Əli Orucov: “Həmin vaxt bu çox məsuliyyətli qərar idi”
Prezident İlham Əliyev Ağdam rayonunun Kəngərli kəndinə köçən sakinlərlə görüşündə deyib ki, xalq arxamda durmasaydı qələbəni belə qazanmaq mümkün olmazdı:
“Xalq arxamda durmasaydı, əgər müharibə dövründə hər hansı bir tərəddüd hiss olunsaydı, yaxud da ki, cəmiyyətdə hər hansı bir fikir ayrılığı olsaydı, bu Qələbəni belə şəraitdə, belə ağır vəziyyətdə qazanmaq mümkün olmazdı. Şəhidlər dəfn olunurdu, şəhidlərin anaları, ataları, yaxınları deyirdilər ki, dayanma. Bilirsiniz bu nədir?! Xalqımız böyük xalqdır”.
“Xalqın birliyi olmasaydı, nəticə bu cür olmazdı və bəlkə də xoşa gəlməyən nəticələrlə üzləşə bilərdik”
Sözügedən məsələni “Bakı-Xəbər”ə şərh edən AMİP funksioneri Əli Orucov hesab edir ki, 44 günlük Vətən müharibəsində Azərbaycan xalqının Ali Baş Komandan ətrafında yumruq kimi birləşməsi qələbənin əldə olunmasında həlledici rol oynadı: “Bu cür çətin sınaqlarda, taleyüklü məsələlərdə xalqın birliyi, həmrəyliyi vacib faktorlardan biridir. Bu təkcə bizim ölkədə deyil, bütün dünyada belədir. Birinci Qarabağ müharibəsində məğlubiyyətimiz, ərazilərimizin Ermənistan tərəfindən işğal edilməsi cəmiyyətimizdə böyük sarsıntılara səbəb oldu. Ancaq bütün bunlara baxmayaraq, xalqımız sınmadı və yenidən toparlandı. Bir an belə olsun Qarabağı unutmadı, torpaqlarımızın azad edilməsi məsələsi arxa plana atılmadı. Baxmayaraq ki, ölkədə 1 milyon nəfər qaçqın və məcburi köçkün var idi. Ərazilərimizin 20 faizi işğal altında idi. Bir sıra dövlətlər Ermənistanın arxasında idilər. Bütün çətinliklərə rəğmən, ötən müddət ərzində toparlandıq, ölkədə güclü ordu yaradıldı, müasir silahların alınması təmin edildi və ən nəhayət 26 ildən sonra torpaqların azad edilməsinə qərar verildi. Həmin vaxt bu çox böyük məsuliyyətli qərar idi. Çünki bu kimi qərarların verilməsində yüz faiz nəyisə proqnozlaşdırmaq olmur. Müharibə dönəmində Prezident İlham Əliyev bütün məsuliyyəti öz üzərinə götürdü. Xalqın birliyi olmasaydı, nəticə bu cür olmazdı və bəlkə də xoşa gəlməyən nəticələrlə üzləşə bilərdik. Ancaq Azərbaycanda etnik, milli və dini mənsubiyyətindən asılı olmayaraq hamı bir yumruq kimi birləşdi. Ölkə müxalifəti xalqla birlikdə torpaqlarımızın azad edilməsinə kökləndi. Düzdür, 2020-ci ildə ərazilərimizi tamamilə azad edə bilməsək də, ölkədə mövcud olan milli həmrəylik, ölkə başçısının qətiyyəti 2023-cü ilin sentyabrında Qarabağda suverenliyimizin tam təmin edilməsi ilə başa çatdı. Azərbaycan ərazi bütövlüyünü və suverenliyini tam təmin etməklə dünya tarixinə öz adını qızıl hərflərlə yazmış oldu. Bütün bu uğurların əldə edilməsində ölkədəki birlik və milli həmrəylik misilsiz rola malikdir”.
Vidadi ORDAHALLI
