Bəhruz Quliyev: “İmzalanmış sənəddən imtina etmək bu ölkəni daha da təcrid olunmuş vəziyyətə salacaq”
Prezident İlham Əliyev “Əl-Ərəbiyyə” telekanalına müsahibəsində deyib ki, hər hansı daxili siyasi dəyişiklik üzündən İrəvan sülh məsələsində geri addım atsa, bu, Ermənistanın özü üçün çox zərərli olar:
“Bunu söyləmək çətindir, yalnız ehtimal edə bilərəm. Ümid edirəm ki, prosesə heç bir müdaxilə olmayacaq. Lakin yenə də məndə yüz faiz zəmanət yoxdur, çünki Ermənistanın daxili siyasəti barədə tam məlumatlı deyiləm. Bilirik ki, gələn yay Ermənistanda parlament seçkiləri keçiriləcək. Həmçinin bilirik ki, onlar yeni konstitusiya layihəsi üzərində işləyirlər. Lakin güclü xarici müdaxilə olarsa, bəli, bu, razılaşmaları poza bilər. Amma bu, Ermənistanın özü üçün çox zərərli olar, çünki Vaşinqtonda sənədlərin kim tərəfindən imzalanmasından asılı olmayaraq, onlar Ermənistanın adından Ermənistan lideri tərəfindən imzalanıb. Əgər orada hər hansı dəyişiklik baş verərsə və imzalanmış sənəddən geri addım atılarsa, bu, Ermənistan ilə ABŞ arasındakı münasibətləri ciddi şəkildə pisləşdirər. Bu, yalnız ABŞ-a aid deyil, beynəlxalq ictimaiyyət, Avropa İttifaqı, Türkiyə və ərəb ölkələrindəki dostlarımız da bu prosesi dəstəklədilər”.
Prezidentin bu açıqlamasından belə məlum olur ki, Ermənistanda hakimiyyət dəyişsə, bu ölkə razılaşmadan imtina etsə bütün məsuliyyət Ermənistanın üzərinə düşəcək. Üstəlik bu, ABŞ-a hörmətsizlik olacaq.
“Bu, artıq ikitərəfli məsələ deyil, beynəlxalq səviyyədə imzalanmış sənədin sual altına alınması deməkdir”
Sözügedən məsələni “Bakı-Xəbər”ə şərh edən “SƏS” Media Qrupunun rəhbəri, politoloq Bəhruz Quliyevin fikrincə, Prezidentin yanaşması tamamilə beynəlxalq hüquqa söykənir: “Prezident İlham Əliyevin “Əl-Ərəbiyyə” telekanalına verdiyi müsahibədəki fikirlər bir daha göstərdi ki, Azərbaycanın mövqeyi açıq, prinsipialdır və tamamilə beynəlxalq hüquqa söykənir. Dövlət başçısının sözlərindən aydın olur ki, Ermənistanda daxili siyasi dəyişikliklərin baş verməsi, parlament seçkiləri və ya konstitusiya dəyişikliyi sülh prosesinə təsir etməməlidir. Çünki artıq Vaşinqtonda imzalanmış sənəd Ermənistan adından Ermənistan lideri tərəfindən təsdiqlənib. Bu fakt heç kim tərəfindən inkar oluna bilməz. Əgər gələcəkdə hansısa qüvvələr Ermənistanda hakimiyyətə gələrək imzalanmış sənəddən geri addım atmağa cəhd göstərsələr, bütün məsuliyyət məhz Ermənistanın öz üzərinə düşəcək. Bu, sadəcə, Azərbaycanın mövqeyinə zidd addım deyil, eyni zamanda ABŞ-a, Avropa İttifaqına, beynəlxalq ictimaiyyətə, Türkiyəyə və ərəb ölkələrindəki dostlarımızın mövqeyinə qarşı hörmətsizlikdir. Prezident İlham Əliyev müsahibədə açıq şəkildə xəbərdarlıq edir ki, razılaşmanı pozmaq Ermənistan üçün ciddi fəsadlara yol aça bilər. Çünki bu, artıq ikitərəfli məsələ deyil, beynəlxalq səviyyədə imzalanmış sənədin sual altına alınması deməkdir. ABŞ və digər tərəfdaş ölkələr bunu Ermənistanın qeyri-ciddi mövqeyi kimi qəbul edəcək. Beləliklə, Ermənistan hakimiyyətində dəyişiklik baş versə belə, imzalanmış sənəddən imtina etmək bu ölkəni daha da təcrid olunmuş vəziyyətə salacaq. Hesab edirəm ki, cənab İlham Əliyevin mesajı həm də bir xəbərdarlıqdır. Azərbaycanın mövqeyi dəyişməzdir, sülh prosesini pozan tərəf bütün məsuliyyəti daşıyacaq”.
Vidadi ORDAHALLI
