Məhəmməd Əsədullazadə: “Qarabağ məsələsinin həlli ən çox erməni lobbisini məyus edib”
Hər iki partiyadan olan ABŞ Senatının və Nümayəndələr Palatasının onlarla üzvü “erməni soyqırımı”nın 110-cu ildönümü ilə bağlı ictimai bəyanatlar, ictimaiyyətlə görüşlər və sosial şəbəkələrdə paylaşımlar vasitəsilə erməni xalqı və ABŞ-dakı erməni icması ilə həmrəy olduqlarını bildiriblər.
Konqresmenlər “erməni soyqırımı”nın tanınması və ədalətin bərqərar olunması uğrunda mübarizəyə sadiq olduqlarını təsdiqləməklə yanaşı, həm də Azərbaycanın Qarabağda törətdiyi “soyqırım, etnik təmizləməyə” görə cavabdehlik tələb edib, eyni zamanda erməni “hərbi əsirlərin” dərhal azad edilməsinin vacibliyini qeyd ediblər.
Tramp “erməni soyqırımı” ifadəsini işlətmir, ermənipərəst konqresmenlər yenə köhnə oyundadılar. Üstəlik, erməni separatçıları “hərbi əsir” kimi təqdim etməkdən əl çəkmirlər. Bir sözlə, ermənipərəst konqresmenlər erməni lobbisinin girovuna çevrilərək köhnə oyunlardan əl çəkmək istəmirlər.
“30 il ərzində bu yardımların çoxu Bob Menendez kimi dələduz konqresmenlərin cibinə axırdı”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, ABŞ Konqresində erməni lobbisinin maraqlarını ifadə edən konqresmenlər Azərbaycan və Türkiyəyə qarşı düşmənçilik siyasətlərini davam etdirirlər: “Çox təəssüf ki, bir çox konqresmenlər fəaliyyətlərini erməni lobbisinin təlimatları üzərində qururlar. Bu zaman həmin konqresmenlər öz biznes maraqlarından çıxış edirlər. Bununla bir növ Birləşmiş Ştatların regional siyasətini sabotaj edirlər. Bu gün Ermənistan Türkiyə ilə münasibətlərini normallaşdırır, Paşinyan Azərbaycanla sülh sazişinin imzalanması ilə bağlı səy göstərir, amma erməni lobbisi yenə çirkin işlərlə məşğuldur. Anti-türk, anti-Azərbaycan siyasətini davam etdirir. Bununla əslində Ermənistanı çıxılmaz vəziyyətdə saxlayırlar. Bu səbəbdən ölkə təcrid vəziyyətindən çıxa bilmir. Ona görə ki, müxtəlif vasitələrlə düşmənçiliyin körüklənməsi son nəticədə ümumi işə zərər vurur və bundan da ən çox zərər görən Ermənistan olur. Qarabağ məsələsinin həlli ən çox erməni lobbisini məyus edib. Çünki onlar bundan bir vasitə kimi istifadə edib böyük ianələr toplayırdılar. Birləşmiş Ştatlardan nələrisə qoparmağa çalışırdılar. Qarabağda separatizmə son qoyulması onların bu və digər oyunlarını məhdudlaşdırır. Qarabağ ermənilərinə “yardım” adı altında vəsait toplaya bilmirlər. Halbuki, 30 il ərzində bu yardımların çoxu erməni lobbisinin cibinə gedirdi. O cümlədən, indi həbsdə olan Bob Menendez kimi dələduz konqresmenlərin cibinə axırdı”.
Vidadi ORDAHALLI
