Rusiya dörd illik qarşıdurmada 1 milyondan çox əsgər itirib və ya onlar döyüşmək iqtidarında deyil, buna görə də xaricdən, ilk növbədə Kubadan döyüşçülər gətirirlər. Bu iddianı Britaniya kəşfiyyatı irəli sürüb.
Baki-xeber.com-un məlumatına görə, “Forbes” jurnalı yazır ki, Rusiya Ukrayna müharibəsində verdiyi itkiləri kompensasiya etmək və hərbi ehtiyaclarını ödəmək üçün xarici döyüşçülər cəlb etməyə üz tutub.
Jurnal bu vəziyyətin münaqişənin mahiyyətini dəyişdiyini iddia edib. “Forbes”in məlumatına görə, Ukrayna hərbi kəşfiyyatçısı Andrey Yusov ABŞ Konqresində çıxış edərək, Rusiyanın döyüşə təxminən 25 min kubalı gətirə biləcəyini irəli sürüb. O, bu vəziyyətin Moskva üçün "faydalı" olduğunu, çünki xarici itkilərin Rusiya daxilində sosial və siyasi reaksiyalara səbəb olmayacağını bildirib.
Qeyd edilir ki, Britaniya kəşfiyyatı Rusiyanın ümumi itkilərinin (ölü və yaralı) bir milyondan çox olduğunu hesab edir. “Forbes” yazır ki, bu vəziyyət Kremli Mərkəzi Asiya, Afrika və Latın Amerikasından döyüşçülər axtarmağa vadar edib.
Bundan əvvəl Rusiya prezidenti Vladimir Putin Ukrayna qoşunlarının bütün cəbhə xətlərindən geri çəkildiyini iddia etmişdi. Ancaq bu iddialar müstəqil mənbələr tərəfindən təsdiqini tapmayıb.
1 milyon itki rəqəmi nə qədər doğrudur?
Politoloq Mehman İsmayılov “Bakı-Xəbər”ə bildirdi ki, bu gün Rusiyanın Ukraynaya müdaxiləsindən 1324 (5) gün keçib. “Rusiya 24 fevral 2022-ci ildə Ukraynaya qarşı təcavüz müharibəsinə başladığı gündən bugünə qədər dəhşətli itkilərə məruz qalıb. Bu gün Rusiya ilə Ukraynanın qarşılaşdığı cəbhə xəttinin uzunluğu 2 min kilometrdir. Əlbəttə, Rusiyanın itkiləri 1 milyon deyil, 1 milyon yarımdan artıqdır. Üstəlik də nəzərə alsaq ki, Rusiya, hər zaman olduğu kimi, insan resurslarının hesabına qələbə çalmaq istəyir. Bir əsgər və bir zabit lazım olan yerə yüzünü göndərir, yəni Rusiyada insan taleyi, insanın dəyəri bir quruş belə deyil. Hər zaman da bu cür olub”.
M.İsmayılov qeyd etdi ki, bu gün bir riyazi hesablama aparsaq, 2 min kilometr uzunluğunda olan cəbhə xəttinin hər kilometrində gündə bir insan həyatını itirsə və yaralansa, bu, bir gündə 2 min insan deməkdir. “Rusiyanın 1324 günlük müharibəsində ki, hər gün 1500, 2000 nəfər yaralı və ya ölü əsgər və zabit itirir, bunu gündə 1000 nəfərdən hesablasan yenə 1 milyon 324 min insan edir. Rusiya dəhşətli dərəcədə iqtisadi və insani, həm də texnika baxımından itkilərə məruz qalır. Ancaq Rusiyanın bir xüsusiyyəti var ki, hər zaman itkiləri gizlədib. Birinci Dünya müharibəsində, vətəndaş müharibəsində, Oktyabr inqilabı çevrilişində, İkinci Dünya müharibəsində, Əfqanıstan müharibəsində Rusiya hər zaman öz itkilərini gizlədib. İtkilərini nə qədər gizlətməyə çalışsa da, əlbəttə ki, beynəlxalq hərbi ekspertlər bunu izləyirlər, bilirlər. Əgər Rusiyanın itkiləri bu qədər dəhşətli deyilsə, onda nədən Şri-Lankadan, Hindistandan, Kubadan, Afrika ölkələrindən, Şimali Koreyadan əsgər və zabitlər muzdlu sifətində idxal edilir? Verilən xəbərlərə görə, bu gün Rusiyanın Ukraynaya qarşı təcavüz müharibəsi aparan 1 milyonluq ordusunun 700 mini muzdlulardan ibarətdir. Rusiya bu muzdluları dünyanın ən müxtəlif ölkələrindən toplayır. Bu gün Rusiyanın muzdlularının içində 5 minə yaxın kubalı döyüşür. Hər gün Kubadan yeni-yeni muzdluların rus ordusuna cəlb edilməsi barədə xəbərlər yayılır. Amerikanın bəzi mütəxəssisləri hazırda Rusiya tərəfdən Ukraynaya qarşı döyüşəcək 25 min kubalının olduğunu söyləyir. Dünyanın ən kasıb ölkələrindən pul və müxtəlif saxtakar sxemlər qarşılığında insanları orduya, müharibəyə cəlb edirlər. Ona görə ki, muzdlu üçün sosial ödəniş proqramı, gətirilib müharibəyə göndərilmiş afrikalı üçün Rusiyanın heç bir öhdəliyi yoxdur... Britaniya kəşfiyyatının verdiyi məlumatlar xeyli dərəcədə kiçik rəqəmlərdir, Rusiyanın bu müharibədə itkiləri ən azı 1, 5 milyondur”-deyə M.İsmayılov bildirdi.
İradə SARIYEVA
