Akif Nağı: “...Sülh prosesinə mane olmaq istəyirlər”
Azərbaycan Prezidenti İlham Əliyevin Türk Dövlətləri Təşkilatının (TDT) Dövlət Başçıları Şurasının 12-ci Zirvə Görüşündəki çıxışında TDT-yə üzv ölkələrin 2026-cı ildə birgə hərbi təlimlərinin keçirilməsini təklif etməsi Ermənistandakı bəzi qüvvələri narahat edib. Türk dövlətlərinin belə bir təlim keçirməsinin Ermənistana heç bir aidiyyəti olmadığı halda onların bunu müzakirə etməsi yersiz görünür.
Ermənistan Respublikaçılar Partiyasının icra orqanının üzvü Artak Zakaryan türk dövlətləri arasında müdafiə, təhlükəsizlik və hərbi təlim sahələrində geniş əməkdaşlığın planlaşdırılmasından narahat olub. “Bu əsasda Azərbaycan prezidenti İlham Əliyev 2026-cı ildə TDT-yə üzv dövlətlərin birgə hərbi təlimlərinin Azərbaycanda keçirilməsini təklif edib. Niyə 2026? Niyə Azərbaycanda, yəni Cənubi Qafqazda? Bəs bu təlimlərin "şərti" hədəfi nə olacaq?!”-deyə o bildirib.
O iddia edib ki, İran İslam Respublikası ətrafında hərbi ssenarilər guya “yeni müstəviyə keçəcək”. Zakaryan “NATO Rusiya Federasiyasına qarşı hərbi əməliyyatların intensivliyinin və miqyasının artırılması imkanlarını müzakirə edir. Nikolun bərbad, uğursuz, tamamilə təhrif olunmuş siyasəti qarşısında Ermənistan nə edəcək?”-deyib.
Belə qələmə vermək istəyir ki, TDT-yə üzv dövlətlərin birgə hərbi təlimi guya bölgədə hansısa problem yarada bilər və sair.
“Onlar çox yaxşı bilirlər ki, bu təlimlər İrana, Rusiyaya, Ermənistana qarşı yönəlməyib, sadəcə yanlış rəy yaratmağa, məsələnin mahiyyətini təhrif etməyə çalışırlar”
Azad Vətən Partiyasının sədri Akif Nağı “Bakı-Xəbər”ə bildirdi ki, Ermənistanda seçkilər yaxınlaşdıqca siyasi mübarizədə müxtəlif vasitələrdən istifadə edirlər. Zakaryanın hökumətə əks olan Sarkisyanın rəhbərlik etdiyi partiyanın təmsilçisi olduğunu deyən A.Nağı vurğuladı ki, seçkilərdə nəyəsə nail olmaq, Paşinyana mane olmaq üçün bütün vasitələrə əl atırlar və erməni cəmiyyətinin diqqətini özlərindən ayırıb Azərbaycana yönəltmək istəyirlər. “Ermənilər bununla Azərbaycan və Ermənistan arasındakı sülh prosesinə mane olmaq istəyirlər. Ermənistanın daxilindəki müxalif qüvvələr bilirlər ki, Azərbaycanla Ermənistan arasında sülh müqaviləsi imzalanarsa, sülh olarsa, sabitlik yaranarsa onların hakimiyyətə gəlmək şansı tamamilə sıfıra enəcək. Onsuz da şansları çox aşağıdır. Ona görə də gərginlik olarsa, ölkənin daxilində müəyyən qarşıdurmalar, xaos yaranarsa ümid edirlər ki, Rusiyanın köməyi ilə yenidən hakimiyyətə gələcəklər. Yəni özlərinin revanşist niyyətlərini həyata keçirəcəklər. Erməni revanşizmindən danışırıq. Kənarda olan qüvvələr, əvvəllər Ermənistanda hakimiyyətdə olan Sarkisyan, Köçəryan və onların dəstəsi Azərbaycana qarşı revanşist mövqedən çıxış edirlər. Amma başa düşmürlər ki, Azərbaycana heç nə edə bilməzlər. Tutaq ki, hakimiyyətə gəldilər. Hansı hərbi əməliyyatdan danışa bilərlər? Onların revanşizmi həm də Paşinyan hakimiyyətinə qarşı yönəlib, onu hakimiyyətdən devirmək, hakimiyyətə gəlmək və ondan intiqam almaq istəyirlər. Onlar bunu daha real görürlər, nəinki Azərbaycana qarşı hansısa revanşist istəklərini. Ona görə də bu şəkildə Paşinyan hakimiyyətini qaralamağa çalışırlar”.
