Bəhruz Quliyev: “Bütün bunlar qurumun növbəti riyakarlığıdır”
Avropa İnsan Hüquqları Məhkəməsi (AİHM) Azərbaycanın üzərinə 23 erməni məhbusun saxlanma şəraiti, sağlamlıq durumu barədə noyabrın 4-dək hesabat vermək öhdəliyi qoyub.
Görünən odur ki, bəzi Avropa təsisatları separatçı terrorçulara hər vasitə ilə qahmar çıxmağa çalışırlar. Əslində bu, bizim üçün yeni bir şey deyil. O baxımdan ki, postsovet məkanında təkcə Qarabağda separatizm mövcud olmayıb. Gürcüstanda, Moldovada, Ukraynada separatizm uzun illərdir mövcuddur. Ancaq Avropanın riyakarlığı ondadır ki, ötən əsrin 90-cı illərindən üzübəri sözügedən separatçı qurumlara münasibətdə sərgilədiyi kəskin münasibəti heç vaxt erməni separatçılarına göstərməyib. Bunun əksinə olaraq onları müxtəlif formada himayə edib, siyasi dəstək veriblər. İndi də bunu başqa formada davam etdirirlər.
Məgər AİHM bilmir ki, separatçıların səhhəti, saxlanma şəraiti, sağlamlığı normaldır?
“Avropa institutları münaqişəni qızışdırmaq, süni şəkildə Azərbaycanı ittiham hədəfinə çevirmək istəyirlər”
Sözügedən məsələni “Bakı-Xəbər”ə şərh edən SƏS Media Qrupunun rəhbəri, politoloq Bəhruz Quliyevin fikrincə, bütün bunlar AİHM-in növbəti riyakarlığıdır: “Avropa İnsan Hüquqları Məhkəməsinin Azərbaycandan 23 erməni əsir barədə hesabat tələb etməsi, əslində, heç bir hüquqi zərurətə söykənmir. Çünki hər kəs yaxşı bilir ki, həmin separatçıların saxlanma şəraiti, sağlamlıq durumu beynəlxalq humanitar normalara tam cavab verir. Azərbaycanın hüquqi dövlət prinsiplərinə əsaslanan mövqeyi ortadadır. Biz heç vaxt mülki şəxslərə və ya əsirlərə qarşı qeyri-insani davranış nümayiş etdirməmişik. Burada başqa bir məqam diqqət çəkir. Avropa yenə də öz ikili standartlarını ortaya qoyur. Ermənilərin Azərbaycanda saxlanma şəraiti ilə bağlı heç bir problem olmadığı halda belə süni gündəm yaratmaq, sanki başqa məqsədlərə xidmət edir. Bu, Avropanın sülh qorxusundan, bölgədə sabitliyin bərqərar olmasından çəkinməsindən xəbər verir. Çünki Azərbaycan bölgədə sülh və əməkdaşlıq gündəliyini irəli aparır, bu isə bəzi dairələrin maraqlarına uyğun deyil. Əslində, belə qərar və öhdəliklər bir daha göstərir ki, Avropa institutları münaqişəni qızışdırmaq, süni şəkildə Azərbaycanı ittiham hədəfinə çevirmək istəyirlər. Əslində, AİHM və digər Avropa qurumları Ermənistanda 30 il ərzində yüz minlərlə azərbaycanlının hüquqlarının pozulmasına, məcburi köçkünlərin vəziyyətinə, minlərlə günahsız insanın qətlə yetirilməsinə heç vaxt bu cür təcili reaksiya verməyiblər. Deməli, məsələ humanitar deyil, siyasi xarakter daşıyır. Azərbaycan isə heç kimdən çəkinmədən həqiqəti deyir ki, əsirlərin sağlamlığı da, saxlanma şəraiti də normaldır. Hesab edirəm ki, problem Avropanın özündədir - onların illərlə şahidi olduğumuz ədalət anlayışında, ikili yanaşmasında və münaqişə ocaqlarını qoruma siyasətindədir”.
Vidadi ORDAHALLI
