Ukrayna özünün müharibə tarixində ən məsuliyyətli və cəsarətli qərarı vermək zərurəti ilə üz-üzə qalıb - Atəşkəs...
3 ildir davam edən müharibədə çoxlarının iddiası bu qırğını dayandırmaqdan ibarət olsa da, ağıllı və real təkliflərə çox nadir hallarda rast gəlinir. İlkinlərin önündə Azərbaycan Prezidenti İlham Əliyev dəfələrlə bəyan edib ki, nə qədər çətin olsa da, Ukrayna üçün atəşkəs əldə edilməsi həyati əhəmiyyətlidir. Hətta prezident 1994-cü ildə çətin vəziyyətdə Azərbaycanın atəşkəsə necə getdiyini nümunə göstərib.
Bunu “Bakı-Xəbər” Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
“Həqiqətən də 1994-cü ildə hələ ordusu olmayan Azərbaycan üçün müharibəni davam etdirmək açıq intihara doğru yerimək idi. Ancaq cəmiyyətdə populist və ziyanlı iltramillətçi əhvali-ruhiyyənin hökm sürdüyü şəraitdə atəşkəs qərarı vermək ölkə liderindən böyük cəsarət tələb edirdi. Bunu yalnız Heydər Əliyev edə bilərdi. Etdi də... Qeyri-bərabər müharibəni davam etdirmək Azərbaycan üçün əlavə torpaq itkisindən başqa heç nəyə gətirib çıxarmazdı...
İndi oxşar vəziyyət Ukrayna üçün var. Proseslər Ukraynanın o zamankı Azərbaycandan daha üstün imkanlara malik olduğunu göstərsə də, Ukrayna faktiki real nəticələrə yetişə bilmir. Dünya Ukraynanı müdafiə edir, pul tökürlər, silah tökürlər, böyük informasiya resursları Ukraynanın haqqını müdafiə edirlər. Halbuki Azərbaycan öz dövründə təklənmişdi. Ukrayna qədər arxalı deyildi. Ancaq müvəqqəti atəşkəs qərarı verdi, ordunu qurdu və 20 ildən sonra işğalçının anasını ağlatdı...
Nə qədər çətin də olsa, Ukrayna üçün də öz haqqına qovuşmanın mümkün yolu müvəqqəti atəşkəsə nail olmaq, özünü düzəltmək və haqqı olan ərazi bütövlüyünə qovuşmaqdır.
Vəziyyəti çətinləşdirən odur ki, Rusiya hələlik heç bir güzəştə ayaq yeri qoymur və tutduğu bütün əraziləri geri qaytarmamaqda israr edir. Bu şəraitdə Ukrayna cəmiyyətinin atəşkəs niyyətlərinə çox aqressiv davrana biləcəyini başa düşmək lazım gəlir. Lakin eyni zamanda ölkənin bütövlük yolunun çox çətin olan bu qərardan keçdiyinə xalqı inandıra bilən güclü liderə ehtiyac var. Və yaxud da mövcud lider buna özündə güc və cəsarət tapmalıdır.
Çıxılmaz sayılan vəziyyətdə perspektiv qələbə potensialına malik çox çətin ATƏŞKƏS qərarının ortada AZƏRBAYCAN NÜMUNƏSİ var...”
Tahir TAĞIYEV
