Bəhruz Quliyev: “Təlimlər, əslində iki qardaş ölkə olan Azərbaycan və Türkiyə arasında "Bir millət, iki dövlət" fəlsəfəsinin praktik güc nümayişidir”
Məlum olduğu kimi, Qəbələdə Türk Dövlətləri Təşkilatının (TDT) Dövlət Başçıları Şurasının 12-ci Zirvə Görüşü keçirilib. Görüşdə bir sıra dövlətlərin ölkə başçıları iştirak edib.
Görüşdə çıxış edən Prezident İlham Əliyev bir sıra maraqlı məqamlara toxunub. O cümlədən qeyd edib ki, təhlükəsizlik təmin edilmədən inkişaf mümkün deyil: “Beynəlxalq hüququn norma və prinsiplərinin kobud şəkildə pozulduğu dövrdə ölkələrimiz arasında hərbi və hərbi-texniki sahədə əməkdaşlıq çox önəmli amillərdən biridir. Bu çərçivədə müttəfiqimiz olan Türkiyə ilə dərin əməkdaşlıq mövcuddur. Yalnız son bir ildə Türkiyə ilə birgə 25-dən artıq ikitərəfli və çoxmillətli hərbi təlimlər keçirilibdir”.
Qeyd edildiyi kimi, son bir ildə Türkiyə ilə birgə 25-dən artıq ikitərəfli və çoxmillətli hərbi təlimlər keçirilib.
“Hərbi əməkdaşlığın bu səviyyəyə çatması həm regionda sülh və təhlükəsizliyin təminatıdır, həm də Türk dövlətləri arasında birgə müdafiə və strateji planlaşdırmanın yeni mərhələyə keçdiyini göstərir”
“Səs” qəzetinin baş redaktoru, siyasi ekspert Bəhruz Quliyev “Bakı-Xəbər”ə şərhində bildirdi ki, Qəbələdə keçirilən Türk Dövlətləri Təşkilatının (TDT) Dövlət Başçıları Şurasının 12-ci Zirvə Görüşü təkcə diplomatik formatda keçirilən toplantı deyil, həm də türk dünyasının geosiyasi güc mərkəzinə çevrilməsinin növbəti sübutudur: “Prezident İlham Əliyevin çıxışında xüsusi vurğuladığı məqam odur ki, son bir ildə Türkiyə ilə birgə 25-dən artıq ikitərəfli və çoxmillətli hərbi təlimlərin keçirilməsi sıradan bir fakt deyil, bu, dünyaya strateji mesajdır".
B.Quliyevin dediyinə görə, bu təlimlər, əslində iki qardaş ölkə olan Azərbaycan və Türkiyə arasında "Bir millət, iki dövlət" fəlsəfəsinin praktik güc nümayişidir: “Hərbi əməkdaşlığın bu səviyyəyə çatması həm regionda sülh və təhlükəsizliyin təminatıdır, həm də Türk dövlətləri arasında birgə müdafiə və strateji planlaşdırmanın yeni mərhələyə keçdiyini göstərir. Hesab edirəm ki, Azərbaycan bu gün Cənubi Qafqazda yeni reallıqların, yeni formatların müəllifidir. Düşünürəm ki, Ermənistanın tarixən revanşist niyyətlərinə və bəzi xarici dairələrin təxribatçı siyasətinə qarşı ən güclü cavab Türk birliyinin hərbi-siyasi həmrəyliyidir. Qəbələdə səslənən bu mesaj həm regiondakı balansı dəyişir, həm də bütün dünyaya göstərir ki, Türk dövlətləri artıq tək-tək yox, vahid güc mərkəzi kimi çıxış edirlər. Bu baxımdan Prezident İlham Əliyevin çıxışı sadəcə statistik və yaxud protokol göstərici deyildi. Bu, Türk dünyasının gələcək təhlükəsizlik arxitekturasının ideoloji əsaslarını müəyyən edən strateji bəyanat idi. Qardaşlıqdan ittifaqa, əməkdaşlıqdan ortaq gücə keçidin rəmzidir bu təlimlər. Demək istəyirəm ki, Qəbələ Zirvəsi göstərdi ki, türk dövlətlərinin birliyi artıq şüar yox, siyasi və hərbi reallıqdır. Azərbaycanın liderliyi və Türkiyənin qlobal nüfuzu bu birliyi regional sabitliyin əsas dayağına çevirir”.
Güneı CƏLİLOVA
