Azər Allahverənov: “QR kodun təqdim olunması şəxsin Rusiya ərazisinə girişinə rəsmi icazə verildiyi deməkdir”
Rusiyaya vizasız getmək hüququ olan xarici vətəndaşlardan ölkəyə giriş üçün QR kodu tələb olunacaq. Bu yenilik Rusiya hökumətinin ötən il qəbul etdiyi fərmanla tənzimlənir.
Fərmana əsasən, iyunun 30-dan etibarən Rusiyaya vizasız getmək hüququ olan xarici vətəndaşlar üçün ölkəyə yeni giriş qaydaları qüvvəyə minəcək. Bu məqsədlə Rusiya Federasiyasına vizasız gələn əcnəbilər üçün “Qosuslugi RuID” adlı portal istifadəyə veriləcək.
Qeyd edək ki, Rusiyaya səfər etməzdən əvvəl viza tələb olunmayan xarici vətəndaşlar ölkəyə girişdən 72 saat əvvəl “Qosuslugi RuID” portalında qeydiyyatdan keçməli və xüsusi QR kodu almalıdırlar. QR kod 90 gün ərzində etibarlıdır. Ancaq onu da bildirək ki, bu, əcnəbinin Rusiya ərazisinə mütləq girişinə zəmanət vermir. Bununla bağlı qərar hələ də sərhədçilərin ixtiyarındadır. Maraqlıdır, bu qayda Azərbaycan vətəndaşları üçün çətinlik yaradacaqmı?
“Bu sistem gələcəkdə xüsusilə Rusiya ilə miqrasiya mübadiləsi yüksək olan ölkələrin vətəndaşları üçün çətinliklər yaradacaq”
"Avrasiya Miqrasiya Təşəbbüsləri Platforması" İctimai Birliyinin sədri və Miqrasiya Əməkdaşlıq Platformasının rəhbəri, millət vəkili Azər Allahverənov “Bakı-Xəbər”ə şərhində bildirdi ki, 2025-ci il iyunun 30-dan etibarən, 1 illik müddətə – 2026-cı ilin iyun ayına qədər Rusiyaya səfər etmək istəyən əcnəbilər, xüsusilə vizasız gediş-gəliş olan ölkələrin vətəndaşları səfərdən 72 saat əvvəl bu barədə Rusiyanın rəsmi portalı vasitəsilə məlumat verməlidirlər. Portal üzərindən şəxsiyyət vəsiqəsi, şəkil, səfərin məqsədi və digər zəruri sənədlər elektron qaydada doldurularaq təqdim edilməlidir: “Bu məlumatlar əsasında şəxsin elektron ünvanına QR kod göndərilir. QR kodun təqdim olunması şəxsin Rusiya ərazisinə girişinə rəsmi icazə verildiyi deməkdir. Sərhədi keçərkən həmin QR kod Rusiyanın müvafiq orqanlarına, xüsusilə də Federal Təhlükəsizlik Xidmətinin sərhəd qoşunlarının struktur bölmələrinə təqdim edilməlidir. Şəxsə kod verilirsə, ölkə ərazisinə giriş mümkün olur, əks halda, bu mümkün olmur. İstənilən şəxslə bağlı informasiya araşdırılır, əgər şəxsin adı inzibati qaydaları pozma, yaxud digər inzibati məsuliyyət yaradan hallarda çəkilirsə, həmin şəxsə imtina cavabı verilir. Məlumdur ki, Azərbaycan Rusiya ilə vizasız gediş-gəlişi olan ölkələrdən biridir. Yeni qaydalar bizim vətəndaşlarımıza da şamil olunacaq. Bu isə, təbii ki, müəyyən çətinliklər yaradacaq. Danılmaz faktdır ki, heç də hər kəs portaldan istifadə etmir. Tətbiq telefonlara yüklənməli, elektron müraciət göndərilməlidir. Sırf texniki baxımdan çətinliklər yaşana bilər. Bir qədər təcrübə topladıqdan sonra rahat istifadə mümkün olacaq. İstənilən halda bu, nizam-intizam yaradacaq sistemdir. İstənilən şəxs bilet alıb Rusiya ərazisində daxil ola bilməyəcək. Bu sistem gələcəkdə xüsusilə Rusiya ilə miqrasiya mübadiləsi yüksək olan ölkələrin vətəndaşları üçün çətinliklər yaradacaq. Rusiyada Mərkəzi Asiya respublikalarından olan vətəndaşların sayı həddən artıq çoxdur”.
Günel CƏLİLOVA
