Azər Həsrət: “Ermənistan Respublikasının bir dövlət olaraq məlum proseslərdən kənarda olduğu haqqında heç bir sübut, dəlil ola bilməz”
Ermənistanın Azərbaycana qarşı hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozma və digər çoxsaylı cinayətlər törətməkdə təqsirləndirilən Ermənistan Respublikasının vətəndaşlarının məhkəmə prosesi davam edir.
Bakı Hərbi Məhkəməsində keçirilən məhkəmə prosesində 2020-ci ildə 44 günlük Vətən müharibəsi zamanı Gəncə şəhərinin raketlərlə vurulmasına dair sənədlər elan edilib. Tədqiq olunan sənədlərdə göstərilib ki, Ermənistan silahlı qüvvələri atəşkəs rejimini və beynəlxalq hüquq normalarını, o cümlədən silahlı münaqişələr zamanı mülki şəxslərin müdafiəsinə dair 12 avqust 1949-cu il tarixli Cenevrə Konvensiyasının tələblərini kobud şəkildə pozaraq, 2020-ci il oktyabr ayının 4-də, 5-də, 8-də, 11-də və 17-də cəbhədən uzaqda yerləşən Gəncə şəhərində yaşayış məntəqələrinə, hərbi hədəf olmayan mülki obyektlərə, həmçinin mülki əhaliyə 9K58 “Smerç” (BM-30) və 9K72 “Elbrus” tipli raketlərlə zərbələr endiriblər.
Qeyd edək ki, 2020-ci il oktyabr ayının 4-də, 5-də, 8-də, 11-də və 17-də Gəncə şəhərinə edilmiş raket hücumları nəticəsində 26 mülki şəxs qəsdən öldürülüb, 175 nəfər isə müxtəlif dərəcəli bədən xəsarətləri alıb. Məhkəmədə Gəncənin ballistik raketlə vurulması əmrinin Ermənistan rəhbərliyi tərəfindən verilməsi təsdiqlənib.
“Məhkəmə prosesində hələ çox sirlər açılacaq, bir çox məsələlər aydınlığa qovaşacaq və Ermənistanın törətdiyi bütün cinayət əməlləri hüquq müstəvisində dünyaya bəyan ediləcək”
Siyasi şərhçi Azər Həsrət “Bakı-Xəbər”ə şərhində bildirdi ki, baş verən bütün proseslərdə Ermənistan dövlətinin əli, izi var, bu birmənalıdır: “Azərbaycan torpaqlarını işğal edən də Ermənistandır, həmin ərazilərdə hərbi qüvvələr saxlayan da məhz bu ölkə olub. Həmin torpaqlarda terror və təxribatlar törədən də Ermənistan dövlətidir. Ermənistan Respublikasının bir dövlət olaraq məlum proseslərdən kənarda olduğu haqqında heç bir sübut, dəlil ola bilməz. Heç kim iddia edə bilməz ki, Qarabağdakı bir ovuc erməni bu qədər silah-sursat əldə etdi, Azərbaycan kimi böyük dövlətə qarşı durdu”.
Həmsöhbətimiz xüsusi olaraq vurğuladı ki, Ermənistanın törətdiyi əməllərin arxasında Rusiya var idi: “Ermənistan dövləti Rusiyanın vassal olaraqı Azərbaycana qarşı bu cür məsələlərdə hərəkət edirdi. Təbii ki, bu hərəkətləri də Qarabağda terrorçu, bölücü qruplaşmaların əli ilə edirdi. Hesab edirəm ki, məlum məhkəmə prosesində hələ çox sirlər açılacaq, bir çox məsələlər aydınlığa qovaşacaq və Ermənistanın törətdiyi bütün cinayət əməlləri hüquq müstəvisində dünyaya bəyan ediləcək”.
Günel CƏLİLOVA
