Müdafiə nazirinin müavini – Əlahiddə Ümumqoşun Ordu komandanı, general-polkovnik Kərəm Mustafayevlə bağlı müəmma davam edir. Artıq neçə gündür ki, onun tutduğu vəzifədən azad edildiyi ilə bağlı məlumat var.
10 il Əlahiddə Ümumqoşun Orduya komandanlıq etmiş general Mustafayevin işdən çıxarılması hələ rəsmi təsdiqini tapmasa da, artıq onun yerinə Vətən Müharibəsi Qəhrəmanı, general-mayor Kənan Seyidovun təyinat alması barədə məlumat yayıldı. Sözügedən hər iki məlumat Müdafiə Nazirliyi tərəfindən təsdiq və ya təkzib edilməsə də, Kərəm Mustafayev saytlardan birinə verdiyi eksklüziv açıqlamasında işdən çıxarılması xəbərinin doğru olduğunu bildirib.
Maraqlıdır ki, son aylar Müdafiə Nazirliyinin bir neçə generalı ehtiyata göndərilsə də, Kərəm Mustafayev postunu qoruya bilirdi. Müdafiə Nazirliyinin bu cür informasiyaların fonunda nümayiş etdirdiyi susqun mövqeyi başadüşülən deyil. Nəzərə alaq ki, K.Mustafayev son illərdə vəzifəsindən azad edilən ilk general-polkovnik rütbəli zabitdir. General-polkovnik rütbəsi daşıyan zabitlərdən sonuncu dəfə üç il əvvəl Azərbaycan Ordusunun Baş Qərargah rəisi Nəcməddin Sadıkov işdən çıxarılıb.
Qeyd edək ki, bir çox media quruluşları Kərəm Mustafayevin bugünlərdə prokurorluğa çağırıldığı haqda məlumat yaydı. Hətta bildirildi ki, general-polkovnik istintaqı aparılan cinayət işlərindən biri ilə bağlı müstəntiqlərə ifadə verib. Onun iş üzrə hansı qisimdə dindirildiyi bilinmir. Bu barədə də məsul qurumlardan rəsmi açıqlama verilmədi.
Ən maraqlı məqam budur ki, Kərəm Mustafayevin adı Müdafiə Nazirliyinin rəsmi saytından çıxarılıb. Hazırda nazirliyin saytında Müdafiə nazirinin müavini – Əlahiddə Ümumqoşun Ordu komandanı bölməsində heç bir məlumat yoxdur.
General Kərəm Mustafayevin adı uzun müddətdir ki, medianın gündəmindən düşmür.
K.Mustafayevlə bağlı xəbərlər 2022-ci ilin noyabr ayından başlayaraq daha da intensivləşib. Həmin ilin payızında Naxçıvan Muxtar Respublikasında keçirilən antikorrupsiya əməliyyatları bir çox sahələri əhatə etdi. Muxtar respublikanın elə bir sahəsi olmadı ki, orda DTX, Baş Prokurorluq əməliyyat keçirməsin. Xeyli vəzifəli şəxs saxlanılaraq Bakıya gətirildi.
Bu proseslərin kulminasiya nöqtəsi Vasif Talıbovun vəzifədən uzaqlaşdırılması oldu. 1995-ci ildən Naxçıvan Muxtar Respublikası Ali Məclisinin sədri vəzifəsini tutan V.Talıbov 21 dekabr 2022-ci ildə bu vəzifədən getdi.
Həmin vaxt Vasif Talıbova yaxınlığı ilə seçilən Kərəm Mustafayevin də "vurulacağı" gözlənilirdi. Maraqlıdır ki, general həmin dövrdə vəzifəsini qoruya bildi. Amma görünür, təhlükəni tam neytrallaşdıra bilməyib.
Kərəm Mustafayev 1983-1992-ci illərdə SSRİ Silahlı Qüvvələri tərkibində taqım komandiri, bölük komandiri və tabor komandiri vəzifələrində xidmət edib. 1992-ci ildən Azərbaycan Respublikası Silahlı Qüvvələrində tabor komandiri, Əlahiddə gücləndirilmiş motoatıcı briqadanın qərargah rəisi-briqada komandirinin müavini, Əlahiddə gücləndirilmiş motoatıcı briqadanın komandiri, Motoatıcı diviziya komandiri, Ordu korpusunun komandiri vəzifələrində xidmət edib.14 may 2014-cü il ildə Azərbaycan Respublikası Prezidentinin sərəncamı ilə müdafiə nazirinin müavini - Əlahiddə Ümumqoşun Ordu Komandanı vəzifəsinə təyin olunub.
Məhəmmədəli QƏRİBLİ
