Görünən budur ki, Qərb ölkələri Yaxın Şərqdə cərəyan edən proseslərlə bağlı ikiüzlü siyasət aparır və proseslər 3-cü dünya müharibəsinə doğru gedir. ABŞ Qəzzadakı gərginlikdən istifadə edərək, Aralıq dənizinə əlavə dönanma göndərir.
Makron deyir ki, Qəzza ilə mübarizə üçün beynəlxalq koalisiya yaratmaq lazımdlr. BMT TŞ-də qətnamə qəbul olunmasına imkan vermirlər. Belə kritik vəziyyət prosesləri 3-cü dünya müharibəsinə doğru aparırmı?
Müstəqil siyasətçi Abutalıb Səmədov “Bakı-Xəbər”ə açıqlamasında bildirdi ki, Qəzza bölgəsində baş verən hadisələr bütün dünyanı narahat edir: “Əvvəlcə cəhdlər göstərildi ki, quru əməliyyatların keçirilməsi fikrindən İsraili daşındırmaq üçün müəyyən addımlar atılsın. Bu addımlar atıldı, xəbərdarlıqlar olundu. Digər dövlətlərin bu prosesə qoşulacağı deyildi. İlk növbədə İran quru əməliyyatlar başlayarsa, müəyyən qırmızı xətlər keçilərsə, kənarda dayanmayacağını bildirdi. Baxmayaraq ki, ABŞ İranı hadisələrə müdaxilə etməkdən çəkinməyə çağırmışdı. Eyni zamanda bölgəyə ABŞ - ın təyyarədaşıyan gəmilərinin daxil olması gərginliyi bir az da artırmışdı. BMT Baş Assambleyası böyük səs çoxluğu ilə atəşkəsin təmin olunması barədə qətnamə qəbul etmişdi. Ancaq bütün bu addımlar elə bir ciddi nəticə doğurmadı. Ötən həftənin son günlərində İsrail Qəzzada quru əməliyyatlarına başladı. Şübhəsiz ki, bu, yeni qüvvələrin hərbi əməliyyatlara qoşulmaq ehtimalını bir az da artırdı. Bu addımlar 3-cü dünya müharibəsinə gətirib çıxara bilərmi? Əslinə qalsa, Ukraynada gedən müharibə bir çoxları üçün artıq üçüncü dünya müharibəsi kimi qiymətləndirilir. Çünki Rusiyanın apardığı işğalçı müharibəyə qarşı dünyanın böyük hissəsi birləşib bütün potensiallarını səfərbər edərək, Rusiyanı məğlub etməyə çalışırlar. Təəssüf ki, hələ ki, bu proses uğurla nəticələnməyib. Ancaq hələ də ümid var ki, növbəti ildə keçiriləcək əks hücum kampaniyası uğurla nəticələnə bilər. Uzun müşahidələrdən sonra ABŞ ilin sonunda, gələn ilin əvvəllərində Ukraynaya F16 təyyarələri verməyi də qərara alıb. Ancaq problemlər qalmaqdadır, nəzərə alsaq ki, qarşıda prezident seçkiləri var və demokratların uduzmaq ehtimalı çox yüksəkdir, bütün bunlar Ukrayna üçün çox ağır problemlərlə nəticələnə bilər. Digər tərəfdən də Qəzzada baş verənlər hərbi əməliyyatların daha da şiddətlənəcəyini və yeni qüvvələrin bu prosesə qoşulacağını göstərir. İran artıq qırmızı xətlərin keçildiyini və ABŞ - ın dırnaqarası xahişlərini nəzərə almayacağını deyir. Ölən fələstinlilərin sayı artıq on minə yaxınlaşır. Onların da böyük hissəsi uşaqlardı. Bütün bunlar dünyada vəziyyətin son dərəcə gərginləşdiyini göstərir. Nüvə dövlətlərinin üz - üzə gəlmə, nüvə müharibəsinin başlama ehtimalı da artır. Dünya çox böyük təhlükələr qarşısındadır. İsrail rəsmiləri əməliyyatların bir neçə ay deyil, hətta il davam etmə ehtimalından danışırlar. Ukraynada da savaş ən azı 2024 - cü ilə qədər davam edəcək. Ola bilsin ki, hərbi əməliyyatlatın şiddəti azalsın, ancaq 2024 - cü ildə də bu proseslər sonlanmaya bilər. Çinlə Tayvan arasında da qarşıdurma hər an gözlənilir. Gələn il və ya sonrakı il olmasa da, Çinin Tayvanı güc yolu ilə özünə birləşdirmə ehtimali gündəlikdən çıxmayıb. Bütün bunlar dünyanın nə qədər böyük təhlükə qarşısında olduğunu göstərir və nüvə müharibəsi ehtimalının son dərəcə yüksək olduğunu hamiya nümayiş etdirir. Bundan zəruri nəticələr çııxarılacaqmı? Bu vəziyyəti düzətmək üçün hansısa addımların atılması mümkündür? BMT Təhlükəsizlik Şurasının nə qədər dişsiz orqan olduğu son zamanlar bir daha nümayiş olundu. Bütövlükdə BMT - nin qəbul etdiyi qərarların o qədər də ciddi əhəmiyyət daşımadığı hamının gözləri önünə sərildi. Bu vəziyyətdə böyük dövlətlər birlikdə çıxış yolu axtara bilərlərmi? Hələ ki, bu görünmür. Ancaq yaxın vaxtlarda belə addımlar atılmasa, həqiqətən də dünyanı çox ağır günlər gözləyir”.
Məhəmmədəli QƏRİBLİ
