Azər Həsrət: “Pakistanın bu addımı atmasında qeyri-adi, bizi narahat edəcək heç bir şey yoxdur”
Pakistanın xarici işlər naziri İshaq Dar və onun erməni həmkarı Ararat Mirzoyan arasında telefon danışığı olub. Bu barədə Pakistanın xarici işlər naziri "X" sosial şəbəkəsindəki səhifəsində məlumat verib.
“Ermənistanın xarici işlər naziri Ararat Mirzoyanla bu gün mehriban telefon danışığımız olub və Pakistanla Ermənistan arasında diplomatik münasibətlərin qurulması imkanlarını nəzərdən keçirmək barədə razılığa gəldik”, - nazir yazır.
Diplomatik münasibətləri olmayan ölkələrin ali diplomatları arasında telefon danışığının təşəbbüskarının kim olduğu bəlli deyil.
Məlumat üçün qeyd edək ki, İslamabad hələ də İrəvanla diplomatik əlaqələr qurmayıb və bu qərar sırf Azərbaycan ərazilərinin Ermənistan tərəfindən işğalına cavab olaraq verilib.
O da məlumdur ki, Azərbaycanla Ermənistan arasında hələ sülh sazişi imzalanmayıb. Bunun konkret olaraq nə vaxt baş verəcəyi də məlum deyil. Belə olan halda Pakistanla Ermənistan arasında diplomatik münasibətlərin qurulmasının vaxtıdırmı?
Sözügedən məsələni baki-xeber.com-a şərh edən siyasi şərhçi Azər Həsrətin fikrincə, Pakistanın belə yanaşmasını təmkinli qarşılamalıyıq: “Əlbəttə ki, günün birində Pakistan da Ermənistanla diplomatik münasibətlər quracaq. Yəni əgər Azərbaycan barışığa gedirsə, artıq sülh sazişi paraflanıbsa, tərəflər ortaq məxrəcə gəlibsə, o zaman faktiki olaraq ciddi problem qalmayıb. Problem qalmadığına görə də Azərbaycanın tərəfində olub Ermənistana qarşı cəbhədə mövqe tutanlar da, Bakının addımlarını təkrarlayacaqlar. Hər halda Pakistan bütün bunları yaxından izləyir və ona görə qərar verir. Yəni biz artıq Ermənistanla diplomatik əlaqələr qurmağa hazırlaşırıqsa, təbiidir ki, qardaş, dost Pakistan da bunu etməkdə sərbəstdir. Üstəlik, bu, bizi narahat edəcək bir addım deyil. Bu baxımdan hesab edirəm ki, Azərbaycan ictimai rəyi Pakistanın bu yanaşmasını top-tüfənglə qarşılamamalıdır. Çünki 90-cı illərin o çətin illərində, dünyanın bizi eşitmək istəmədiyi illərdə Pakistan bütün varlığı ilə arxamızda, yanımızda olub. Bizim sözümüzü deyib, həmişə Azərbaycana qucaq açıb. Pakistan Azərbaycanın dövlət müstəqilliyini rəsmən tanıyan, onunla diplomatik əlaqələr yaradan və Azərbaycanda səfirliyini açan ilk müsəlman dövlətlərindən biridir. Birinci Qarabağ müharibəsi dövründə 1993-cü ilin aprelində Ermənistan hərbi qüvvələri tərəfindən Kəlbəcərin işğal edilməsi məsələsi BMT Təhlükəsizlik Şurasının müzakirəsinə çıxarılarkən Azərbaycanın ərazi bütövlüyünün bərpasını tələb edən 822 saylı qətnamənin qəbul edildiyi iclasa Pakistan sədrlik edirdi. Azərbaycanın ərazi bütövlüyünü təsdiqləyən qətnamələr məhz Pakistanın dəstəyi ilə qəbul olundu. Bütün bunları unuda bilərikmi? Təbii ki, bundan söhbət belə gedə bilməz. Bundan sonrakı dövrdə isə məntiq də onu deyir ki, Azərbaycan əgər Ermənistanla münasibətləri normallaşdırırsa, qardaş Türkiyə bunu edirsə, Pakistanın da bu addımı atmasında qeyri-adi, bizi narahat edəcək heç bir şey yoxdur. Zatən onlar – istər Türkiyə, istər Pakistan Azərbaycanın mövqeyini, münasibətini mütləq nəzərə alıb bu cür hərəkət edirlər”.
Vidadi ORDAHALLI
