Qasım Hacıyev: “Putinin Ermənistanı ifşa etməyə marağı yoxdur”
Bildiyimiz kimi, Rusiyanın paytaxtında faşizm üzərində qələbənin 80 illiyinə həsr olunan parad keçirildi və tədbirdə 30-a yaxın xarici ölkə lideri iştirak etdi. Paraddan sonra Rusiya prezidenti Vladimir Putinin mətbuata bəyanatı yayılıb.
Putin bildirib ki, hələ də faşizmi qəhrəmanlaşdıranlar var. Rusiya prezidentinin bəyanatında Hitlerə xidmət edənləri "milli qəhrəmana" çevirənlərdən də danışılıb.
“... İkinci Dünya müharibəsi zamanı Hitlerlə əməkdaşlıq edənləri “milli qəhrəman” rütbəsinə yüksəldirlər. Mənə elə gəlir ki, bu, açıq-aşkar qeyri-adekvat vasitələrlə edilən cəhddir və buna cəhd edənlərin özlərinin ümid etdikləri miqyas uyğun deyil”.
Putin niyə bəs faşizmin çiçəkləndiyi Ermənistanın adını çəkmədi?
“Ermənistanda faşizmin təbliğ edilməsinin özülü elə Rusiyapərəstlərin hakimiyyəti dövründə qoyulub”
Professor Qasım Hacıyev “Bakı-Xəbər”ə bildirdi ki, bu, Putinin dolayısı ilə Ermənistana tərəfdar çıxmaq istəyi ilə bağlı ola bilər. Rusiyanın bir neçə əsrdir ermənilərə dayaq durduğunu deyən Q.Hacıyevin sözlərinə görə, Birinci Qarabağ müharibəsi dövründə də, həmsədrlik institutunun mövcud olduğu illərdə də, son zamanlar da Rusiyanın Ermənistana jestlər etdiyini görmüşük. Q.Hacıyev təəssüflə qeyd etdi ki, Ermənistanda faşizm tüğyan edir, amma Putin bunu açıq şəkildə dilə gətirmək istəmir. “Bu gün neofaşzimin geniş yayıldığı ölkə kimi Ermənistan nəinki bölgəyə, hətta bütün dünayaya dəhşətlər saçır. Putinin üzərinə düşən o idi ki, Ermənistanda faşizmin ayaq açıb yeridiyini bəyan etsin, bunu Paşinyana irad tutsun. Amma təəssüf ki, o, Ermənistanın adını çəkmədi, ümumi danışmaqla, qeyri-müəyyənlik göstərməklə kifayətləndi”.
Q.Hacıyevin sözlərinə görə, Putin Ermənistandakı faşzimi tənqid etmək əvəzinə Ermənistanın İkinci Dünya müharibəsinə verdiyi “töhfələrdən” danışıb. Rusiya prezidentinin Hitler əlaltılarının “milli qəhrəmana” çevirənlərin olduğunu deməsi və Ermənistanın adını çəkməməsi “tülkünü əldən buraxmamağa” bənzəyir. Putin də ermənilərdən istifadə etmək məqsədi güdür. Rusiya prezidenti Ermənistanı əlində saxlamaq üçün onu ifşa etmək istəmir. Putinin Ermənistanı ifşa etməyə marağı yoxdur. O, Ermənistanın adını heç vaxt çəkməyib, çəkməyəcək də. Ermənistan Rusiyaya, Putinə nə qədər xəyanət etsə də, Rusiyanın gözü Ermənistandadır. Rusiya nə vaxtsa hakimiyyətə öz adamlarını gətirib bu ölkəni yenə dirçəldəcək. Bir məqamı da deyim ki, Ermənistanda faşizmin təbliğ edilməsinin özülü elə Rusiyapərəstlərin hakimiyyəti dövründə qoyulub. Bu gün də o proses davam edir. Putin başqalarını Hitlerin “davamçıları” adlandırmaqdansa, Ermənistandakı mənzərini etiraf etsəydi daha ədalətli olardı” - deyə Q.Hacıyev qeyd etdi.
İradə SARIYEVA
