Faiq Ələkbərli: “Həmin o fars alimlərini də, onlar kimi ziyanlı düşüncəyə malik olanları da narahat edən Azərbaycanın və Türkiyənin get-gedə güclənməsidir”
Tehrandakı “Erməni Milli Mədəniyyət Birliyi”nin təşkilatçılığı ilə saxta “erməni soyqırımının” 110 illiyinə həsr olunan tədbir keçirilib.
Tədbirdə Tehran Universitetinin bir qrup aliminin, professor-müəllim heyətinin, o cümlədən doktor Məcid Kəriminin, doktor Pionek Simoninin, doktor Andranik Simonyanın, Ehsan Movahedyanın iştirak etdiyi bildirilir. Erməni yalanlarına alət olan “alimlər” çıxışlarında Azərbaycana və qardaş Türkiyəyə qarşı əsassız ittihamlar səsləndiriblər.
Pionek Simoni deyib ki, guya “erməni mədəni irsi sistemli şəkildə məhv edilib”. O, Türkiyə və Azərbaycanda “erməni kilsələri” və “tikililərinin” vəziyyətindən (?) danışıb.
Doktor Məcid Kərimi çıxışında sözdə “soyqırımın” köklərindən (?) danışıb, regionda İrana qarşı guya hansısa təhdidlər olduğunu deyib. Doktor Ehsan Movahedyan isə çıxışında iddia edib ki, guya ermənilərə qarşı hansısa faciələr törədilib(?) .
Məlumatdan da aydın görsənir ki, Tehrandakı "erməni soyqırımı" tədbirində İrandan olan alimlər “daha fəallıq nümayiş etdiriblər”.
Bunlar nə haqla durub Azərbaycanı və Türkiyəni ittiham edə bilərlər ki, "ermənilərə qarşı genosid törədilib"? Nə haqla belə iddialar ortaya qoya bilərlər ki, Azərbaycan və Türkiyə sistematik olaraq Ermənistanın və ermənilərin mədəni irsini məhv etməklə məşğul olub? Halbuki, o mədəni irsi məhv edən biz deyilik, İranın özüdür. İrəvandakı Göy məscidi illərdir "fars məscidi" kimi qələmə veriblər, amma İranın bir dəfə də olsun səsi çıxmadı ki, o məscid Azərbaycan xalqına aiddir. İran əksinə, dedi ki, qoy ermənilər Azərbaycan irsini silsin. İranın onda səsi çıxmadı, indi gəlib Azərbaycanı ittiham edirlər ki, guya Azərbaycanda və Türkiyədə erməni mədəni irsini məhv edirlər. Olmayan bir irsi necə məhv etmək olar? Əlbəttə, fars-molla rejimi 100 ildən artıqdır ki, Cənubi Azərbaycandakı türk irsini məhv etməklə məşğul olur, abidələrimizə qarşı soyqırım törədir. Eləcə də Ermənistanda bu gün bizim abidələrin yer üzündən silindiyi məlumdur. “Təpəbaşı” məhəlləsinin başına gətirilən faciə dəhşət saçır. Göy Məscidin farslaşdırılması siyasətində Ermənistana rəsmi Tehran əməlli-başlı dəstək verib. İndi də durub öz cinayətlərini türklərin boynuna qoymaq istəyirlər.
“Haylarla farsların Azərbaycana və Türkiyəyə qarşı hansısa bir həmrəylik nümayiş etdirməsi iflasa uğrayacaq”
AMEA-nın Fəlsəfə və Sosiologiya İnstitutunun şöbə müdiri, fəlsəfə doktoru, siyasi ekspert Faiq Ələkbərli “Bakı-Xəbər”ə bildirdi ki, İran adlanan ölkə ilə ermənilərin ortaq cəhəti məhz vaxtilə türk dövlətlərinin tərkibində yaşamaları, türk ədalətindən geninə-boluna istifadə etmələri olub. “Farsaların və hayların Azərbaycan və Türkiyə xalqlarının mədəni isrinə, dəyərlərinə əsassız iddialar irəli sürməsinin yalnız bir tərəfi var. O da ondan ibarətdir ki, onlar türk varlığını qəbul edə bilmirlər. Halbuki, haylar və farslar ən azı son min illik tarixdə, təbii ki, ondan əvvəl də türk dövlətlərində yaşayıblar. Türk dövlətlərinin necə bir ədalətli siyasət yürütdüklərini çox yaxşı bilirlər.
