Ceyhun Məmmədov: “Şuşa Bəyannaməsi hüquqi və strateji baxımdan çox önəmli razılaşmadır”
Prezident İlham Əliyev “Əl-Ərəbiyyə” telekanalına müsahibəsində deyib ki, Şuşa Bəyannaməsi hüquqi cəhətdən təkcə hər iki ölkə üçün deyil, bütün Türk dünyası üçün mühüm amildir:
“Türkiyə ilə bizim çox sıx münasibətlərimiz var və bu münasibətlər hazırda 2021-ci ildə Şuşada Prezident Ərdoğanla imzaladığımız, bizi hərbi və siyasi müttəfiqlər edən Bəyannaməyə əsaslanır. Bu, hüquqi cəhətdən təkcə hər iki ölkə üçün deyil, bütün Türk dünyası üçün mühüm amildir. Keçən il biz Özbəkistanla müttəfiqlik münasibətləri haqqında Müqavilə imzaladıq. Həmçinin Türk Dövlətləri Təşkilatının digər üzvləri ilə bizim strateji tərəfdaşlıq müqavilələrimiz və ya bəyannamələrimiz var. Beləliklə, bu, böyük potensialdır. Bizi köklərimiz birləşdirir və bu, təşkilatı nadir edir. Çünki digər beynəlxalq təşkilatlara baxsaq, onların hamısını deyil, bəlkə də bir qismini ortaq etnik qrup birləşdirir. Bəli, biz müxtəlif xalqlarıq, amma hamımızın kökləri ortaqdır və bu, türk etnik mənsubiyyətimizdən irəli gəlir”.
“Bütün bunlar bizə imkan verir ki, türk dünyası ilə əlaqələri daha da gücləndirək”
Sözügedən məsələni “Bakı-Xəbər”ə şərh edən millət vəkili Ceyhun Məmmədovun fikrincə, Cənab Prezident sözügedən müsahibədə çox vacib məsələlərə toxundu: “Eyni zamanda çox önəmli mesajlar verdi. Bu mesajlar içində ən önəmli məsələlərdən biri də Azərbaycanın türk dövlətləri ilə genişlənən əlaqələridir. Bununla bağlı ölkə başçısı bir neçə önəmli məqama toxundu. Bunlar da ondan ibarət idi ki, bu gün Azərbaycan-Türkiyə münasibətləri ən yüksək səviyyədədir. Biz bu münasibətləri strateji müttəfiqlik səviyyəsinə qaldırmışıq. Şuşa Bəyannaməsi hüquqi və strateji baxımdan çox önəmli razılaşmadır. Bəyannamə bu gün iki ölkə münasibətlərinin inkişafında, münasibətlərin tənzimlənməsində mühüm rol oynayan sənəddir. Bu gün Azərbaycan-Türkiyə münasibətləri sürətlə inkişaf edir və özünün yeni mərhələsinə daxil olur. Təbii ki, bütün bunların əldə edilməsində Prezident İlham Əliyevin yeritdiyi incə siyasəti xüsusi qeyd etmək lazımdır. Bu baxımdan Şuşa Bəyyannaməsi sıradan bir sənəd deyil. Sözügedən sənədin çox önəmli tərəfləri var. Bu, təkcə Azərbaycan və Türkiyə üçün deyil, bütün türk dünyası üçün olduqca vacib bir sənəddir. Eyni zamanda Azərbaycan Özbəkistanla da müttəfiqlik münasibətləri haqqında müqavilə imzalayıb. Digər türkdilli dövlətlərlə də belə bir sənəd imzalanmaqdadır. Bütün bunlar bizə imkan verir ki, türk dünyası ilə əlaqələri daha da gücləndirək. Bununla bağlı Prezidentin yeritdiyi siyasət, atdığı addımlar çox vacibdir. Bütün bu əlaqələr Turan ideyasının həyata keçməsi baxımından xüsusi önəm və vacib əhəmiyyət kəsb edir. Biz çalışırıq ki, bütün məqsədlərimizə, qarşıya qoyduğumuz hədəflərə çataq. Azərbaycanın apardığı düşünülmüş, rasional siyasət hər keçən gün bizi öz hədəflərimizə yaxınlaşdırır. Azərbaycan yeni-yeni uğurlara, naliyyətlərə doğru irəliləyir”.
Vidadi ORDAHALLI
