Əli Mustafa: “Paşinyan əslində Ermənistana yeni bir ideoloji siyasi dəsti-xətt təqdim edir”
Ermənistanın baş naziri Nikol Paşinyan dördüncü respublikanın üçüncü respublikadan nə ilə fərqlənəcəyini açıqlayıb. Məlum olub ki, orada əksini tapanlar Azərbaycanın maraqlarına cavab verir:
“Dördüncü respublikanın yaradılması məqsəd kimi partiyanın qurultayda qəbul etdiyi bəyannamədə öz əksini tapıb. Çox adam üçüncü və dördüncü respublikalar arasında nə fərq olacağını soruşur. Fərq budur: üçüncü respublika müharibə məntiqinə, dördüncü respublika isə sülh məntiqinə əsaslanır. Üçüncü respublikada konstitusiyanın xalqın iradəsini azad ifadə etməsi və səsvermə yolu ilə qəbul edilməsi böyük şübhələr yaradır, halbuki, dördüncü respublikada belə şübhələr olmamalıdır. Üçüncü respublikada xalqın hakimiyyəti nisbi və formal xarakter daşıyır, dördüncü respublikada bu, aydın və mübahisəsiz olmalıdır. Nəhayət, üçüncü respublika Vətən xəyalları, arzulanan Vətən axtarışlarıdır, dördüncü respublikada isə - Ermənistan respublikası bizim arzularımızın Vətənidir və Vətəni axtarmağa ehtiyac yoxdur”.
“Dəfələrlə çıxışlarında bəyan edib ki, onlar Qarabağı Azərbaycanın tərkib hissəsi kimi tanımaqla müstəqil olublar”
Sözügedən məsələni “Bakı-Xəbər”ə şərh edən siyasi şərhçi Əli Mustafanın fikrincə, Paşinyan əslində Ermənistana yeni bir ideoloji siyasi dəsti-xətt təqdim edir: “O, açıq deyir ki, müstəqil Ermənistan, yəni üçüncü respublika savaşla quruldu. Müharibə üzərində var olmağa cəhd etdi. Xəstə xəyallara söykənən “dənizdən dənizə böyük Ermənistan” qurmaq istədilər. Paşinyan praqmatik mövqedən çıxış edərək bunu Ermənistan üçün zərərli hesab edir. Nəzərə almaq lazımdır ki, Ermənistan ordusu İkinci Qarabağ müharibəsində darmadağın edilib. Həmin Ermənistan artıq yeni dönəmə, paradiqmalara cavab vermir. Ona görə də dördüncü respublika qurmaq istəyir və əvvəlki xəstə ideologiyadan xilas olmaq istəyir. Yeni Ermənistan Azərbaycanla münasibətlərdə sülhə əsaslanır və ərazi iddiaları ilə çıxış etmir. Onun səsləndirdiyi fikirlərin mahiyyəti bundan ibarətdir. Üçüncü respublikada seçkilər saxtalaşdırılırdı, cəmiyyətin iradəsi nəzərə alınmırdı. Qarabağda terrorçu xuntanı təmsil edən qüvvələr Ermənistanda hakimiyyəti ələ keçirdilər. Onların da arxasında Rusiya dayanırdı. Moskva Ermənistandan Azərbaycana qarşı istifadə edirdi. Bu səbəbdən münaqişə həll olunmurdu, işğal amili ortadan qalxmırdı. Hiss edilir ki, Ermənistan cəmiyyəti, siyasi elitası bunu artıq anlayır və Paşinyanın sülh çağırışlarına yavaş-yavaş pozitiv mövqedən yanaşır. Çünki faktiki olaraq üçüncü respublika Moskvanın idarə etdiyi bir ölkə idi. Oradan nə deyilirdisə, Ermənistan onu icra edirdi. Dördüncü respublika isə müstəqil siyasət kursuna söykənəcək. Dəfələrlə Paşinyan çıxışlarında bəyan edib ki, onlar Qarabağı Azərbaycanın tərkib hissəsi kimi tanımaqla müstəqil olublar. Hesab edirəm ki, bu, Rusiyanın təsir dairəsindən çıxmağı özündə əks etdirən bir mesajdır. Paşinyan bununla həm də Ermənistan Konstitusiyasını dəyişmək üçün ideoloji zəmin hazırlayır”.
Vidadi ORDAHALLI
