Əli Orucov: “Məgər dəhlizin adı “Tramp yolu” olanda, bu nəyisə dəyişir?”
Ermənistan baş nazirinin müavini Mqer Qriqoryan Müstəqil Dövlətlər Birliyinin Hökumət Başçıları Şurasının Minskdə keçirilən iclasına onlayn formatda qatılıb. Qriqoryan cari ilin birinci yarısında Ermənistanla MDB ölkələri arasında ticarət dövriyyəsinin təqribən 4 milyard dollar təşkil etdiyini bildirərək, bu rəqəmin ötən ilin eyni dövrü ilə müqayisədə bir qədər azaldığını bildirib.
Qriqoryan Azərbaycanın baş naziri Əli Əsədovun çıxışına cavab olaraq “Zəngəzur dəhlizi” ifadəsindən çəkinməyin zəruriliyini bildirib. O xatırladıb ki, ölkələr arasında imzalanmış yüksək səviyyəli sənədlərə əsasən, “Trampın beynəlxalq sülhə və rifaha aparan yolu” ifadəsi işlədilməlidir. Baş nazirin müavini çıxışında onu da qeyd edib ki, müasir infrastruktur yaradılmadan, səmərəli nəqliyyat-kommunikasiya logistikası qurulmadan davamlı və hərtərəfli iqtisadi inkişaf mümkün deyil.
Görünən odur ki, erməni rəsmiləri Zəngəzur sözündən belə çox narahatdırlar.
“Gələn il ölkədə parlament seçkiləri keçiriləcəyindən, hakimiyyət bu təbliğatın onların əleyhinə işləyə biləcəyindən narahatdır”
Sözügedən məsələni “Bakı-Xəbər”ə şərh edən AMİP funksioneri Əli Orucovun fikrincə, bütün bunlar Ermənistan tərəfinin Zəngəzur dəhlizindən duyduğu narahatlıqdan irəli gəlir: “Dəhliz sözünü eşidəndə ermənilərdə sanki patoloji aqressiya baş qaldırır. Halbuki, burada qeyri-adi heç nə yoxdur. O mənada ki, məgər Azərbaycan Ermənistan ərazisindən başqa dövlətə maneəsiz keçid tələb edir? Əlbəttə ki, yox. Hamıya məlum olduğu kimi, burada söhbət Azərbaycan eksklavı olan Naxçıvanla quru əlaqəsinin təmin edilməsindən gedir. Bu, bütün dünyada qəbul edilən bir yanaşmadır. Məsələn, Rusiyanın ərazisi olan Kalininqrad vilayəti ilə birbaşa quru əlaqəsi yoxdur. Ora gərək ya gəmi ilə gedəsən, ya da digər ölkə ərazisini keçməklə. İllər əvvəl Rusiya Litva ilə razılaşaraq Kalininqrada dəhliz vasitəsilə gediş-gəlişi təmin etdi. Suvalki dəhlizi Kalininqradla Belarusu birləşdirən, Litva ərazisindən keçən təxminən 100 kilometr uzunluğunda olan quru dəhlizidir. Məgər dəhlizin adı “Tramp yolu” olanda, bu nəyisə dəyişir? Hesab edirəm ki, yox. Çünki 8 avqustda Ermənistan Naxçıvana maneəsiz gediş-gəlişlə bağlı razılıq verib. O baxımdan Azərbaycanın bu yolu Zəngəzur dəhlizi adlandırmasında heç bir qəbahət yoxdur. Erməni rəsmilərinin bu narahatlığı həm də revanşist müxalifətin fəallaşması ilə əlaqədardır. Çünki Rusiyaya bağlı bu müxalifət davamlı olaraq belə bir təbliğat aparır ki, Paşinyan hakimiyyəti yalnız Azərbaycanın şərtlərini qəbul edir. Guya bunun qarşılığında Ermənistana heç nə verilmir və s. Gələn il ölkədə parlament seçkiləri keçiriləcəyindən, hakimiyyət bu təbliğatın onların əleyhinə işləyə biləcəyindən narahatdır. Fikrimcə, istər Nikol Paşinyanın, istərsə də Mqer Qriqoryanın Zəngəzur dəhlizinə bu dərəcədə həssas yanaşması qarşıdakı seçkilərlə bağlıdır”.
Vidadi ORDAHALLI
