Özü ilə bərabər general rütbəsini də türməyə aparanlar - Prezident son qoydu...
Şəmsəddin Əliyev: "Hesab edirəm ki, o şəxsdən general rütbəsinin alınması çox yaxşı nümunədir və bu başqalarına da görk olmalıdır"
Məlum olduğu kimi, general rütbəsi daşıyan müəyyən şəxslər olub ki, onlar cinayət əməlləri törətdiklərinə görə həbs ediliblər. Onların həbsindən sonra ən çox aktuallaşan məsələ belələrindən general rütbəsinin alınması olub. Bu olduqca vacib bir məsələ kimi müzakirə olunub.
Bu istiqamətdə diqqət çəkən addım atılıb. Belə ki, Prezidentin Sərəncamı ilə Tofiq Etibar oğlu Həsənov ədliyyə general-mayoru ali xüsusi rütbəsindən və "Vətən uğrunda" medalından məhrum edilib.
Sərəncam Tofiq Etibar oğlu Həsənovun ağır cinayətlər törətdiyinə görə məhkum olunması barədə məhkəmə hökmünün qanuni qüvvəyə minməsi və Naxçıvan Muxtar Respublikası Ağır Cinayətlər Məhkəməsinin təqdimatı əsas götürülərək imzalanıb.
Qeyd edək ki, Naxçıvan Muxtar Respublikası Penitensiar Xidmətinin sabiq rəisi general-mayor Tofiq Həsənov ötən il Dövlət Təhlükəsizliyi Xidmətində (DXT) istintaqı aparılan cinayət işi üzrə saxlanılıb. Vəzifə səlahiyyətlərindən sui-istifadə etməklə mənimsəmədə və rüşvətalmada təqsirləndirilən general haqda həbs qətimkan tədbiri seçilib.
Naxçıvan Ağır Cinayətlər Məhkəməsinin hökmünə əsasən, Tofiq Həsənovun ittiham edildiyi 179-cu (mənimsəmə) maddəyə ziyan ödənildiyinə görə xitam verilib. Həsənov külli miqdarda rüşvət almaqda təqsirli bilinərək 10 il azadlıqdan məhrum edilib. Təyin edilmiş cəza ümumi rejimli cəzaçəkmə müəssisəsində çəkilməlidir.
Hazırda baş verən bu məsələ olduqca yaxşı nümunənidir. Belə adamların hamısı gərək yüksək rütbələrdən məhrum edilsin. Necə olar - türmədə də general olar? Belələrinin rütbəsini alıb türməyə salmaq lazımdır, sonra bəraət alsa rütbəsi yenə bərpa olunar.
"Onlar arasında məhkum olanlar da var. Yəqin general rütbəsində olan məhkumların da rütbəsi əlindən alınacaq"
Mövzuya münasibət bildirən hüquqşünas Şəmsəddin Əliyev "Bakı-Xəbər"ə şərhində "Əslində Prezidentin imzası ilə verilən bu elit rütbələri ucuzlaşdırmamalıyıq. General rütbəsi kifayət qədər elit bir rütbədir və onun bütün mənalarda dəyəri çox yüksəkdir. Bu ali rütbə hər adama verilməməlidir. Kimə verilməlidirsə, o adam kifayət qədər cilalanmalıdır, onun barəsində, keçmiş fəaliyyəti haqqında ölkənin Prezidentinə arayış təqdim olunmalıdır. Bu mənada ki, bunun keçmiş fəaliyyəti ilə hazırkı fəaliyyəti üst-üstə düşür, əvvəl də, indi də həm hərəkətlərində, həm vəzifə funksiyalarının yerinə yetirilməsində Azərbaycan xalqına, Azərbaycan dövlətinə sədaqət nümayiş etdirib. Bununla da eyni zamanda Prezidentin imzasına hörmətlə yanaşacağına əminlik yaranmalıdır" - deyə bildirdi.
