İbrahim Rüstəmli: “Birgə hərbi təlimlər gələcəyimiz, gələcəyimizin sabitliyi, sakitliyi, müharibəsiz türk dövlətləri üçün çox böyük əhəmiyyət daşıyacaq”
Türk Dövlətləri Təşkilatının (TDT) Qəbələ Zirvəsi çox mühüm qərarların qəbul edilməsi, təklif və təşəbbüslərin irəli sürülməsi və sairlə yadda qaldı. Azərbaycan Prezidenti İlham Əliyev Türk Dövlətləri Təşkilatının (TDT) Dövlət Başçıları Şurasının 12-ci Zirvə Görüşündə çıxışında TDT-yə üzv ölkələrin birgə hərbi təlimlərinin keçirilməsini təklif edib.
Prezident Əliyev deyib: “Ölkələrimiz arasında hərbi, müdafiə və təhlükəsizlik sahələrində geniş əməkdaşlığı nəzərə alaraq, 2026-cı ildə Azərbaycanda Türk Dövlətləri Təşkilatına üzv ölkələrin birgə hərbi təliminin keçirilməsini təklif edirik”.
“Mən bunu Azərbaycan Prezidenti tərəfindən daha çox gələcək üçün atılmış çox strateji bir addım kimi dəyərləndirirəm”
Azərbaycan Prezidentinin irəli sürdüyü təklifin mühüm əhəmiyyət daşıdığını bildirən hərbi ekspert İbrahim Rüstəmli “Bakı-Xəbər”ə bildirdi ki, qloballaşan dünyada həm iqtisadiyyatın, həm siyasətin, həm də hərbin coğrafiyasında müəyyən kardinal dəyişikliklər baş verir. “Bu qloballaşan, qütbləşən dünyada, belə bir dövrdə Türk Dövlətləri Təşkilatına üzv ölkələrin birgə hərbi təlimlər keçirməsinin təklif edilməsi olduqca mühüm məsələdir. TDT-yə üzv dövlətlərin bu məsələdə də bir yumruq kimi birləşməsi dövrün tələbindən irəli gələn bir məsələdir. Bu zərurətə çevrilib. Azərbaycan Prezidenti İlham Əliyev bu təklifi təsadüfən irəli sürməyib, o, siyasətdə öz sözünü deyən, etimad edilən, inanılan uzaqgörən bir dövlət xadimi kimi çox yaxşı bilir ki, TDT-yə üzv olan dövlətlər, türk dünyası təkcə sözlə, onları bir-birinə bağlayan milli-mənəvi, etnik-tarixi dəyərlərlə deyil, digər əsas elementlərlə bir cəbhədə birləşməsələr, onlar üçün gələcəkdə çox ciddi problemlər yaşana bilər. Mən bunu Azərbaycan Prezidenti tərəfindən daha çox gələcək üçün atılmış çox strateji bir addım kimi dəyərləndirirəm. TDT-yə üzv dövlətlərin həm də bir cəbhədə, bir orduda birləşməsi, öz üzərlərinə təhlükəsizlik, əmin-amanlıq, sabitlik baxımından öhdəliklər götürməsi çox önəmlidir. Hesab edirəm ki, birgə hərbi təlimlər gələcəyimiz, gələcəyimizin sabitliyi, sakitliyi, müharibəsiz türk dövlətləri üçün çox böyük əhəmiyyət daşıyacaq”-deyə İ.Rüstəmli vurğuladı.
O, həmçinin qeyd etdi ki, istər Cənubi Qafqazda-regionumuzda, istər Avropada, Qərbdə bir sıra məsələlərə yenidən baxılır. Bu baxışın ortaya yeni münasibətlər qoyduğunu deyən İ.Rüstəmli vurğuladı ki, son dövrlər müşahidələrdən də göründüyü kimi, dünyada cəbhələşmə prosesi baş verir. “Amma daha sadə şəkildə ifadə etsəm, tam əminliklə deyə bilərəm ki, dünyada müsəlman dünyasına qarşı üçüncü səlib yürüşünə başlanılıb. Suriyada, Əfqanıstanda, İraqda, Fələstində və sair ölkələrdə baş verənlər Avropa və Qərb dövlətlərinin bu ölkələrin vəziyyətinə çox dəhşətli şəkildə vurduqları zərbələrin nəticəsidir. İraq çöküb, Suriya çöküb, Əfqanıstan çöküb, Liviya çöküb, Fələstin çöküb. İndi İrana qarşı hücumlar var. Bütün bunlar nəyin nəticəsidir? Bir dəfə Türkiyə Prezidenti Rəcəb Tayyib Ərdoğan Avropa və Qərb dövlətlərinə səslənərək dedi ki, siz Suriyaya, İraqa neft qoxusuna gəlirsiniz.
Yəni burda əsas məqsəd Suriya, İraq, Fələstin xalqına gün ağlamaqdan ibarət deyil, burda əsas məqsəd bu torpaqlarda olan təbii sərvətləri bir əldə cəmləşdirməkdən və müsəlman dövlətlərini birbaşa müflis vəziyyətə salmaqdan, bununla da onları özlərindən asılı vəziyyətdə görməkdən ibarətdir.
Son dövrlər Azərbaycan istər regionda, istərsə də dünyada balanslaşdırılmış bir siyasət həyata keçirir. Dövlətimizin siyasi xəttinin əsas prioriteti yaxın qonşularla, xüsusilə Rusiya, İran, Ermənistan və Gürcüstanla isti münasibət saxlamaqla ibarətdir. Rusiya ilə münasibətlərdə yaranan çatların səbəbkarı Rusiya özüdür. İranla münasibətlərimizə gəlincə, İran prezidenti Məsud Pezşkianın Azərbaycana iki dəfə rəsmi səfərə gəlməsi, Azərbaycan dilində danışması, eyni zamanda Azərbaycanla İran arasındakı münasibətləri əsasən milli-mənəvi dəyərlər, bağlılıq fonunda şərh etməsi, təbii ki, İran-Azərbaycan münasibətlərində yeni bir mərhələnin başlanğıcı kimi dəyərləndirilə bilər. Ermənistan da bu gün dövlət səviyyəsində Azərbaycana münasibətində kardinal dəyişikliklər edib. Ermənistan da bizim ərazi bütövlüyümüzü tanıyır. Bilirsiz ki, yalnız Ermənistan Azərbaycanın ərazi bütövlüyünü tanımırdı. Bu gün şərti olaraq “Tramp dəhlizi” adlanan Zəngəzur dəhlizinin açılışı layihə olaraq hələ tam yerinə yetirilməsə də, bu, Ermənistanla Azərbaycan arasındakı münasibətlərdə yeni rəngə, yeni əhval-ruhiyyəyə, yeni münasibətlərə çevriləcək”-deyə İ. Rüstəmli qeyd etdi.
İradə SARIYEVA
