Azər Həsrət: "Bu cür konfranslar müstəmləkəçilikdən əziyyət çəkən xalqlar üçün yeni mərhələ sayıla bilər"
Məlum olduğu kimi, oktyabrın 3-də Bakı Təşəbbüs Qrupunun təşkilatçılığı ilə "Afrikada Fransanın neokolonializm siyasətinə" həsr edilmiş beynəlxalq konfrans keçiriləcək.
Konfransda Afrikanın Seneqal, Burkina Faso, Kamerun, Qvineya-Bisau, Konqo Demokratik Respublikası, Mavritaniya, Zimbabve, Niger, Fransa və Fransanın əsarəti altında olan Mayot adasının nümayəndələri iştirak edəcək.
"Bakının Fransa müstəmləkəçiliyindən əziyyət çəkən ümid pəncərəsinə çevrilməsi təqdirəlayiq haldır"
Bakıda keçirilən beynəlxalq konfransın əhəmiyyəti haqqında danışan siyasi şərhçi Azər Həsrət "Bakı-Xəbər"ə şərhində bildirdi ki, Bakının Fransa müstəmləkəçiliyindən əziyyət çəkən ümid pəncərəsinə çevrilməsi təqdirəlayiq haldır. Bu da təsadüfi deyil: "Məlumdur ki, Azərbaycan uzun illər müstəmləkəçilikdən əziyyət çəkib. Hazırda isə Azərbaycanın böyük bir hissəsi İran adlanan dövlətin işğalı altındadır. Biz müstəmləkəçiliyin, işğalın nə olduğunu çox yaxşı bilirik. Bunu öz üzərimizdə hiss etmişik, əziyyətini də çəkmişik. Nə qədər itkilərimiz olub, millət olaraq tarix səhnəsində geri qalmışıq. Bu baxımdan Azərbaycan dövləti və xalqı Fransanın müstəmləkəçiliyindən əziyyət çəkən xalqların duyğularını çox yaxşı başa düşür. Bu səbəbdən də ölkəmizdə bu tip konfranslar keçirilir. Bu cür tədbirlər Bakıdan kənar ərazilərdə də keçirilir. O tədbirlərdə müstəmləkədən əziyyət çəkən xalqlara işıq ucu göstərilir, ümid verilir. Bu yaxşı haldır. Ümumiyyətlə, Fransa kimi qədim tarixə malik bir dövlətin XXI yüzillikdə hələ də müstəmləkəçilik siyasətindən əl çəkməməsi təəccüblüdür. Çünki bu elan edilmiş mədəniyyətə ziddir. Iddia olunur ki, guya Fransa yüksək sivilizasiya örnəyi olan bir dövlətdir. Doğrudan da onlar sivilizasiya yüksək səviyyədədirsə niyə hazırki şəraitdə dünyada ən geniş müstəmləkələrə malik dövlət sayılır. Əslində Fransa dövləti könüllü şəkildə müstəmçilikdən imtina edib, onlara azadlıq bəxş etməlidir. Ancaq bunun əksi müşahidə olunur. Yayılan məlumatlardan da bəlli olur ki, Fransa müstəmləkə altında saxladığı torpaqlarda yerli sakinlərə divan tutur. Müstəmləkçilikdən əziyyət çəkən xalqların Bakıda toplaşması, müzakirələr aparması maraqlıdır".
Həmsöhbətimiz hesab edir ki, bu cür konfranslar müstəmləkəçilikdən əziyyət çəkən xalqlar üçün yeni mərhələ sayıla bilər: "Şəxsən mən Seneqalda olmuşam və təəccüb keçirtmişəm. Məni təəccübləndirən Seneqalın dövlət dilinin fransız dili olmasıdır. Adamlar fransız deyil, dinləri müsəlmandır, ancaq dövlət dili fransız dilidir. Eyni vəziyyət digərlərində də müşahidə olunur. Bu baxımdan hesab edirəm ki, həmin dövlətlərin nümayəndələrinin iştirakı ilə ölkəmizdə keçirilən konfrans olduqca mühumdur. Bu tədbir sayəsində Fransa dövlətinə mesaj verilir ki, yavaş-yavaş o əraziləri tərk etməlidir".
Günel CƏLİLOVA
