Elşad Həsənov: “Xəstə təfəkkürün nəticəsi Ermənistan üçün ağır oldu”
Ermənistanın gələcəyini beynəlxalq səviyyədə tanınmış sərhədləri, 29 743 kvadrat kilometr ərazisi olan dinc, demokratik və hüquqi dövlət kimi təsəvvür edirəm. Bu sözləri Ermənistan Baş naziri Nikol Paşinyan İT mütəxəssisləri ilə görüşdə deyib.
“Xəyali vətən axtarışını dayandırmalıyıq, çünki Ermənistan Respublikası bizim xəyallarımızın, arzularımızın vətənidir. Başqa vətən axtarmağa ehtiyacımız yoxdur. Vətən arzusunda olanda onu itiririk və artıq arzumuza çatdığımızı anlayanda sakitləşib, diqqətimizi tapşırığa yönəldirik”, – Paşinyan bildirib.
Göründüyü kimi, Paşinyan erməni cəmiyyətinə xəbərdarlıq edir ki, mövcud olanlarla hesablaşın. Əks təqdirdə Ermənistanın mövcudluğu sual altında qalacaq.
“Paşinyan müharibədən sonra anladı ki, Ermənistanın nicatı Azərbaycana qarşı ərazi iddialarından imtina etməkdən keçir”
Sözügedən məsələni “Bakı-Xəbər”ə şərh edən siyasi ekspert Elşad Həsənovun fikrincə, 1918-ci ildə Ermənistan yaradılanda ərazisi 9 min kvadrat kilometr idi: “1920-ci ildə Azərbaycan bolşevik Rusiyası tərəfindən işğal ediləndən sonra ərazilərimizin 20 min kvadrat kilometri Ermənistana verildi. Zəngəzur və Göyçə mahalı Ermənistana verildi. Ondan sonra da zaman-zaman ərazilərimiz qoparılaraq Ermənistana verildi. Beləcə, Ermənistan süni şəkildə böyüdüldü və nəhayət 1984-ci ilin oktyabrında SSRİ Nazirlər Sovetinin qərarı ilə Qazax rayonunun Kəmərli kənd ərazisindən 5 min hektar torpaq sahəsi Ermənistana verildi. Bütün bunlarla ermənilər kifayətlənmədilər və Azərbaycana qarşı ərazi iddiaları ilə çıxış edərək torpaqlarımızı 30 ilə yaxın işğal altında saxladılar. Uzun illər “miatsum” xəstəliyinə yoluxdular. Bütün bu xəstə təfəkkürün nəticəsi Ermənistan üçün ağır oldu. Yüz minlərlə erməni sosial-iqtisadi problemlərlə əlaqədar ölkəni tərk etdi. İşğal amilinə görə Ermənistan təcrid vəziyyətinə düşdü. İndiyə qədər bu ölkənin Türkiyə və Azərbaycanla sərhədləri bağlıdır. Ermənistan regionda həyata keçirilən böyük nəqliyyat və enerji layihələrindən kənarda qaldı. Halbuki, bu layihələr hesabına milyonlar qazana bilərdi. Bu, ölkənin sosial-iqtisadi inkişafına müsbət təsir edərdi. Ancaq Ermənistan bunu etmədi və nəticəsi onlar üçün ağır oldu. Ermənistanın işğalını dünya tanımadı. Ən nəhayət, Azərbaycan öz ərazilərini hərb yolu ilə işğaldan azad etdi. 2022-ci ilin oktyabrında Paşinyan Qarabağın Azərbaycanın tərkib hissəsi olduğunu rəsmən bəyan etdi. Paşinyan Vətən müharibəsindən sonra anladı ki, Ermənistanın nicatı Azərbaycana qarşı ərazi iddialarından imtina etməkdən keçir. Onu buna Azərbaycan Ordusunun şanlı qələbəsi vadar etdi. Yoxsa o, xoşluqla bunu etməzdi. Paşinyan gördü ki, revanşizm həm Ermənistanı fəlakətə aparır, həm də Rusiyadan asılılığı daha da artırır. Ona görə də ara-sıra bəyan edir ki, Ermənistan heç vaxt indiki kimi müstəqil olmayıb”.
Vidadi ORDAHALLI
