Dünya gündəmində xüsusi maraq dairəsində yer alan məsələlərdən biri də PKK terror təşkilatının özünü buraxmasıdır. 1978-cü ildə yaradılan və 1984-cü ildə ilk terror aktını həyata keçirən qruplaşma özünü buraxdığını elan edib. Bununla bağlı qurum bildirir: “PKK Abdullah Öcalanın fevralın 27-də verdiyi bəyanatla əlaqədar qurultay təyin edib. Qruplaşmanın XII qurultayında PKK adı altında aparılan işlərə son qoyulduğu ilə bağlı qərar qəbul edilib”.
Xatırladaq ki, 2025-ci il fevralın 27-də həbsdə olan PKK başçısı Abdullah Öcalan tərəfdarlarını türk dövlətinə qarşı silahlı mübarizəni dayandırmağa, silahları təhvil verməyə çağırdı. Bundan sonra Türkiyə ilə münaqişədə atəşkəs elan olundu, gələcək strategiyanın müzakirəsi başlandı. Bu fonda mayın 5-7-də PKK terror qruplaşması 12-ci toplantısında özünü buraxdığını elan edib. Onun yaydığı açıqlamada səbəb olaraq “PKK-nın tarixi missiyasını bitirməsi” göstərilib. PKK bildirib ki, təşkilatın ləğvi və tərksilah üzrə praktiki proses 1999-cu ildən həbsdə olan Öcalan tərəfindən idarə olunacaq və nəzarətdə saxlanılacaq. Qurultay bəyannaməsinə görə, PKK-nın mübarizəsi kürd məsələsini demokratik siyasət yolu ilə həll həddinə çatdırıb və bununla da tarixi missiyasını tamamlayıb. Beləliklə, terror qruplaşmasının fəaliyyəti sona çatır. Dünya, o cümlədən Azərbaycan bunu alqışlayır. Artıq Prezident İlham Əliyev PKK terror qruplaşmasının özünü ləğv etməsi ilə əlaqədar Türkiyə xalqını təbrik edib. Dövlət başçısı X sosial şəbəkə hesabında bununla bağlı etdiyi paylaşımda bildirib: “Başda əziz Qardaşım, Türkiyə Respublikasının Prezidenti Rəcəb Tayyib Ərdoğan olmaqla bütün qardaş Türkiyə xalqını PKK terror qruplaşmasının özünü ləğv etmək və silahı yerə qoymaq qərarı münasibətilə ürəkdən təbrik edirəm. Əziz Qardaşımın bəyan etdiyi “Terrorsuz Türkiyə” hədəfinə çatmaqda vacib mərhələ olan bu hadisə dövlətçilik yolunda ölkədə aparılan qətiyyətli siyasətin nəticəsi, güclü liderliyin və sarsılmaz iradənin, milli birliyin və həmrəyliyin təntənəsidir. Alınmış qərarın tam icrası istiqamətində Türkiyə dövlətinə və xalqına uğurlar arzulayıram”. Azərbaycan Xarici İşlər Nazirliyi PKK terror təşkilatının özünü ləğv etməsi barədə bəyanat yayıb: “Davamlı sülh və sabitlik yolunda mühüm addım olan PKK-nın ləğvi ilə bağlı elanı alqışlayırıq. Bölgədə terror təhlükəsinə son qoymaq üçün ən qısa zamanda praktiki addımların atılmasını gözləyirik. Qardaş Türkiyə rəhbərliyini terrorizmin kökünün kəsilməsi, təhlükəsizliyin gücləndirilməsi və sabitliyin təşviqi istiqamətindəki sarsılmaz öhdəliyinə görə alqışlayırıq”. Türkiyə prezidenti Rəcəb Tayyib Ərdoğan məsələ ilə bağlı bildirirb ki, PKK-nın özünü ləğvetmə və tərksilah olma qərarı Türkiyənin sabitliyi baxımından çox önəmlidir. Onun sözlərinə görə, “Terrorsuz Türkiyə” yeni mərhələyə qədəm qoyur: “Qazanan millətimiz, ölkəmiz və regiondakı qardaşlarımız olacaq. Kəşfiyyat idarəmiz bundan sonrakı prosesi diqqətlə izləyəcək”. Dövlət başçısı qeyd edib ki, bu prosesdən uduzan tərəf qanla bəslənən imperialistlər olacaq.
Kürd məsələləri üzrə ixtisaslaşmış siyasi ekspert Vladimir van Vilqenburq qeyd edir ki, Türkiyədəki kürd icması münaqişədən yorulub və sülhə ümid edir.Bununla belə, o əlavə edib ki, kürdlər nə baş verəcəyinə dair qeyri-müəyyənlik içindədirlər. Van Vilqenburq qeyd edib ki, PKK qərarında yekdil görünməsinə baxmayaraq, təşkilat keçmişdə qruplaşmadan ayrılma halları ilə üzləşib, məsələn, Öcalanın kiçik qardaşı Osman Öcalan 2004-cü ildə təşkilatdan ayrılaraq qısaömürlü siyasi-hərbi qruplaşma yaratmışdı. Keçmiş PKK lideri Murat Karayılan 2024-cü il avqustun 15-də 1984-cü il hücumlarını anma nitqində demişdi: “Orta Şərqdə azad və müstəqil bir Kürdistanın yaranması üçün müharibəni gücləndirəcəyik”. O, bu ilin mart ayında Abdullah Ocalanın çağırışına qarşı da çıxmışdı. Vladimir van Vilqenburqun sözlərinə görə, indi əsas suallardan biri təşkilatın digər ölkələrdə, məsələn, İrandakı qollarının bu qərara əməl edib-etməyəcəyidir. Türkiyənin hakim Ədalət və İnkişaf Partiyasının (AKP) sözçüsü Ömer Çelik deyib ki, PKK-nın tərksilah və fəaliyyətinin dayandırılması ilə bağlı qərarı konkret və tam şəkildə, eləcə də PKK-nın bütün qollarını əhatə edəcək şəkildə həyata keçirilməlidir. Qeyd edək ki, PKK ilə Türkiyə arasındakı münaqişə nəticəsində indiyədək 40 min nəfərin öldüyü təxmin edilir. Bu, PKK-nın hərbi və mülki hədəflərə hücumlarının qurbanlarını, eləcə də Türkiyə ordusunun həm PKK-ya, həm də onu dəstəkləyən icmalara qarşı keçirdiyi hərbi əməliyyatlarda həlak olanları əhatə edir. İndi bu halllar sona çatır. Türkiyənin xarici işlər naziri Hakan Fidan qeyd edib ki, Ankara terror təşkilatının özünü ləğv etməsi ilə bağlı bəyanatından sonra əməli addımları izləyəcək. Türkiyə diplomatiyasının rəhbəri PKK terrorçularının fəaliyyətinin dayandırılması qərarını bölgədə uzunmüddətli sülh və sabitlik yolunda tarixi və mühüm addım adlandırıb: “Bu qərar səmimiyyətlə həyata keçirilərsə, gələcəyimizə, vətəndaşlarımızın gələcəyinə çox müsbət təsir göstərəcək”.
Samirə SƏFƏROVA
