Azər Həsrət: “İsrailin baş nazirinə izah edildi ki, belə məsələlərlə manipulyasiya etmək olmaz, bu məqbul deyil, Türkiyə də, Ermənistan da bunu qəbul etməyəcək”
İsrailin baş naziri Benyamin Netanyahunun son addımları, yəni bir neçə gün əvvəl ilk dəfə olaraq saxta “erməni soyqrımını” tanıdığını bəyan etməsi Türkiyə ilə yanaşı Ermənistanda da etirazlar doğurub.
Düzdür, bu, erməni lobbisinin, diaspor qurumlarının və radikal, revanşist qüvvələrin xoşuna gəlsə də, Paşinyan hökumətinin narazılığına səbəb olub.
Məsələ burasındadır ki, ilk dəfə Türkiyə və Ermənistan bu məsələdə üst-üstə düşən mövqe nümayiş etdirib, tərəflər Netanyahunun bu bəyanatına sərt reaksiya veriblər.
Ermənistanın baş naziri Nikol Paşinyan Netanyahunun "erməni soyqırımı"nı tanımasına etiraz edərək bildirib ki, bunun Ermənistan Respublikasının və erməni xalqının maraqları ilə heç bir əlaqəsi olmadığı açıq-aydın görünür: “Və ümumiyyətlə başa düşməliyik ki, bununla biz erməni soyqırımının tanınması və ya tanınmamasının başqalarının əlində geosiyasi sikkə olmasını istəyirik. Bunun dövlətimizin və xalqın maraqları ilə heç bir əlaqəsi yoxdur”.
Bildirək ki, Türkiyə İsrail baş naziri Benyamin Netanyahunun 1915-ci il hadisələrinə dair qondarma “erməni soyqırımı”nı tanıması ilə bağlı açıqlamasına sərt reaksiya verib.
Bu barədə Türkiyə Xarici İşlər Nazirliyinin açıqlamasında bildirilir: “Netanyahunun 1915-ci il hadisələri ilə bağlı bəyanatı keçmişin ağrılı səhifələrindən siyasi məqsədlər üçün istifadə cəhdidir. Fələstin xalqına qarşı törədilən cinayətlərdə roluna görə mühakimə olunan Netanyahu özünün və hökumətinin əməllərini ört-basdır etməyə çalışır. Biz tarixi və hüquqi faktlara uyğun olmayan bu bəyanatı qətiyyətlə qınayır və rədd edirik”.
Netanyahunun qondarma erməni soyqırımı ilə bağlı bəyanatı həm türk, həm də erməni dövlətləri tərəfindən niyə belə süngü ilə qarşılandı?
“Uzun illərdən sonra həm Türkiyənin, həm də Ermənistanın bu məsələ ilə bağlı mövqeyi faktiki olaraq üst-üstə düşdü”
Siyasi şərhçi Azər Həsrət “Bakı-Xəbər”ə bildirdi ki, Ermənistan uzun illərdən sonra nəhayət ki, sakitlik və sabitlik zolağına qədəm basmaq istəyir: “Təbiidir ki, onun bu yolda qarşısını kəsən faktorlardan qurtarmağın vacib olduğunu anlayır. O cümlədən də bu qondarma soyqırımın ermənilərin başına onillərdir açdığı oyunlardan onların xəbəri var. Yəni Ermənistan dəxli olmadan süni şəkildə uydurulmuş bir soyqırımın əsiri halındadır. Həmin o uydurma soyqırım Ermənistanın bir dövlət kimi, özəlliklə də regionda inteqrasiyasına ciddi əngəl törədir. Qonşu dövlətlər - Azərbaycan Respublikası və qardaş Türkiyə ilə münasibətlərin qurulmasında bu uydurulmuş yalan Ermənistana ciddi maneələr törədir. Belə bir şəraitdə Ermənistanın baş naziri Nikol Paşinyan artıq dəfələrlə bəyan edib ki, bu məsələyə yenidən baxılmalıdır, qonşu dövlətlərlə münasibətlərdə bu yalan bizim əl-ayağımıza dolaşmamalıdır. Yəni Ermənistanın özünün bu yalan soyqırım iddiasından imtina etməyə hazırlaşdığı bir vaxtda İsrailin baş nazirinin durub belə bir məsələyə münasibət bildirməsi, onu gündəmdə tutmağa çalışması, əlbəttə ki, məqbul sayıla bilməz. Ona görə də həm qardaş Türkiyə kimi bir dövlətə “erməni soyqırımı” ilə bağlı böhtan atılır, həm də böhtanı atan tərəf kimi qəbul edilən Ermənistan indiki mərhələdə belə bir qondarma məsələnin gündəmdə tutulmasından narahat olmalı idi və narahatdır. Yəni həm Ermənistan, həm də Türkiyə İsrailin baş nazirinin bu yalanı diri tutmağa çalışmasından təbii şəkildə narahatdır. Müsbət haldır ki, uzun illərdən sonra həm Türkiyənin, həm də Ermənistanın bu məsələ ilə bağlı mövqeyi faktiki olaraq üst-üstə düşdü. Yəni İsrailin baş nazirinə izah edildi ki, belə məsələlərlə manipulyasiya etmək olmaz, bu məqbul deyil, Türkiyə də, Ermənistan da bunu qəbul etməyəcək”.
A.Həsrətin sözlərinə görə, əslinə qalanda İsrailin baş naziri Benyamin Netanyahu dəxli olmadan bu məsələni gündəmə gətirməklə (iddia edə bilər ki, mənə sual vermişdilər cavab vermişəm-A.H) özünü pis vəziyyətə qoyub: “Onun kimi təcrübəli siyasət və dövlət adamı bu səhvi etməməli idi, amma edib. Əlbəttə ki, yükünü də çəkməli olacaq. Həm Ermənistana, həm də Türkiyəyə, Türkiyə ilə bərabər də Azərbaycana, eləcə də bütövlükdə türk dünyasına cavab verməli olacaq. Biz Netanyahunun bu davranışını qınamışıq və qınamağa da davam edəcəyik. Azərbaycan-İsrail münasibətləri nə qədər yaxşı olsa da, İsrail rəsmiləri qardaş Türkiyəyə dil uzatmamalıdır. Uzatdıqları və uzadacaqları təqdirdə, əlbəttə, bizi də, yəni azərbaycanlıları da qarşılarına almış olurlar”.
İradə SARIYEVA
