ABŞ prezidenti Donald Tramp Türkiyədə qurulacaq sülh masası ilə bağlı yeni açıqlamalar verib.
Mayın 15-də Rusiya və Ukrayna arasında İstanbulda keçiriləcək görüşün önəmli olduğuna diqqət çəkən ABŞ lideri, bu görüşün baş tutmasında çox israrlı olduğunu deyib: “Düşünürəm ki, bu görüşdə yaxşı şeylər ola bilər".
Tramp daha bir təəccüblü açıqlama verərək, Türkiyənin yaxşı ev sahibi ola biləcəyini bildirib.
Tramp, Rusiya və Ukrayna arasında mayın 15-də İstanbulda keçirilməsi planlaşdırılan görüşə, Ukrayna prezidenti Zelenski və Rusiya prezidenti Putin iştirak edəcəyi təqdirdə, özünün də şəxsən qatıla biləcəyini bildirib. "Mən əslində ora uçmağı düşünürəm. Əgər nəyinsə baş verə biləcəyini düşünsəm, belə bir ehtimal var", - deyə Tramp bildirib.
Qeyd edək ki, Moskvada mətbuat mənsublarına açıqlama verən Putin mayın 15-də İstanbulda heç bir ilkin şərt olmadan Ukrayna ilə birbaşa danışıqların bərpasını təklif edib. Zelenski isə Putin 30 günlük atəşkəsi qəbul edəcəyi halda, onunla İstanbulda görüşəcəyini açıqlayıb. Bu açıqlamadan bir gün sonra isə Zelenski Trampın təzyiqindən sonra sülh danışıqlarına şəxsən qatılacağını deyib. “Axios” xəbər saytı da, Rusiyanın atəşkəs elan edib-etməməsindən asılı olmayaraq, Zelenskinin mayın 15-də İstanbula gedəcəyini yazıb.
TAHİR
