Aydın Mirzəzadə: “Cənab Prezidentin Donald Trampa verdiyi qiymət doğrudan da obyektivdir”
Prezident İlham Əliyev Əl-Ərəbiyyə kanalına müsahibəsində müxtəlif məsələlərlə bağlı fikirlər bildirib.
Müxbirin “Cənab Prezident, Siz Prezident Trampla görüş keçirdiniz. Mən onu Amerika prezidentləri arasında müstəsna şəxsiyyət hesab edirəm. Görüş zamanı Sizə ən çox təəssürat bağışlayan məqam nə oldu? Siz həqiqətən onun namizədliyini Nobel Sülh Mükafatına irəli sürəcəksinizmi” sualına cavab olaraq Prezident Əliyev bildirib:“Bəli, düzdür, erməni həmkarımla birlikdə Prezident Trampın Nobel Sülh Mükafatına namizədliyini irəli sürdük. O, həqiqətən buna layiqdir. Vaşinqtonda şərhlərimdə də qeyd etdiyim kimi, o, bir neçə ay ərzində Afrikada, Asiyada, Cənubi Qafqazda möcüzə yaradıb. Bu, onun xarakteridir, bu, onun təbiətidir. O, sülh istəyir. O, Qərb liderlərinin ənənəvi imicindən tamamilə fərqli bir şəxsiyyətdir. O, çox mehribandır. O, bütün hədiyyələrini, hətta planlaşdırılandan daha çoxunu verəcək qədər çox səxavətlidir. O, həqiqətən də böyük tərifəlayiq insandır...”
Trampı Azərbaycan Prezidentinin təsəvvüründə digər ənənəvi Qərb liderlərindən fərqləndirən nədir?
“O, problemin üstünə getməkdən qorxmur, hətta fərqli düşünən insanlarla kontaktda olmaqdan çəkinmir, bu onu doğrudan da ənənəvi imicdən fərqləndirən bir şəxsiyyət edir”
Millət vəkili Aydın Mirzəzadə “Bakı-Xəbər”ə bildirdi ki, hakimiyyətə gəldikdən sonra Trampın dünyanın müxtəlif yerlərində olan hərbi münaqişələri dayandırmaq üçün atdığı addımlar bu gün bəşəriyyət tərəfindən hörmətlə qarşılanır.
“Tramp qeyri-adi bir şəxsiyyətdir, o, həmişə fərqli olub. Biznesdə fərqli olub, mətbuatla işləməkdə fərqli olub, insanlarla ünsiyyətdə fərqli olub. Bir şəxsiyyət kimi həmişə Amerika cəmiyyətinin diqqətində olub. Ona nüfuz qazandıran onun insanlarla yaxın olmasıdır. İnsanlarla yaxın olduğuna görə də problemləri dərindən bilir. O bilir ki, əməkdaşlıq, ticarət üçün mütləq müharibələri dayandırmaq lazımdır. O bilir ki, silah satışının da müəyyən bir sərhədi var. Dünya iqtisadiyyatını müharibəyə, silah tədarükünə tabe etdirmək olmaz. O yaxşı bilir ki, bütün müharibələrin kökündə ilk növbədə kimlərinsə böyük qazanc əldə etmək istəyi durur. Bu baxımdan hakimiyyətə gəldikdən sonra onun dünyanın müxtəlif yerlərində olan hərbi münaqişələri dayandırmaq üçün atdığı addımlar bu gün bəşəriyyət tərəfindən hörmətlə qarşılanır. O, siyasətdə bəzən gözlənilməz addımlar atmaqla böyük bir problemin artıq açarını tapmış olur. Bu gün Avropanın kənara çəkildiyi Rusiya rəhbərliyi ilə onun cəsarətli danışıqlar aparması, dünyanın 30 il ərzində həll edə bilmədiyi, ancaq Azərbaycanın qətiyyətlə həll etdiyi keçmiş “Dağlıq Qarabağ” probleminin axıracan həllinə öz töhfəsini verməsi bir daha göstərir ki, doğrudan da Tramp ənənəvi imicdən fərqlənir. O, problemin üstünə getməkdən qorxmur, hətta fərqli düşünən insanlarla kontaktda olmaqdan çəkinmir, bu onu doğrudan da ənənəvi imicdən fərqləndirən bir şəxsiyyət edir. Azərbaycan ictimaiyyətinin diqqətində o, Azərbaycan-Ermənistan münasibətlərinin həllinə böyük təkan verən bir şəxsiyyət kimi qalacaq. O, doğrudan da Nobel Sülh Mükafatına layiqdir. O bunu qısa zamanda sülh üçün atdığı addımlarla sübut edib”.
Millət vəkilinin fikrincə, nəinki ABŞ prezidentinə Nobel Sülh Mükafatı verilməlidir, hətta Donald Trampın özünün adına beynəlxalq sülh mükafatı təsis etmək lazımdır ki, gələcək nəsillər sülh üçün əllərində olan bütün imkanlardan istifadə etməklə onun laureatı olmağa çalışsınlar. “Cənab Prezidentin Donald Trampa verdiyi qiymət doğrudan da obyektivdir. Maraqlıdır ki, Donald Trampın cənab Prezidentimizə böyük bir rəğbəti var. Çünki Cənab Prezidentimiz özü də ənənəvi imicdən fərqli bir şəxsiyyətdir. Onun etdikləri, onun siyasəti nəinki Azərbaycan üçün, eləcə də region, dünya üçün çox müsbət nəticələrə malikdir. İki böyük liderin bir-biri ilə münasibətə qiymət verməsi də, əlbəttə ki, çox önəmli bir məsələdir”-deyə A.Mirzəzadə qeyd etdi.
İradə SARIYEVA
