Qulamhüseyn Əlibəyli: “Rəsmi İrəvanın bunu Azərbaycanla əlaqələndirməsi doğru yanaşma deyil”
Kollektiv Təhlükəsizlik Müqaviləsi Təşkilatına (KTMT ) üzv ölkələrin Ermənistan qarşısında öhdəliklərini yerinə yetirməməsi ölkənin bu birlikdən azad olunmasını şərtləndirib. Bunu Ermənistanın baş naziri Nikol Paşinyan parlamentdə hökumət saatı zamanı deyib.
“2022-ci ildə biz anlayanda ki, KTMT bizimlə bağlı öhdəliklərini yerinə yetirməyib, yerinə yetirmir və yerinə yetirməyəcək, o an müstəqil olduq, çünki başa düşdük ki, yalnız özümüzə arxalana bilərik”. Baş nazirin sözlərinə görə, KTMT-nin təhlükəsizlik sistemi “köpükdür”. “O, dövlətimizin qurulmasının qarşısını alan vasitədən başqa bir şey deyildi”, - Paşinyan əlavə edib.
Faktiki, Paşinyan Ermənistanın KTMT-dən çıxdığını rəsmən elan etdi.
“Ermənistanın KTMT-dən uzaqlaşmaq istəyi regionun təhlükəsizliyi nöqteyi-nəzərindən düzgün addımdır”
Sözügedən məsələ ilə bağlı fikirlərini “Bakı-Xəbər”lə bölüşən sabiq millət vəkili, hüquqşünas Qulamhüseyn Əlubəyli hesab edir ki, ümumilikdə Ermənistan həm MDB məkanından, həm də KTMT-dən uzaqlaşmağa çalışır: “Paşinyanın uzaqlaşma ilə bağlı səsləndirdiyi arqumentlər bir o qədər tutarlı arqumentlər deyil. Guya KTMT Ermənistan qarşısında öhdəlikləri yerinə yetirmir. Dəqiqləşdirmək lazımdır ki, hansı öhdəlikləri yerinə yetirməyib. Ermənistan Vətən müharibəsi zamanı bir neçə dəfə KTMT-yə müraciət etdi ki, Azərbaycanın öz ərazilərini azad etməsinə mane olsunlar. Bu, tamamilə absurd istək idi. Çünki Qarabağ Azərbaycan ərazisi idi. KTMT-nin müdaxilə etməyə hüquqi əsası yox idi. KTMT Ermənistan ərazisini qorumağa mükəlləf idi. Bu alınmayandan sonra Paşinyan bunu bəhanə edərək KTMT-dən uzaqlaşmağa haqq qazandırmağa çalışır. Bu, əsasən daxili auditoriyaya hesablanmış yanaşmadır. Çünki KTMT müqaviləsinə görə, əgər hər hansı üzv dövlətə müdaxilə olursa, o zaman kollektiv müdaxilə mexanizmi işə düşməlidir. Vətən müharibəsi dövründə Ermənistana hücum olmamışdı. Azərbaycan BMT qətnamələrinə, digər beynəlxalq qanunlara əsaslanaraq ərazilərini işğaldan azad edirdi. Paşinyan və ermənilər düşünürdülər ki, Rusiya ordusu gəlib onların yerinə döyüşəcək. Bu isə baş vermədi. Məsələnin əsl kökü odur ki, Ermənistan Qərbin diqtəsi ilə Rusiyanın regiondan sıxışdırıb çıxarılmasında iştirak edir. Fakt bundan ibarətdir. O cümlədən, müxtəlif bəhanələrlə KTMT-nin işində iştirak etmir. Hətta bir sıra hallarda MDB tədbirlərinə belə qatılmırlar. Bunun mahiyyəti odur ki, Ermənistan Rusiyadan uzaqlaşıb, Avropa İttifaqı ilə əməkdaşlığı genişləndirmək istəyir. Əslində Ermənistanın KTMT-dən uzaqlaşmaq istəyi regionun təhlükəsizliyi nöqteyi-nəzərindən düzgün addımdır. Çünki Ermənistanda Rusiya ordusu mövcud olduqca, bu, region üçün təhdiddir. Qonşu ölkələrin hamısına müəyyən təhlükə yaradır. Rusiyanın oradan çıxması Zəngəzur dəhlizinin təhlükəsizliyi baxımından da vacibdir. Ancaq rəsmi İrəvanın KTMT-dən uzaqlaşmasını Azərbaycanla əlaqələndirməsi doğru yanaşma deyil. Çünki Azərbaycan bu ölkəyə hücum etməyib, işğal altındakı ərazilərini azad edib”.
Vidadi ORDAHALLI
