Rusiya və Ukrayna arasında dörd ildir davam edən şiddətli müharibəyə son qoymaq üçün danışıqlara Türkiyə ev sahibliyi edəcək. Rusiya prezidenti Vladimir Putinin dəvətindən sonra ABŞ prezidenti Donald Tramp da cümə axşamı İstanbulda ola biləcəyini açıqlayıb. Trampın bəyanatlarından sonra Ukrayna prezidenti Zelenski yeni açıqlama verib. O, Trampa Putinlə Türkiyədə birbaşa danışıqlar aparılmasını təklif etdiyini deyib.
Trampın açıqlamalarının çox əhəmiyyətli olduğunu deyən Zelenski, ABŞ prezidentini diplomatiya üçün zəmin hazırlayacaq qədər uzun sürəcək tam və qeyd-şərtsiz atəşkəs ideyası ilə dəstəklədiyini bildirib: “Biz bunu istəyirik, öz tərəfimizdən səssizliyi təmin etməyə hazırıq".
Ukrayna lideri Trampın ola biləcək İstanbul səfərindən də danışıb: "Prezident Trampı Putinlə birbaşa danışıqlar ideyası ilə dəstəklədim. Görüşə hazır olduğumu açıq şəkildə söylədim. Türkiyədə olacağam. Ümid edirəm ki, ruslar bu görüşdən qaçmayacaqlar…
Təbii ki, Ukraynada hamımız istərdik ki, prezident Tramp Türkiyədəki bu görüşdə bizimlə olsun. Bu, düzgün fikirdir. Biz çox şeyi dəyişə bilərik. Prezident Ərdoğan həqiqətən də ən yüksək səviyyədə görüşə ev sahibliyi edə bilər. Kömək edən hər kəsə təşəkkür edirəm".
Kremlin sözçüsü Dmitri Peskov isə deyib ki, birbaşa danışıqların bərpası üçün Kiyev Zelenskinin 2022-ci ildə imzaladığı və Putinlə danışıqları qadağan edən fərmanı qanuni olaraq ləğv etməlidir.
Peskovun bu açıqlaması və əslində şərt irəli sürməsi Putinin İstanbulda Zelenski ilə görüşmək istəmədiyini göstərir.
TAHİR