Ş.Əliyevin sözlərinə görə, Sovet dönəmində hətta polkovnik rütbəsini kim alırdısa onunla bağlı da Azərbaycandan geniş təhlilli arayış sənədlərə əlavə olunurdu və Moskvaya göndərilirdi. Ş.Əliyev qeyd etdi ki, o arayışa baxıb tam həmin şəxs haqqında məlumat əldə etdikdən sonra ona polkovnik rütbəsinin verilməli olub-olmadığı barədə qərara gəlnirdi. O bildirdi ki, general rütbəsi yalnız birinci şəxslərə verilə bilərdi, daxili işlər nazirinə və sonra da birinci müavininə, eynilə digər sahələrdə. "Birinci və İkinci Qarabağ müharibələrində iştirakı, xidməti olmayan insanlara çox asan şəkildə general rütbələri təqdim olunur. Sonradan bəziləri bu rütbədən yalnız öz şəxsi maraqları üçün istifadə edir. Müəyyən insanlar bu rütbədən sui-istifadə edib qanunazidd əməllər törədirlər". Ş.Əliyev hesab edir ki, rütbəsindən sui-istifadə edərək öz ətrafı, yaxınları üçün kifayət qədər işlər görən belələrinin bu rütbəni daşıması doğru deyil. Onun fikrincə, bu rütbənin verilməsində yanlışlığa yol vermək olmaz. "Hətta Milli Qəhrəmanlar sırasında da bizim general-leytenant rütbəli insanlarımız olub. Onlar arasında məhkum olanlar da var. Yəqin general rütbəsində olan məhkumların da rütbəsi əlindən alınacaq.
Ümumiyyətlə, hazırda general rütbəsi ilə məhkum olunanların da bu rütbələri əllərindən alınmalıdır. Cəzanın bu şəkildə həyata keçirilməsi, tətbiqi həm cəzanın xofunu, həm də məqsədini, yəni sosial ədalətin bərpasını özündə ehtiva etmiş olur. Bax, budur cəzanın məqsədi. Belə də olmalıdır. Kimliyindən aslı olmayaraq, belə düşünsək ki, dünən yaxşı işlədin sənə bu rütbəni verdik, amma bu gün qanunzidd addım atdın, xəyanət etdin, sən məhkum olunmalısan və bu rütbə səndən alınır. Düşünürəm, bu rütbə verilərkən həmin şəxsin keçmişini elə araşdırmalıyıq ki, onun gələcəkdə hər hansı bir həddi aşma, vəzifəsindən sui-istifadə faktları ilə bağlı ehtimala, zənnə qapılmaq üçün belə bir dəhliz olmasın. Belə insanlara rütbə verilməlidir. Amma belə baxanda, doğrudan da bizim generalların sayı hədsiz dərəcədə çoxdur. Bəzən belə olur, general rütbəsi 60 yaşında verilir və 62 yaşında təqaüdə göndərilir. Bu da qəbuledilməzdir. Kifayət qədər xidmətlər, yaş nəzərə alınmalıdır ki, general rütbəsi aldıqdan sonra da öz fəaliyyətini, xidmətini davam etdirə bilsin. Ətraf üçün görk ola biləcək bir addım atsın. Təbii ki, tabeliyində olanlara peşə fəaliyyəti ilə bağlı ehtiyatında olan o zənginliyi aşılamağı bacarmalıdır, nəyi öyrənibsə onu öyrətsin. Yox, əgər verilən general rütbələrindən iki ildən sonra vətəndaş təqaüdə gedirsə buna general rütbəsi verməyin nə mənası var? Dövlət büdcəsindən kifayət qədər vəsaitlər ayrılır. Yəni mənim dediyim budur ki, ölkə başçısına general rütbəsinin verilməsi ilə bağlı təqdim olunan o sənədlərdə onun keçmişi, fəaliyyəti ilə bağlı kifayət qədər cilalanmış arayışlar verilməlidir. Və gələcəkdə xidməti pilləkəndə irəli çəkilməsi üçün perspektivdə bunun qabiliyyəti, bacarığı yetərincədirmi? Bununla da Prezident tam əmin olsun ki, bəli, gələcəkdə bu, Azərbaycan xalqına sədaqət ruhunda davrana biləcək bir məmurun irəli çəkilməsi üçün əsas olacaq. Belə düşünürəm. Əks hallarda belə məsələlərin şahidi olacağıq.
Görünən odur ki, Prezidentin imzasına, onun etibarına, etimadına xəyanət edilib. Burada onu general rütbəsinə təqdim edənlərin də günahı var. Hesab edirəm ki, o şəxsdən general rütbəsinin alınması çox yaxşı nümunədir və bu başqalarına da görk olmalıdır" - deyə Ş.Əliyev bildirdi.
İradə SARIYEVA