Həm hayların, həm də farsların başında duran qüvvələr xalqlarını inandırmağa çalışırlar ki, guya türklər ermənilərə, yaxud farslara qarşı ədalətsiz olublar, “soyqırım” törədiblər. Tarixə baxsaq görərik ki, ermənilərə qarşı heç bir “soyqırım” olmayıb. Onlara qarşı soyqırım olsaydı, indi hay adlı toplum yox idi.
Onların iddiaları kökündən yanlışdır və gerçəyi əks etdirmir”.
F.Ələkbərlinin sözlərinə görə, bu gün fars şovinistləri ilə haylar birləşib Azərbaycanı və Türkiyəni hədəfə alıblar. F.Ələkbərli iki iranlı alimin xüsusi canfəşanlıq göstərməsinin də səbəbsiz olmadığını dedi. Onun fikrincə, bu onların türk düşmənçiliyindən irəli gəlir və Azərbaycanın qardaş Türkiyə ilə birgə günü-gündən güclənməsi onları ciddi şəkildə narahat edir: “Həmin o fars alimlərini də, onlar kimi ziyanlı düşüncəyə malik olanları da narahat edən Azərbaycanın və Türkiyənin get-gedə güclənməsidir. Azərbaycan nəinki bölgədə, bütövlükdə dünyada öz varlığını ortaya qoyur, bu da elələrini narahat edir. Bu gün onlar özlərini sanki hayların himayəçisi kimi göstərmək istəyirlər. Ancaq özləri də çox yaxşı bilirlər ki, dünənə kimi farsların da, ermənilərin də himayəçisi türk dövlətləri olub, onlar bu dövlətlərin tərkibində yaşayıblar. Tarixi gerçəklikləri təhrif edib Azərbaycana və Türkiyəyə qarşı böhtanlar atmaqla heç nəyə nail ola bilməzlər.
Qacarlar dövləti zəifləyəndən sonra Azərbaycanın bir hissəsi Çar Rusiyasının işğalı altına düşdü. Bu dönəmdə həm haylar, həm də farslar əllərindən gələn qədər azərbaycanlılara, eləcə də Osmanlı türklərinə qarşı genosidlər törətdilər.
Biz yaxşı bilirik ki, haylar Azərbaycan türklərinin mədəni irsini necə məhv ediblər. O cümlədən də İran adlanan dövlətdə Azərbaycan türklərinin varlığına qarşı hücumlar olunur, mədəni irsimiz məhv edilir. Onlar bu işi sistemli şəkildə görürlər. Ancaq bütün bunlar heç nəyi dəyişmir. Türkün varlığı dünən də olub, bu gün də var, sabah da olacaqdır”.
F.Ələkbərli qeyd etdi ki, nə Türkiyədə, nə də Azərbaycanda ermənilərin hansısa irsi yoxdur. “Hay və fars cütlüyü nə qədər saxtakarlıq edirlərsə-etsinlər, cilddən-cildə düşsələr də tarixi gerçəyi dəyişə bilməzlər.
Haylar 30 il torpaqlarımızı işğalda saxladı və bu dönəmdə nə qədər çalışsalar da, Qarabağdan türk izlərini silə bilmədilər. Əlbəttə, türk izini nə İrəvandan, nə Tehrandan, nə də digər yerlərdən silə biləcəklər. Bu mümkün deyil. Tehranda da, İrəvanda da türk damğaları var. Bunu isə dəyişmək mümkün deyil. Bu baxımdan, haylarla farsların Azərbaycana və Türkiyəyə qarşı hansısa bir həmrəylik nümayiş etdirməsi iflasa uğrayacaq. Bu, gerçəyi dəyişməyəcək qədər zəif bir addımdır” - deyə F.Ələkbərli qeyd etdi.
İradə SARIYEVA
