Sahil Kərimli: “Əldə olunan sülhün müəllifinin birbaşa İlham Əliyev olduğunu etiraf etmək istəməyib...”
Ermənistanın Baş naziri Nikol Paşinyan sentyabrın 30-da Avropa Şurası Parlament Assambleyasının (AŞPA) payız sessiyasında çıxışında Ermənistan ilə Azərbaycan arasında əldə olunmuş sülhü yüksək qiymətləndirdiyini bildirib: “Əldə etdiyimiz yeni sülhün bu gün 1 ay 22 günü tamam olur. Biz bu sülhün qayğısına qalmalıyıq, qorumalıyıq ki, daha da möhkəmlənsin”.
Sülhün əldə olunmasında Azərbaycanın rolunu xüsusi qeyd edən Paşinyan deyib: “Mən məmnunluqla qeyd edirəm ki, bu gün Ermənistan ilə Azərbaycan arasında sülh var. Amma mən deyə bilmərəm ki, bu yalnız Ermənistan hökumətinin və erməni xalqının xidmətidir. Bu, eləcə də Azərbaycan dövlətinin və Azərbaycan xalqının nailiyyətidir. Əgər Azərbaycan tərəfinin də əzmi olmasa idi, sülh də olmazdı. Bu, eyni zamanda, Azərbaycan və Ermənistan parlamentlərinin nailiyyətidir”.
Paşinyana nələr mane oldu desin ki, bu sülh İlham Əliyevin nailiyyətidir?
“Əsas səbəblərdən biri daxildəki revanşist və müxalif qüvvələrin, eləcə də erməni diasporunun basqısından və təzyiqindən çəkinməsidir”
Politoloq Sahil Kərimli “Bakı-Xəbər”ə şərhində bildirdi ki, Ermənistanın baş naziri Nikol Paşinyanın AŞPA-da sülh sazişindən danışması Ermənistanın növbəti dəfə sülhə aparan yolda konstruktiv mövqeyi kimi qiymətləndirilə bilər. “Amma Paşinyan bu məsələdə bir qədər detallı və daha dəqiq danışmalı idi. Çünki Azərbaycan dövləti, şəxsən Azərbaycan Prezidenti İlham Əliyev uzun müddətdir ki, bölgədə dayanıqlı və ədalətli sülhün, təhlükəsizliyin bərpa olunması istiqamətində yorulmaz fəaliyyət göstərib. Şəxsən Azərbaycan Prezidentinin beynəlxalq nüfuzu, ona olan beynəlxalq inam və etibarın nəticəsidir ki, Azərbaycan Ermənistanı sülhə məcbur etmək istiqamətində çox ciddi nailiyyətə imza atdı, böyük bir uğur qazandı. Biz bu gün artıq bölgənin gələcək taleyini həll etmək üçün Azərbaycan dövlətinin qətiyyətli mövqeyini görürük və tezliklə Ermənistanla sülh müqaviləsinin imzalanması da artıq real görünür”.
S.Kərimli qeyd etdi ki, bu istiqamətdə Azərbaycan 44 günlük Vətən müharibəsindən sonra 1 günlük antiterror tədbirləri nəticəsində öz ərazi bütövlüyünü tam bərpa etdikdən sonra bölgədə tamamilə yeni reallıqlar yaratdı və şəxsən Prezident Əliyevin yürütdüyü qətiyyətli, milli və dövlətçilik maraqlarımıza əsaslanan siyasətin bu gün bəhrələri ortadadır. “Xüsusilə də avqust ayında ABŞ prezidenti Donald Trampın şahidliyi ilə keçirilən görüşdə Azərbaycan lideri və Ermənistanın baş naziri arasında əldə olunmuş razılıq, səsləndirilən bəyanatlar da bunun bariz nümunəsi kimi qiymətləndirilməlidir. Bu gün Azərbaycan Cənubi Qafqazda sülh və təhlükəsizliyin əldə olunması, nəqliyyat-kommunikasiya xətlərinin açılması, xüsusilə də Orta Dəhlizin əsas açarı olan Zəngəzur dəhlizinin (Tramp yolu) fəaliyyətə başlaması üçün bütün imkanlarını səfərbər edib. Burada biz yenə də Azərbaycan Prezidenti İlham Əliyevin praqmatik və qətiyyətli siyasətini vurğulamalıyıq. Bu baxımdan, Ermənistanın baş naziri Nikol Paşinyan AŞPA-dakı çıxışında Azərbaycan Prezidentinin bu sahədə apardığı siyasəti, bu sülhün onun sayəsində əldə olunduğunu vurğulasaydı daha yaxşı olardı. Amma görünür o, hansısa səbəbdən bunu deməyib, ya demək istəməyib. Bilirsiz, burda söhbət müəyyən məsələlərdən gedir. Fikrimcə, əldə olunan sülhün müəllifinin birbaşa İlham Əliyev olduğunu etiraf etmək istəməyib, belə bir etirafda bulunmaqdan çəkinib. Paşinyanın bunu etiraf etməməsinin əsas səbəblərindən biri daxildəki revanşist və müxalif qüvvələrin, eləcə də erməni diasporunun basqısından və təzyiqindən çəkinməsidir. O, revanşist qüvvələrin təzyiqindən çox çəkinir və bu səbəbdən deməyib ki, məhz sülhün müəllifi Azərbaycan Prezidentidir” - deyə S.Kərimli qeyd etdi.
İradə SARIYEVA
