Bəhruz Quliyev: “Bu, əslində regionda sülh və sabitliyə xidmət etməkdən çox, onun pozulmasına yönəlib”
ABŞ konqresmenləri Darrell İssa və Qas Bilirakis "Qafqazda eskalasiyanın qarşısının alınması və tərəfdaşlığın möhkəmləndirilməsi" (PEACE Act – H.R.5632) adlı qanun layihəsi hazırlayıblar.
Nümayəndələr Palatasının Xarici əlaqələr komitəsinin sədr müavini D.İssanın adından yayılan pres-relizdə deyilir ki, qanun layihəsinin məqsədi gələcəkdə Ermənistana qarşı təcavüzün qarşısını almaq, onun Azərbaycanla Tramp administrasiyası vasitəsilə əldə etdiyi sülh razılaşmasını möhkəmləndirməkdir. Təklif edilən sanksiyalar sırasında Ermənistana qarşı düşmən hərəkətə görə məsuliyyət daşıyan məmurların və onların ailə üzvlərinin ABŞ-dakı aktivlərinin dondurulması; ABŞ-yə girişinə qadağa qoyulması; Azərbaycanın neft satışını asanlaşdıran maliyyə qurumlarına məhdudiyyətlər yer alır.
Burada təəccüb doğuran məqam odur ki, Azərbaycana qarşı təxribatçı qanun layihəsini iki respublikaçı konqresmen hazırlayıb. Bununla əslində həm də 8 avqust Vaşinqton razılaşmasını hədəf alırlar.
“Təkcə Azərbaycanı deyil, eyni zamanda ABŞ-ın öz strateji maraqlarını da sual altına qoyur”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev hesab edir ki, bu, regionda sülhə yox, onun pozulmasına yönəlib: “ABŞ Konqresinin iki respublikaçı üzvü Darrell İssa və Qas Bilirakis tərəfindən təqdim edilən “Qafqazda eskalasiyanın qarşısının alınması və tərəfdaşlığın möhkəmləndirilməsi” adlı qanun layihəsi, əslində regionda sülh və sabitliyə xidmət etməkdən çox, onun pozulmasına yönəlib. Sənəddə, guya “Ermənistana qarşı təcavüzün qarşısının alınması” məqsədi bəyan olunsa da, reallıqda bu addım Azərbaycanı hədəf alan, birtərəfli və qərəzli siyasi sifariş təsiri bağışlayır. ABŞ kimi qlobal güc mərkəzinin bəzi konqresmenlərinin bu cür subyektiv mövqelər nümayiş etdirməsi Vaşinqtonun vasitəçiliyi ilə 8 avqustda əldə edilmiş sülh razılaşmasının ruhuna tamamilə ziddir. Maraqlıdır ki, bu təşəbbüsün müəlliflərinin hər ikisi respublikaçı konqresmendir. Yəni ənənəvi olaraq enerji təhlükəsizliyinə, bazar azadlığına və beynəlxalq tərəfdaşlığa üstünlük verən bir siyasi platformadan çıxış edən şəxslər bu dəfə Azərbaycanın enerji maraqlarına qarşı məhdudiyyətlər irəli sürürlər. Bu, təkcə Azərbaycanı deyil, eyni zamanda ABŞ-ın öz strateji maraqlarını da sual altına qoyur. Təklif olunan sanksiyalar sırasında Azərbaycanın neft satışını asanlaşdıran maliyyə qurumlarına məhdudiyyətlərin nəzərdə tutulması açıq şəkildə regionda iqtisadi balansı pozmağa yönəlmiş addımdır. Bu isə sülh təşəbbüslərinə zərbə vurmaqla yanaşı, Qafqazda yeni geosiyasi gərginlik ocaqlarının yaranmasına səbəb ola bilər. Sözügedən qanun layihəsi nə sülhü qoruyur, nə də tərəfdaşlığı möhkəmləndirir. Əksinə, onun mahiyyəti destruktivdir və məqsədi 8 avqust razılaşmasını hədəfə almaq, Azərbaycanı iqtisadi və diplomatik təzyiq altında saxlamaqdır. Əgər Vaşinqton doğrudan da regionda dayanıqlı sülhün tərəfdarıdırsa, o zaman birtərəfli və qərəzli təşəbbüslərlə deyil, ədalətli və balanslaşdırılmış yanaşma ilə çıxış etməlidir. Azərbaycan bu cür təxribatçı addımlara həm öyrəşib, həm də qorxmur. Çünki bizim mövqeyimiz ədalətə, beynəlxalq hüquqa və real sülh gündəliyinə əsaslanır”.
Vidadi ORDAHALLI
