Türkiyənin Haber Global televiziya kanalında gedən verilişlərdən birində məlumat verilib ki, İsrail ordusunda qəzzalılara qarşı vuruşan Türkiyə vətəndaşları var və olub. Yəni Qəzzada soyqırım əməliyyatları aparan İsrail ordusunda könüllü Türkiyə vətəndaşları da iştirak ediblər.
Sözügedən kanala görə, hətta bir qadın türk könüllüsünün sosial şəbəkə hesabında bununla bağlı status da paylaşılıb. Könüllü türk əsgər qadın sosial şəbəkə hesabında yazıb ki, Qəzzada biz özümüz üçün "qırmızı xətt" çəkdikmişdik və həmin xətti bilmədən keçən qəzzalı sivilləri bir-bir vururduq. “O sivil qəzzalı hardan biləydi ki, orda "qırmızı xətt" var, o xətti keçmək olmaz, bu xətti biz bilirdik, onlar bilmirdilər”-deyə paylaşımda bildirilib. Bu məsələ böyük qalmaqal yaradıb və bununla əlaqədar Türkiyədə dövlət səviyyəsində bir araşdırma gedir ki, Qəzzada qəzzalılara qarşı İsrailin tərəfində könüllü muzdlu kimi döyüşən türk vətəndaşları kimlər olub. Onların kimliyi araşdırılır.
Aydın Quliyev: “Türkiyəyə qarşı çox dərin düşünülmüş bir kompromat ssenarisi ortadadır”
"Bakı-Xəbər" qəzetinin Baş redaktoru, politoloq Aydın Quliyev öz facebook hesabında bu məsələ barədə “Qəzzadakı soyqırımlarda Türkiyə vətəndaşlarının da könüllü iştirak iddiası çıxdı...” başlıqlı maraqlı paylaşım edib.
A.Quliyev yazır:“Türkiyə TV-ləri dəhşətli xəbər yaydı - Qəzzada soyqırım əməliyyatları aparan İsrail ordusunda könüllü Türkiyə vətəndaşları da iştirak ediblər. Hətta bir qadın türk könüllüsünün sosial şəbəkə hesabında yazdığı status da paylaşılıb. Könüllü türk qadın Qəzzada öz düşüncələrinə uyğun "qırmızı xətt çəkdiklərini və həmin xətti bilmədən keçən qəzzalı sivilləri bir-bir qətl etdiklərini bildirir...Dəhşət....Bu nədir?
Həqiqətdirsə, Türkiyə dövlətinin “soyqırım ittihamı” ilə etiraz etdiyi Qəzza müharibəsinə Türk vətəndaşları hansı məntiqlə və hansı maraqla qoşulublar??? Yalandırsa, Türkiyəyə qarşı çox dərin düşünülmüş bir kompromat ssenarisi ortadadır.
Həm də bu olayın Trampın 20 maddəlik hələ mübahisəli qarşılanan Qəzza həll planı ilə eyni vaxtda açıqlanması təsadüfdürmü???
Qardaş ölkənin xüsusi xidmət və hüquq-mühafizə orqanları üçün çox gərgin bir araşdırma sırası gəlib...
Görək, ortaya daha nələr çıxacaq...”
Azər Həsrət: “...Bu məsələyə bir aydınlıq gətirilməlidir”
Siyasi şərhçi Azər Həsrət yayılan məlumatla bağlı “Bakı-Xəbər”ə bildirdi ki, bu müharibədir və əlbəttə, müharibədə yazılan və yazılmayan qanunlar var. “Müharibəni dövlətlər aparır, dövlətlərin əsgərləri bu müharibədə iştirak edir, eyni zamanda belə vəziyyətlərdən sui-istifadə edən qüvvələr də öz əməllərindən qalımırlar. Qardaş Türkiyənin Qəzza müharibəsinə münasibəti hamımıza bəllidir. Yəni Türkiyə birmənalı şəkildə Qəzza ərəblərinin yanındadır, İsrailə qarşıdır. Bu, dövlətin mövqeyidir. Amma əlbəttə ki, 85 milyon insanın, yəni Türkiyə xalqının hamısı birmənalı şəkildə bu mövqeyi dəstəkləmir. Dəstəkləməsi də mümkün deyil. Çünki Türkiyə daxildə siyasi cəhətdən çox rəngarəngdir, fərqli mövqelər həddən artıq çoxdur. İsrailə müsbət yanaşanlar da az deyil. Baxmayaraq ki, hakimiyyət İsrailə qarşı sərt münasibət sərgiləyir, hətta deyərdim, vəzifə başında olan, yaxud da bu və digər şəkildə səlahiyyət sahibi olan adamların arasında da yəqin ki, İsrailə rəğbət bəsləyən az deyil. Yəni insanların fərqli düşünmə haqqı var və heç kim də onları fərqli düşünməkdən çəkindirə bilməz. Hətta görünür iş o həddə qədər gedib çata bilib ki, insanların bəziləri gedib könüllü şəkildə İsrail tərəfindən döyüşən orduya yazılıblar və Qəzzaya, daha dəqiq desək, HƏMAS-a qarşı müharibədə iştirak ediblər, bəlkə də edirlər. Biz onların sayı barədə heç nə deyə bilmərik. Amma ən azından mümkündür ki, bir neçə nəfər, hətta onlarla, yüzlərlə şəxs gedib orda HƏMAS-a qarşı vuruşsun. HƏMAS bir terror təşkilatıdır. Bunu biz Azərbaycanda çox gözəl bilirik, dünya da bunu belə qəbul edir. Yəqin ki, Türkiyə vətəndaşları arasında da bu gerçəyi bilənlər az deyil. Yəni onlar da haqqın-ədalətin yanında olduqlarını düşünərək İsrail ordusuna qoşulub HƏMAS-a qarşı müharibədə iştirak ediblər. Yəni belə şeylər mümkündür. Ona görə də düşünürəm ki, qardaş ölkədə bəzən Azərbaycanı İsrailə münasibətinə görə ittiham edənlər indi məsələlərə bu istiqamətdən baxsınlar”.
A.Həsrət qeyd etdi ki, Türkiyənin özü İsrailə qarşıdır, amma vətəndaşı gedib İsrail ordusunun tərkibində HƏMAS-a qarşı vuruşur. “Yəni Türkiyədə bu məsələyə bir aydınlıq gətirilməlidir. Sual verilməlidir ki, necə olur bizim dövlətimiz İsrailə qarşıdır, amma vətəndaşımız gedib İsrailin tərəfində HƏMAS-a qarşı vuruşur? Bəlkə nəsə yerində deyil? Bəlkə də Türkiyə o məsələyə münasibətdə ümumiyyətlə ən doğru strategiyanı seçməyib və vətəndaş da düşünür ki, dövlətim düz etmir, doğru olanı özüm edəcəyəm? Yəni belə şeylər var. Ona görə də istərdik ki, Türkiyədə yatıb-qalxıb Azərbaycana hücum edənlər bir də məsələlərin bu yönünü diqqətə alsınlar. Yəni Azərbaycan şükürlər olsun, gedib İsrailin tərəfində Qəzzaya, HƏMAS-a qarşı vuruşmur. Bir nəfər azərbaycanlı belə orda yoxdur. Buna şübhə yaradacaq heç bir informasiyaya rast gəlməmişik”-deyə A.Həsrət bildirdi.
Leyla QARAXANLI
