kifayət deyil. O, ölkədə real dəyişikliklərə gətirə biləcək digər siyasi qüvvələrin də meydana çıxacağına ümid etdiyini söyləyib: “Mənim komandam seçkilərdə iştirak edəcək. Əgər partiya seçkidə iştirak edirsə, deməli, onun lideri də iştirak edir”. Xatırladaq ki, Ermənistanda növbəti parlament seçkiləri 2026-cı ilin iyununda keçiriləcək. Qalib gələn partiya baş nazirliyə namizəd irəli sürmək hüququ qazanacaq.məsələ ilə bağlı Robert Köçəryan qeyd edib ki, 8 aydan sonra keçiriləcək parlament seçkilərində parlamentə müxalifətdən iki qüvvə daxil ola biləcək: “Biri “Hayastan” bloku, digəri Samvel Karapetyanın yaratdığı partiyadır”. Üstəlik, Köçəryanın fikrincə, bu iki müxalif qüvvə parlamentdə Nikol Paşinyanın “Vətəndaş müqaviləsi”ndən daha çox səs toplamaq iddiasındadır: “Mən faizlərdən, heç nədən danışmaq istəmirəm, deyərdim ki, hamısı, ən azı, sosiologiyaya görə, bir az yuxarı, bir az aşağı olacaq. Bu gün müxalifətdə iki vahid qüvvə var ki, parlamentə girə bilər. “Vətəndaş müqaviləsi” partiyası kifayət qədər kiçik göstərici ilə onlardan irəlidədir. Lakin bu iki müxalif qüvvə birlikdə artıq “Vətəndaş müqaviləsi”ndən güclüdür. Bunlardan biri “Hayastan” bloku, digəri Samvel Karapetyanın yaratdığı partiyadır, üçüncüsü də olacaqmı, bilmirəm, amma çox istərdim”. İkinci prezidentin sözlərinə görə, bu gün Paşinyana qalib gəlmək şansı 2021-ci ilə nisbətən daha çoxdur, çünki əvvəlki seçkilərlə müqayisədə insanların əhval-ruhiyyəsi dəyişib, tamam başqa situasiyadır: “Mənim təəssüratım və bu gün mövcud olan sosiologiyaya görə, əgər səhv etməsək, Nikol Paşinyanın yenidən seçilməsi sıfıra yaxındır”. İddianı əsaslandırmağa çalışan Robert Köçəryan qeyd edir ki, Paşinyan 2021-ci il seçkiləri ilə bağlı verdiyi bütün vədləri puça çıxarıb və onun əvvəlki şüarları bu gün artıq işləməyəcək: “Belə olan halda baş nazir demokratiya vəd edib, amma keşişləri və Samvel Karapetyanı həbs etməklə daha demokratik dəyərlərdən danışa bilmir, sosial ədalət vəd edib, amma yoxsulluq göstəriciləri dəyişməyib. İndi xalqımız tam uğursuz insanı seçməyə hazırdırmı? Məncə, əhval-ruhiyyədə nəsə dəyişib. Və bu baxımdan, mən indi daha nikbinəm. 2021-ci ildə belə deyildi, o nikbinlik yox idi”. 2026-cı il seçkilərində ikinci prezident komandasının hansı formatda iştirak edəcəyinə gəlincə, Robert Köçəryan deyir ki, məsələ hələ həll olunmayıb, müzakirə də aparılmayıb. Formatla bağlı qərarlar yanvar-fevral aylarında veriləcək və Köçəryan seçkiqabağı proseslərə daha tez girməyi düzgün hesab etmir: “Siyahıya kimin başçılıq edəcəyi sosiologiyaya görə kimin daha yaxşı şansa sahib olacağından asılıdır”.
Köçəryanın açıqlamaları Serj Sarkisyanın rəhbərlik etdiyi Respublikaçılar Partiyası tərəfindən xoş qarşılanmayıb. İlk növbədə o baxımdan ki, Köçəryan faktiki olaraq, Sarkisyanın partiyasının zəif olduğuna eyham vurub. Respublikaçılar Partiyasının parlament fraksiyasının rəhbəri Hayk Mamicanyan məsələ ilə bağlı bildirib: “İkinci prezident Robert Köçəryanın müxalifət qüvvələri arasından yalnız onun rəhbərlik etdiyi “Hayastan” blokunun və həbsdə olan milyarder iş adamı Samvel Karapetyanın formalaşmaqda olan qüvvələrinin parlamentə düşmək şansının olduğunu iddia edərkən Respublikaçılar Partiyasının adını çəkməməsinə təəccüblənmirik. Çünki Köçəryanın Respublikaçılar Partiyası ilə bağlı təşviqat kampaniyasına başlaması təəccüblü olardı”. Mamicanyanın sözlərinə görə, Robert Köçəryanın açıqlamasına səbəb Respublikaçılar Partiyasının hazırda seçkilərə hazırlıq işləri ilə məşğul olmamasıdır: “Bizim gündəmdə belə bir məsələ yoxdur, hətta müzakirə də olmayıb, çünki Respublikaçılar Partiyası hesab edir ki, 2026-cı ilin yayında keçiriləcək seçkilərə qədər hakimiyyət dəyişikliyinə nail olmaq lazımdır”. Yeri gəlmişkən, Serj Sarkisyan Robert Köçəryanın mətbuat konfransından saatlar sonra başqa işlərlə məşğul olduqlarını elan edərək, seçkilərdə iştirak etmək qərarına gələn qüvvələrə uğurlar arzulayıb. Sarkisyanın rəhbərlik etdiyi partiyanın məşğul olduğu məsələ baş nazir Nikol Paşinyana etimadsızlıq prosesidir. Əvvəllər Paşinyanın impiçment edilməsini qeyri-real hesab edən Robert Köçəryan, sadəcə olaraq, deputatların bunun üçün kifayət qədər səs toplaya bilmədiyi üçün bir daha təsdiqləyib ki, rəhbərlik etdiyi “Hayastan” bloku prosesə qoşulduğunu bəyan etsə də, mövqeyini dəyişməyib: “İmpiçment üçün əsaslar var, səslər sadəcə yoxdur və bu günə qədər impiçment təşəbbüskarlarının impiçment üçün lazım olan səslərə sahib olub-olmaması barədə heç bir məlumatım yoxdur, biz gözləyirik”. Serj Sarkisyan Köçəryana qiyabi cavab verib: “Biz təşəbbüskar deyildik, müdafiəçiydik. Bu mərhələ neytraldır, deputatları impiçment prosesinə qoşulmağa inandırmaqla bağlıdır”. Sarkisyan impiçmentə nail olmaq üçün indiki mərhələdə nələrin edildiyini izah edərkən, Köçəryan bu prosesin ağlabatan müddətləri ilə bağlı məsələ qaldırırıb. Bunun nə vaxt yekunlaşacağını soruşub. Mamicanyan isə buna sərt cavab verib: “Heç kim Respublikaçılar Partiyası və onun parlament fraksiyası üçün son tarix təyin edə bilməz”.
Samirə SƏFƏROVA
