Tural İsmayılov: "Paşinyan “qaçılmaz seçim”dən danışsa da, əslində Ermənistan heç birini tam seçə bilmir"
İndiyə qədər Ermənistanın eyni zamanda həm Aİ-yə, həm də Aİİ-yə üzv olmasının qeyri-mümkünlüyü müxtəlif səviyyələrdə müzakirə mövzusuna çevrilib. Lakin bu vaxta qədər Ermənistan hakimiyyətindən buna konkret münasıbət yox idi, axır ki, dilləndilər...
İrəvan başa düşür ki, Aİ və Aİİ-yə eyni vaxtda üzvlük mümkün deyil. Bunu Ermənistanın baş naziri Nikol Paşinyan hökumətin iclasından sonra keçirilən brifinqdə deyib.
Bundan əvvəl Rusiya səfirliyi məlumat vermişdi ki, Rusiya baş nazirinin müavini Aleksey Overçukun İrəvana səfəri zamanı Rusiya tərəfi erməni həmkarlarına Aİİ və Aİ-nin normativ-hüquqi bazasında əhəmiyyətli uyğunsuzluqlar olduğunu göstərib.
“Mən dəfələrlə beynəlxalq platformalarda bəyan etmişəm ki, Aİ və Aİİ-yə üzvlük mümkün deyil və seçimin qaçılmaz olduğu vaxt gələndə biz müvafiq qərar qəbul edəcəyik”, - Paşinyan bildirib.
Elə isə, Ermənistan bu iki yoldan hansını seçəcək?
Baki-xeber.com-a məsələni şərh edən siyasi şərhçi Tural İsmayılov bildirdi ki, Paşinyanın dediyi o cümlə əslində Ermənistanın hansı divara dirənəcəyinin etirafıdır: "Çünki nə Aİ-yə, nə də Aİİ-yə eyni anda üzv olmaq mümkün deyil – biri Qərbin, biri Rusiyanın layihəsidir. İkisi də Ermənistanın zəif dövlətçiliyini öz tərəfinə çəkmək üçün geosiyasi alət kimi istifadə edir.
Əgər Ermənistan Aİ yolunu seçsə, bu, Rusiyadan qopmağın və Qərbin təhlükəsizlik çətirinə girməyin cəhdi olacaq. Ancaq reallıq budur ki, Ermənistanın nə iqtisadi, nə də siyasi infrastrukturu Avropa inteqrasiyasına hazırdır. Aİ-yə üzvlük prosesləri on illərlə çəkir, həm də Brüssel Ermənistanı strateji aktiv deyil, daha çox Rusiya əleyhinə kart kimi görür.
Əgər Ermənistan Aİİ yolunu seçsə, bu, Moskvanın orbitində qalmaq deməkdir. Rusiya üçün Ermənistan ucuz geosiyasi dayaq nöqtəsidir. Ancaq Ukrayna müharibəsindən sonra Moskvanın gücü zəiflədiyinə görə, bu yol da İrəvana real perspektiv vəd etmir. Ermənistan iqtisadiyyatını Rusiya bazarına bağlasa belə, uzunmüddətli inkişaf imkanı yoxdur.
Yəni Paşinyan “qaçılmaz seçim”dən danışsa da, əslində Ermənistan heç birini tam seçə bilmir. Çünki Aİ-yə getmək daxildə siyasi qarşıdurma yaradır, Aİİ-də qalmaq isə Qərblə münasibətləri tam məhv edir.
Nəticə: Paşinyan məcburən Aİ xəttini davam etdirəcək, amma tam inteqrasiya deyil, imitasiya ilə, yəni Avropaya yaxınlaşma görüntüsü yaradacaq, amma iqtisadi və təhlükəsizlik baxımından hələ uzun müddət Rusiya orbitində qalacaq.
İrəvanın problemi odur ki, böyük oyunçuların taxtasında fiqur olmaqdan başqa alternativi yoxdur".
Dəniz NƏSİRLİ
