Mayın 15-də İstanbulda Putin-Zelenski görüşü baş tutmaya bilər... Putin yanlış etdi və Zelenski bu səhvi dərhal tutdu...
"Necə inanmaq olar ki, Putin Zelenski ilə oturub üz-üzə və ya onunla Trampın vasitəçiliyi ilə danışacaqlar?..
Putin özü aydın deyib ki, Zelenskini qeyri-legitim saydığı üçün onunla danışıq aparmayacaq. Zelenski isə 2022-ci ildə Putinlə danışıq aparan istənilən Ukrayna liderinin hərəkətini cinayət hesab edən qanun imzalayıb. İndi necə olacaq?
Bundan başqa, Zelenski 2 gün əvvəl açıq deyib ki, Putin 30 günlük atəşkəs sazişi imzalayandan sonra onunla danışacaq. Putin isə cavab verib ki, bizimlə belə ultimatum dilində danışmağı qəbul etmirik və qeyd-şərtsiz danışıq istəyirik".
Bunu "Bakı-Xəbər" Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır: "Bütün bunlardan sonra mayın 15-də İstanbul zirvə görüşünün baş tutma ehtimalı məncə sıfıra bərabərdir. Aydın məsələdir ki, Zelenski üz-üzə görüş təşəbbüsünü irəli sürdüyü anda bu görüşün baş tutmasının təxminən qeyri-mümkün olduğunu özü yaxşı bilirdi. Sadəcə güclü bir "xod" elədi və Putinə psixoloji basqı göstərdi. Onda bu pis alınmadı. Məncə Putin hazırda bu görüşə getmək yollarını yox, ondan yan keçmək yolları haqqında daha çox düşünür. Çünki Putin hesab edir ki, o artıq Zelenskini diz çökdürüb, təslim aktına imza atdıracağı günlər uzaqda deyil və belə bir ərəfədə diz çökdürdüyü adamla oturub danışmağı özünə sığışdırmır...
Əslində Putin Avropanın, Trampın və Zelenskinin dəstəklədiyi 30 günlük atəşkəs sazişindən yan keçmək üçün mayın 15-də 2022-ci ildə İstanbulda qaldıqları yerdən danışıqlara yenidən başlamaq təşəbbüsü irəli sürdü. O, elə burada səhvə yol verdi. Zelenski dərhal bu səhvi tutdu və təklif etdi ki, mayın 15-də İstanbulda Putini şəxsən gözləyirəm. Doğrudur, bu bir az "vorovskoy xod" kimi göründü. Ancaq mahiyyətcə güclü gedişdir. Gücü isə orasındadır ki, Putin bu görüşə böyük ehtimalla gəlməyəcək..."
Mətləb