Azərbaycan Prezidentinin öz mövqeyini ortaya qoyduğunu və Paşinyanın da bunu anladığını, türk dünyasının, Turanın birləşdiyini, böyük bir gücə çevrildiyini başa düşdüyünü deyən A.Nağı hesab edir ki, hətta bəzi dövlətlər hansısa bir şəkildə, statusda bu birliyə qoşulmaq istəyirlər. Paşinyanın Turan birliyindən yararlanmağa çalışdığını bildirən A.Nağının sözlərinə görə, Paşinyan başa düşür ki, onun üçün Rusiya-Avropa-Qərb çətirindən daha sərfəlisi Azərbaycan, Türkiyə, Turan dünyasının çətiridir, bu çətirin altına girmək istəyir, bu istiqamətdə addımlar atır. “Bu, məsələnin bir tərəfi. Digər tərəfdən, TDT-nin Qəbələ Zirvəsində bu quruma üzv ölkələrin hamısının rəhbərləri öz fikirlərini dedilər və hamısı da vahid mövqedən çıxış etdilər. Bir-birinin təklifini, fikrini dəstəklədilər. Azərbaycan Prezidenti bütün istiqamətlərdə təkliflərini verdi və çağrışlarını etdi, xüsusi olaraq vurğuladı ki, vacib məsələlərdən biri birgə güclü hərbi qüvvənin formalaşdırılmasıdır. Belə deyirlər, türk NATO-su. Bunun üçün də birgə hərbi təlimlərin keçirilməsi vacibdir. Orduların bütün göstəricilərinin bir araya gətirilməsi, vahid bir sistemdə olmaları lazımdır. Bunu da təlimlər yolu ilə əldə etmək olar. Azərbaycan da təlimlər üçün seçilib. Azərbaycan Prezidenti təklif etdi ki, təlimlər Azərbaycanda keçirilsin. O başqa ölkədə də keçirilə bilər. Təklif oluna bilərdi ki, məsələn, Türkiyədə keçirilsin. Bu təlimin niyə Azərbaycanda keçirilməsinin heç kəsə dəxli yoxdur. Ermənistandakı bəzi qüvvələr bundan siyasi məqsədlər üçün istifadə edirlər. Eyni zamanda bunu qabardırlar ki, guya İrana, Rusiyaya qarşıdır, guya Azərbaycan regionda müharibəyə hazırlaşır. Azərbaycan dəfələrlə bildirib ki, biz öz ərazi bütövlüyümüzü təmin etmişik, başqa dövlətlərin ərazisində gözümüz yoxdur, amma bizə qarşı hər hansı bir cəhd olarsa ona dərhal cavab verməyə hazırıq. Azərbaycan Prezidenti dəfələrlə deyib ki, hələ müharibə təhlükəsi qalır, bu müharibə təhlükəsi bizim tərəfimizdən deyil. Ermənistanda müxalifətdə və hakimiyyətdə olanlar da başa düşməlidir ki, Azərbaycan müharibə təşəbbüsü ilə heç vaxt çıxış etməyib. Bizim torpaqlarımız Ermənistan tərəfindən Rusiyanın himayəsi ilə işğal olunmuşdu. Torpaqlarımızı işğal etməyə Ermənistan təşəbbüs etmişdi, işğal altında saxladılar. Biz dəfələrlə təşəbbüs göstərdik, amma onlar sülhə gəlmirdi. 2019-2020-ci illərdə Azərbaycan dəfələrlə təklif etdi ki, gəlin bu məsələni oturub danışıqlar stolunda beynəlxalq hüquq normalarına uyğun olaraq həll edək. Ermənistanda isə əksinə, yenidən Azərbaycanın torpaqlarını işğal etmək niyyətindən çıxış edirdilər. Azərbaycana qarşı hərbi əməliyyata onlar başladı. Azərbaycan onların təxribatlarına cavab olaraq əks-hücuma keçdi. Azərbaycan yenə də həmin mövqedədir. Siz Azərbaycanın ərazi bütövlüynə qarşı hansısa addımlar atarsınıza həddən artıq sərt cavab alacaqsınız. Ona görə həm Azərbaycan ordusu, həm də Türk dünyasının birləşmiş hərbi qüvvələri güclü olmalıdır. Bunun üçün də hərbi təlimlər keçirilməlidir. Onlar çox yaxşı bilirlər ki, bu təlimlər İrana, Rusiyaya, Ermənistana qarşı yönəlməyib, sadəcə yanlış rəy yaratmağa, məsələnin mahiyyətini təhrif etməyə çalışırlar”-deyə A.Nağı bildirdi.
İradə SARIYEVA
