Şakir Ağayev:“İndiki həssas və mürəkkəb dövrdə, seçki ərəfəsində bu hesabatın açıqlanması, ola bilər ki, Paşinyanın seçki kampaniyasına...”
Ermənistan parlamentində 44 günlük müharibə ilə bağlı deputat komissiyasının hesabatının açıq müzakirəsi üstündə mübahisə başlayıb. Mətbuatda gedən məlumatlarda Ermənistan hökuməti hesabatın nəticələrini gizlətməkdə ittiham olunur.
Ermənistan Parlamentinin sədri Alen Simonyan bəyan edib ki, 44 günlük müharibənin vəziyyətini araşdıran istintaq komissiyasının hesabatını gizlətmək niyyəti yoxdur. O bildirib ki, məsələ nəşr faktında deyil, onun formatındadır: “Hesabatı gizlətmək niyyəti ilə bağlı mətbuatda yayılan məlumatlar səhvdir. Məsələ onun dərc edilib-edilməməsində deyil, onun hansı formatda dərc ediləcəyindədir. Hər halda, hesabat dərc olunacaq - dərc olunmaya bilməz. Onun dəqiq necə dərc olunacağı isə başqa məsələdir. Hesabat parlamentin plenar iclasına təqdim edilsə də, onunla bağlı müzakirə qapalı şəkildə aparılacaq”.
O, həmçinin əlavə edib ki, qapalı dinləmələrin keçirilməsini, eləcə də müxalifət deputatları tərəfindən sənədə parlamentin xüsusi qapalı bölməsində baxılmasını istisna etmir. “Başa düsün, Ermənistan Silahlı Qüvvələri ilə bağlı potensial həssas məlumatları özündə əks etdirən reportajı dərc etmək və onu canlı yayımlamaq mümkün deyil” deyə bildirən Simonyan həmçinin qeyd edib ki, bu məsələ parlamentin Reqlamentində aydın şəkildə tənzimlənir və onun fikrincə, istintaq komissiyasının sədri Andranik Köçəryan qanunu yanlış şərh edib.
“Cənab Köçəryana hörmət edərək, “Prosessual Qaydalar haqqında” qanunun şərhi ilə bağlı rəsmi sorğu verdim və üç eyni cavab aldım”, - deyə parlament sədri qeyd edib.
Simonyan vurğulayıb ki, onunla Köçəryan arasında heç bir gərginlik yoxdur - söhbət fərqli yanaşmalardan və hüquqi şərhlərdən gedir.
“Baş nazirə müxalif olanlar, revanşist qüvvələr bu hesabatın açıqlanmasını istəyirlər ki, bunun üzərində manipulyasiya etsinlər...”
“Novoye vremya” qəzetinin baş redaktoru Şakir Ağayev “Bakı-Xəbər”ə bildirdi ki, bu məsələ ətrafında mübahisənin yaranması təsadüfi deyil, çünki Ermənistan hökuməti öz törətdikləri əməllərin ortaya çıxmasını istəmir: “Bu müharibə Nikol Paşinyanın hakimiyyəti dövründə baş verib və Ermənistanın məğlubiyyəti ilə başa çatıb. Qarşıdakı ildə Ermənistanda növbəti seçkilər keçiriləcək və hakimiyyət hesab edir ki, bu hesabatın açıqlanması seçkilərin nəticəsinə təsir göstərə və hökumətin əleyhinə işləyə bilər. Bu səbəbdən də 44 günlük müharibə ilə bağlı yaradılan komissiyanın hesabatını açıqlamaq istəmirlər. Eyni zamanda, ola bilsin, bu hesabatda elə məsələlər var ki, beynəlxalq aləmdə Ermənistanın xeyrinə deyil. Bu, erməni ictimai rəyində də mövcud hakimiyyətə qarşı müyyən mənfi fikirlər yarada bilər. Qənaətimə görə, bu, dediyim məsələlərdən irəli gəlir və Paşinyan hökuməti istəmir ki, Ermənistanın Azərbaycan ərazisində törətdiyi vəhşiliklər, vandalizm aktları, həyata keçirdiyi işğalçı müharibə beynəlxalq ictimaiyyətin diqqətinə çatdırılsın. Həmçinin 44 günlük müharibədə Ermənistanın, Paşinyan hakimiyyətinin məğlubiyyətinin səbəblərini açıqlamaq istəmirlər”.
Ş.Ağayev qeyd etdi ki, 44 günlük müharibədə 10 minlərlə erməni əsgərinin fərarilik etməsinin, Ermənistan ordusunun “məğlubedilməzlik” mifinin darmadağın edilməsinin, Ermənistan hökumətinin səhvlərinin və sair məsələlərin açılması hakimiyyət üçün sərfəli deyil. “Xüsusən də indiki həssas və mürəkkəb dövrdə, seçki ərəfəsində bu hesabatın açıqlanması, ola bilər ki, Paşinyanın seçki kampaniyasına çox böyük təsirlər göstərsin. Ona görə də, müxtəlif bəhanələrlə bu hesabatı gizlətmək istəyirlər. Mübahisənin yaranma səbəbi bundan irəli gələ bilər. Baş nazirə müxalif olanlar, revanşist qüvvələr bu hesabatın açıqlanmasını istəyirlər ki, bunun üzərində manipulyasiya etsinlər, Paşinyan hakimiyyətinə qarşı ittihamlarını daha da genişləndirsinlər”-deyə Ş,Ağayev qeyd etdi.
İradə SARIYEVA
