Təbriz Musayev: “Ərazi iddiaları olmasaydı, Vaşinqtonda sülh sazişi imzalanardı”
Sülh gündəliyi ilə bağlı nailiyyətlər bütün region, o cümlədən Ermənistan və Azərbaycan üçün tarixi əhəmiyyət kəsb edir. Bunu Prezident İlham Əliyev Kopenhagendə Avropa İttifaqı Şurasının Prezidenti Antonio Koşta və Avropa Komissiyasının Prezidenti Ursula Fon der Lyayen ilə görüşündə deyib.
Prezident İlham Əliyev həm Ermənistanın, həm də Azərbaycanın artıq sülh şəraitində yaşamağa uyğunlaşdıqlarını qeyd edib və Azərbaycanın sülh gündəliyinin irəli aparılması üçün səyləri davam etdirəcəyini vurğulayıb.
Yeri gəlmişkən qeyd edək ki, Prezident İlham Əliyevin Kopenhagendə keçirdiyi görüşlər qarşı tərəfin müraciətləri əsasında baş tutub. Bu, Cənab Prezidentin Avropada yüksək nüfuzunun, ona göstərilən böyük hörmətin, eləcə də ölkəmizin müsbət imicinin, ona verilən xüsusi dəyərin və olduqca pozitiv münasibətin göstəricisidir. Prezident Əliyevin keçirdiyi görüşlərdə bu məqam açıq-aşkar özünü göstərirdi.
“Aİ görür ki, Azərbaycan qalib tərəf olsa da, sülh sazişinin imzalanmasında ən çox maraqlı olan tərəfdir”
Sözügedən məsələni “Bakı-Xəbər”ə şərh edən İrəvan Azadlıq Təşkilatının sədri Təbriz Musayevin fikrincə, Prezident Əliyevin Avropa İttifaqı rəsmiləri ilə keçirdiyi yüksək səviyyəli görüşlər mühüm göstəricidir: “Azərbaycanın Aİ ilə əlaqələrinin genişlənməsi vacib əhəmiyyət kəsb edir. Ona görə ki, qurum Azərbaycanın enerji daşıyıcılarının əsas alıcısıdır. Ukrayna müharibəsindən sonra Azərbaycanın məlum səbəblərdən önəmi daha da artıb. O da məlumdur ki, Azərbaycanla Ermənistan arasında gərginliyin qalması Brüssellə Bakı arasında münasibətlərə də zaman-zaman mənfi təsir göstərib. Bununla əlaqədar Azərbaycana yönəlik haqsız tənqidlər olub. Artıq bütün bunlar arxada qaldı. Xüsusən də 8 avqust Vaşinqton görüşündən sonra. Aİ görür ki, Azərbaycan qalib tərəf olsa da, sülh sazişinin imzalanmasında ən çox maraqlı olan tərəfdir. Aİ görür ki, Azərbaycan ərazi bütövlüyünü, suverenliyini tam təmin edəndən sonra sərhəddə atəşkəs pozulmur. Paşinyan Çinə səfər edərkən Azərbaycanın hava məkanından istifadə edir. Ona görə də Brüssel Azərbaycanla bağlı siyasətinə yenidən baxır, ölkəmizə önəm verir. Heç şübhəsiz ki, Ermənistan Konstitusiyasında Azərbaycana qarşı ərazi iddiaları olmasaydı, Vaşinqtonda sülh sazişi imzalanardı. Düzdür, Ermənistan Konstitusiyasında ölkəmizə qarşı ərazi iddialarının olması Paşinyanın günahı deyil. Bu, “dənizdən dənizə böyük Ermənistan” adlı sərsəm zehniyyətin məhsuludur. Hər halda, Ermənistan hakimiyyəti konstitusiya islahatları ilə bağlı daha qətiyyətli addımlar atmalıdır”.
Vidadi ORDAHALLI
